ပြည်ပကို တရားဝင် သွားရောက် အလုပ်မယ့်သူတွေ အနေနဲ့ စစ်ကောင်စီရဲ့ အလုပ်သမားဝန်ကြီးဌာန ထံ ပြည်ပထွက်ခွာခွင့် ခွင့်ပြုချက် တောင်းခံရတာ မှာ သွားရောက်မယ့်ရက် ရဲ့ ရက်သတ္တပတ် နှစ်ပတ် ထက်စောပြီး ခွင့်ပြုချက် တောင်းခံတာမျိုး မလုပ်ဖို့ စစ်ကောင်စီရဲ့ အလုပ်သမားဝန်ကြီးဌာနက အသိပေးကြေညာချက် ထပ်မံထုတ်ပြန်ထားပါတယ်။
မတ်လ ၁၇ ရက် ကစပြီး PJ နိုင်ငံကူးလက်မှတ်နဲ့ ပြည်ပ ထွက်ခွာမယ့် လုပ်သား အားလုံး အလုပ်သမား ဝန်ကြီးဌာန ထံ ပြည်ပထွက်ခွာခွင့် ပြုဖို့ ခွင့်ပြုချက်တောင်းခံရမှာဖြစ်ပြီး ခွင့်ပြုချက်မရပါက ထွက်ခွာလို့ မရဘူးလို့ ထုတ်ပြန်ကြေညာခဲ့ပါတယ်။
အခုလို ထုတ်ပြန် အပြီး ပြည်ပကနေခွင့်ဖြင့်ပြန်လာတဲ့ လုပ်သားတွေ နဲ့ ပြည်ပကို အလုပ်သွားရောက် လုပ်မယ့် လုပ်သား အများစု က ဝန်ကြီးဌာနရဲ့ migrantdeparture@gmail.com ကို ခွင့်ပြုချက် ပေးပို့လျှောက်ထားမှု တွေ အလွန်များပြားခဲ့တယ်လို့ သိရပါတယ်။
"ဌာနက ကြေညာကတည်း စည်းကမ်းသတ်မှတ်ချက် အကုန်လုံးကို ထည့်သွင်းထုတ်ပြန်ရမှာ အခု တော့ တနေ့တမျိုးစီ ကြေညာနေတယ် OWIC ကတ်နဲ့ လေယာဉ်လက်မှတ်ရရှိပြီးတဲ့သူတွေ သူတို့ပြောထားတဲ့ gmail ကနေ ပြည်ပထွက်ခွင့် တောင်းရမယ်ဆိုလို့ ပို့ကြတယ် အခု မနိုင်မနင်းဖြစ်တော့မှ ထွက်မယ့်ရက်ထက် နှစ်ပတ်စောပြီး မပို့ပါနဲ့ ဖြစ်ကော အဲ့တော့ နှစ်ပတ်စောပြီး ပို့ထားတဲ့သူတွေ ထပ်ပို့ရပြီဌာနဆိုင်ရာ လုပ်နေပြီး အစီစဉ်တကျ မလုပ်နိုင်ဘဲ တနေ့တမျိုး စည်းကမ်းချက်ထုတ်ပြီး ပြည်သူတွေကို စိတ်ဒုက္ခတွေ ပေးနေကျတယ်""လို့ ပြည်ပမှခွင့်ပြန်လာသူတစ်ဦးကပြောပါတယ်။
ပြီးခဲ့တဲ့ရက်ပိုင်းကလည်း ပြည်ပအလုပ်အကိုင် သက်သေခံ ကတ် OWIC ပြုလုပ်ဖို့ အချက်အလက်တွေပေးပို့ လျှောက်ထားမယ့်ကို စာတိုက်ကြီးကနေတစ်ဆင့် နေပြည်တော်ရှိ အလုပ်သမားရုံးချုပ် သို့ အမြန်ချောပို့ဖြင့် ပို့ဆောင်ကာပြုလုပ်ခွင့် တောင်းရမှာ ဖြစ်ပြီး ခွင့်ပြုချက်ရမှ မြောက်ဒဂုံ အလုပ်သမားရုံးမှာ သွားရောက် ထုတ်ယူရမယ် လို့ ထုတ်ပြန်ကြေညာခဲ့ပါသေးတယ်။ OWIC ကတ် နဲ့ လေယာဉ်လက်မှတ် ဖြတ်ပြီး မှ သာ ပြည်ပထွက်ခွာ ခွင့် ခွင့်ပြုချက်ကို တောင်းရမှာ ဖြစ်ပါတယ်။
အခုလို ပြည်ပထွက် အလုပ်လုပ်မယ့် လုပ်သား တွေ ကို စစ်ကောင်စီဘက်မှ ကန့်သက်ချက် အမျိုးမျိုး၊ စည်းကမ်းချက်အမျိုးမျိုး ထုတ်ပြန်ပြီး ပြည်ပသို့ သွားရောက် သူတွေ နည်းအောင် နည်းအမျိုးမျိုးနဲ့ လုပ်ဆောင်နေတယ်လို့ အလုပ်သမားအရေးလှုပ်ရှားသူတွေကလည်းဝေဖန်ထောက်ပြတာတွေရှိနေပါတယ်။
