ပဲခူး၊ ညောင်အင်းစက်မှုဇုန်ထဲက Myanmar Huasheng Yashili Fashion Co.Ltd အထည်ချုပ် စက်ရုံမှာ အလုပ်သမား ၂၅၀ ကျော် အလုပ်ရပ်နားမှု ညှိနှိုင်းပြီး ပြေလည်မှုရရှိခဲ့တယ်လို့ အလုပ်သမားတွေက ပြောပါတယ်။
Myanmar Huasheng Yashili Fashion Co.Ltd အထည်ချုပ်စက်ရုံ (အမိုးပြာစက်ရုံ) ကတော့ ပဲခူးမြို့ ၊ဥဿာ(၉)ရပ်ကွက်၊ ညောင်အင်းစက်မှုဇုန်မှာ အလုပ်သမား ၁,၀၀၀ နီးပါးနဲ့ လုပ်ငန်းလည်ပတ်နေပြီး လက်ရှိ အလုပ်သမား ၂၅၃ ဦးကို အလုပ်ကနေ ရပ်နားခဲ့တာလို့ သိရပါတယ်။
“ လုပ်သက် ၆ လအောက်တွေကို ကျပ်ငါးသောင်း ၊ ၆ လနဲ့အထက်တွေကိုတော့ လဝတ်စာ အဲ့လိုပေးမယ်ဆိုပြီး ပြေလည်သွားတယ်။ သူတို့ကတော့ ဂရုဏာကြေးဆိုပြီး ပြောတာပေါ့ “လို့ အလုပ်သမားပြောပါတယ်။
တရုတ်နိုင်ငံသား Mr.Cai Jan Feng ပိုင်ဆိုင်တဲ့ Myanmar Huasheng Yashili Fashion Co.Ltd အထည်ချုပ် စက်ရုံမှာ စက်တင်ဘာ ၂၁ ရက်က အထည်အော်ဒါ မရတာကြောင့် လုပ်သက် ၆ လ ဝန်းကျင် စက်ရုံအလုပ်သမား ၂၅၀ ကျော်ကို အလုပ်ကနေ ရပ်နားမယ်လို့ ကြေညာခဲ့တာဖြစ်ပါတယ်။
“အလုပ်သမားတွေကတော့ စက်ရုံဘက်က အရေးကြီးရင် ကြီးသလို အောလင်း ၊ အောနိုက်တွေ လုပ်ပေးခဲ့ ကြတယ်။ အခုလို ရုတ်တရက် အလုပ်ရပ်နားဆိုတော့ အလုပ်သမားတွေဘက်ကို ကြည့်သင့်တယ်ဆိုပြီး တောင်းဆို ခဲ့ကြတာပါ” လို့ အလုပ်သမားအရေးလှုပ်ရှားတဦးက ပြောပါတယ်။
အထည်ချုပ် စက်ရုံက အလုပ်သမားတွေကို တ လကြိုတင် အသိပေးခဲ့ပေမဲ့ အလုပ်သမား ၈၀ လောက်က သတ်မှတ် လျော်ကြေးအတွက် တာဝန်ရှိသူတွေနဲ့ ပြောဆိုနိုင်ဖို့ စက်တင်ဘာ ၂၁ ရက်မှာ အလုပ်မဆင်းဘဲ စောင့်ဆိုင်းခဲ့ကြတာ ဖြစ်ပါတယ်။
“အခုလို ပေးတယ်ဆိုတာက စက်ရုံဘက်က မဖြစ်မနေပေးရတဲ့ ပုံစံမျိုးပဲ ။ ဂရုဏာကြေးပဲပြောပြော၊ နစ်နာ ကြေးပဲ ပြောပြော ၊ နဂိုကတည်း ဒီလို စဉ်းစားမိရင် အခုလို တောင်းဆိုတဲ့ ပုံစံတွေ မဖြစ်ဘူးပေါ့ ၊ တောင်းဆိုလို့ ပေးလိုက်ရတာမျိုးလို့ မြင်ပါတယ် ။ ” လို့ အလုပ်သမားအရေးလှုပ်ရှားတဦးက ပြောပါတယ်။
အလုပ်က ရပ်နားခံရမဲ့ Myanmar Huasheng Yashili Fashion Co.Ltd အထည်ချုပ်အလုပ်သမားတွေမှာ လူမှုဖူလုံရေး ထည့်ဝင်ငွေကို အလုပ်စဝင်တဲ့လကတည်းက ထည့်သွင်းခဲ့ပေမဲ့ လက်ရှိအချိန်အထိ လူမှုဖူလုံရေး ကတ်တွေ မရသေးဘူးလို့လည်း သိရပါတယ်။
“ လူမှုဖူလုံရေးထည့်ဝင်ငွေ ၆ လ ပြည့်ပြီဆိုရင်၊ ခံစားခွင့်တော်တော်များရပြီလို့ ပြောလို့ရတယ်၊ အခု အလုပ်သမား ကြတော့ နောက်အလုပ်ရောက်ရင် အသစ်က ပြန်လုပ်မယ်ဆို ၆ လ ပြန်စောင့်ဆိုမျိုးဖြစ်နေတယ်။ သူ့တို့က စဝင် ကတည်းက စုငွေအနေနဲ့ ထည့်သွင်းလာတာဆိုတော့ ငွေအတွက်လည်း နစ်နာကြတယ်”လို့ အလုပ်သမား အရေးလှုပ်ရှားသူက ပြောပါတယ်။
လူမှုဖုံလုံရေးကတ်ရရှိဖို့ စက်ရုံဘက်မှာ တာဝန်ရှိပြီး Myanmar Huasheng Yashili Fashion Co.Ltd က လုပ်သက် ၆ လရှိ အလုပ်သမားတွေမှာတော့ လက်ရှိ အလုပ်ရပ်နားချိန်အထိ ဖူလုံရေးကတ် မရှိသေးဘူးလို့လည်း သိရပါတယ်။ အထည်ချုပ်စက်ရုံအနေနဲ့ အော်ဒါပြန်ရပါက အလုပ်ရပ်နား ထားသူတွေကို ဦးစားပေးခေါ်ပါ့မယ် ပြောဆိုထားပေမဲ့ လက်တွေ့ ဆန်ဖို့လိုအပ်တယ်လို့လည်း ထောက်ပြထား ပါတယ်။
“ဒီအလုပ်သမားတွေ တောင်းဆိုတာကို စက်ရုံတွေဘက် black list သွင်းတတ်ကြတယ်။ ဒီလိုမဖြစ်ဖို့ ပြောချင် တယ်။ အခုခေတ်ကာလက အလုပ်အကိုင်ရှားတယ် ငွေတန်ဖိုးလည်း မရှိတော့ အလုပ်သမားတွေ အရမ်းခက်ခဲ ကြပါတယ်။ black list သွင်းရင် နောက်အလုပ်တွေပါ မရအောင် ဖြစ်တတ်လို့ ပါ။ ဒါမျိုးတွေ မလုပ်ဖို့လိုပါတယ်” လို့ ဆက်ပြောပါတယ်။
#MyanmarLabourNews
