ပြည်ပ ကို သွားရောက်အလုပ်လုပ်ကိုင်မယ့် အလုပ်သမားတွေ အနေနဲ့ PJ နိုင်ငံကူးလက်မှတ်လျှောက်ထား ရမှာ ဖြစ်သလို ပြည်ပအလုပ် သမားအဖြစ်မှတ်ပုံတင်ကာ ပြည်ပအလုပ်အကိုင်အလုပ်သမားသက်သေခံကတ် (OWIC)ကိုပါလျှောက်ထားဖို့ အလုပ်သမားဝန်ကြီးဌာနက ဩဂုတ်၁၄ ရက်မှာ အသိပေးလိုက်ပါတယ်။

 

ပြည်ပ ကို သွားရောက်အလုပ်လုပ်ကိုင်ရန်အတွက် သွားရောက်မယ့် သူတွေ ဟာ အလုပ်အကိုင်အတွက် ထုတ်ပေးတဲ့ နိုင်ငံကူးလက်မှတ် (Passport for Job - PJ) အမျိုးအစား ကို လျှောက်ထားရန်လိုအပ်မှာ ဖြစ်ပြီး အလုပ်သမားဝန်ကြီးဌာနမှာ မဖြစ်မနေ မှတ်ပုံတင်ပြီးမှ ပြည်ပသို့သွားရောက်လုပ်ကိုင်ရန် လိုအပ်တယ်လို့ ဆိုပါတယ်။

 

လက်ရှိမှာ ပြည်ပနိုင်ငံတွေကို ကို အလည်ဗီဇာ နဲ့ သွားရောက်လည်ပတ်နိုင်ရန်ထုတ်ပေးတဲ့ (Passport for Visit – PV) အမျိုးအစားကိုင်ဆောင်သူတွေဟာ အလည်အတွက် မဟုတ်ဘဲ အလုပ်အကိုင်ဗီဇာများ လျှောက်ထားရယူပြီး ပြည်ပသို့သွားရောက်လုပ်ကိုင်လျက်ရှိကြတဲ့ အတွက် ပြည်ပ မှာ အခက်အခဲပြဿနာ တစ်စုံတစ်ရာပေါ်ပေါက်ပါက ကူညီဖြေရှင်းဆောင်ရွက်ပေးရန် အခက်အခဲများ ကြုံတွေ့ရလျက်ရှိတယ်လို့ အလုပ်သမားဝန်ကြီးဌာနအသိပေးချက်မှာဖေါ်ပြထားပါတယ်။

 

နိုင်ငံကူးလက်မှတ် (Passport for Visit – PV) အမျိုးအစားကိုင်ဆောင်ပြီး အလုပ် အကိုင်ဗီဇာများ လျှောက်ထားရယူကာ ပြည်ပသို့ထွက်ခွာရာမှာ အပြည်ပြည်ဆိုင်ရာလေဆိပ်၊ နယ်စပ်ဂိတ်များမှ စိစစ်တားမြစ်ခြင်းများခံရပါက မလိုလားအပ်တဲ့ ဆုံးရှုံးမှုတွေ မဖြစ်ပေါ်စေ ဖို့ ပြည်ပသို့သွားရောက်အလုပ်လုပ်ကိုင်ရန် ရည်ရွယ်ထားရှိပါက နိုင်ငံကူးလက်မှတ် စတင်လျှောက်ထားရာတွင် (Passport for Job- PJ) အမျိုးအစားကို လျှောက်ထားရယူကာ အလုပ်သမားဝန်ကြီးဌာန လုပ်ထုံးလုပ်နည်းများနှင့်အညီ ပြည်ပအလုပ်အကိုင်အလုပ်သမားသက်သေခံကတ် (OWIC) လျှောက်ထားရယူပြီး တရားဝင် သွားရောက်လုပ်ကိုင်ကြဖို့ တိုက်တွန်းနှိုးဆော်ထားပါတယ်။

 

စစ်ကောင်စီက ၂၀၂၄၊ မေလ ၁ ရက်ကစပြီး အသက် ၂၃ နှစ်ကနေ ၃၁ နှစ်အကြား အမျိုးသားတွေကို ပြည်ပထွက် အလုပ်လုပ်ခွင့် ပိတ်ပင်ထားပါတယ်။

 

ပြည်ပထွက်အလုပ်လုပ်ခွင့် နိုင်ငံကူးလက်မှတ် PJ (Passport for Job) ကို သက်တမ်း ၅ နှစ်မပြည့်ပါက လည်း အလည်အပတ် နိုင်ငံကူးလက်မှတ် (Passport for Visit) ပြောင်းလဲလျှောက်ထားတာတွေကို ဇွန်လ ၆ ရက်နေ့ကစပြီး စစ်ကောင်စီကပိတ်ပင်ထားပါတယ်။