ထိုင်းနိုင်ငံ အတွင်း အထောက်အထားမရှိတဲ့ နိုင်ငံခြားသား လုပ်သားတွေ အတွက် ပြုလုပ်ပေးမယ့် ပန်းရောင်ကတ် (ခေါ်)ဘတ် ပြုလုပ်မယ့်ရက်ကို တရားဝင်ထုတ်ပြန်ကြေညာခြင်းမရှိသေးတဲ့ အတွက် ငွေကြေးကြိုတင်ကောက်ယူခြင်းတွေ ပြုလုပ်ပါက တိုင်ကြားနိုင်တယ်လို့ ထိုင်းအလုပ်သမားဝန်ကြီးဌာနက စက်တင်ဘာ ၈ ရက် မှာ ထုတ်ပြန်ကြေညာပါတယ်။

 

အလုပ်သမားဝန်ကြီးဌာနက မြန်မာ၊ လာအို၊ ကမ္ဘောဒီးယား၊ ဗီယက်နမ် အလုပ်သမားတွေအတွက် ရွှေ့ပြောင်းအလုပ်သမား မှတ်ပုံတင်အသစ် ပြုလုပ်ပေးမှာ ဖြစ်ပေမယ့် မည်သည့် ရက်မှာ ပြုလုပ်မယ်လို့ ကြေညာခြင်း မရှိသေးသလို ငွေကြေးမည်မျှသွင်းရမယ်လို့လည်း သတ်မှတ် ကြေညာခြင်း မရှိသေးဘူးလို့ အသိပေးထားပါတယ်။

 

ဒါကြောင့် ရွှေ့ပြောင်း လုပ်သားတွေ အနေနဲ့ ငွေပေးသွင်းခြင်းနဲ့စာရင်းတင်ခြင်းတွေ မပြုလုပ်ဖို့ အထူးသတိပေးထားပြီး ငွေကြေးကောက်ခံခြင်း လိမ်လည်ခံရခြင်းတွေရှိပါက အလုပ်သမားဝန်ကြီးဌာနရဲ့ Hotline နံပါတ် ၁၅၀၆ သို့ ဖုန်းခေါ်ဆို တိုင်ကြားနိုင်တယ်လို့ ထုတ်ပြန်ထားပါတယ်။

 

 

ပန်းရောင်ကတ် နဲ့ပက်သက်တဲ့ အချက်အလက်တွေ ကို အလုပ်သမားဝန်ကြီးဌာနရဲ့ တရားဝင် Facebook စာမျက်နှာ ကနေ ကြေညာပေးမှာဖြစ်ဖို့ စောင့်ကြည့်ကြရန် တိုက်တွန်းထားပါတယ်။

 

ထိုင်းအလုပ်ရှင်တွေ အနေနဲ့ လုပ်သား အရေးတကြီး လိုအပ်ပါက အလုပ်သမားဝန်ကြီးဌာနသို့ ဆက်သွယ်နိုင်ပြီး နယ်စပ်ရှိ မြန်မာအလုပ်သမားတွေကို ခေါ်ယူအသုံးပြုဖို့ ပံ့ပိုးပေးနိုင်ကြောင်း၊အခြားနိုင်ငံတွေ က အစားထိုးလုပ်သားများအတွက်ကိုလဲ ဆောင်ရွက်နေဆဲဖြစ်ပြီး တရားဝင် ထုတ်ပြန်ကြေညာပေးသွားမယ်လို့

ထိုင်းအလုပ်သမားဝန်ကြီးဌာနက ထုတ်ပြန်ထားပါတယ်။