စတင်အလုပ်လုပ်ကိုင်စဥ်ကချုပ်ဆိုခဲ့တဲ့စာချုပ်မှာ နှစ်စဥ်အလုပ်သမားတဦးအတွက်ခွင့်ရက် ၁၀ ရက်မယူပါက အဆိုပါကြေး ၁၀ ရက်စာ ၄၈၀၀၀ ပေးဖို့ပါပေမယ့် RainbowTex.Co.Ltd အထည်ချုပ်စက်ရုံဖက်ကသုံးနှစ်တိတိ မသိကျိုးကျွံပြုနေခဲ့တယ်လို့အဆိုပါစက်ရုံအလုပ်သမားတွေကဆိုပါတယ်။
Rainbow Tex Co.Ltd အထည်ချုပ်စက်ရုံဟာရန်ကုန်တိုင်း၊ ရွှေပြည်သာမြို့နယ်၊ ဝါးတရာစက်မှု့ဇုန်ထဲမှာလုပ်ကိုင်နေတဲ့ တရုတ်ပိုင်အထည်ချုပ်စက်ရုံတစ် ခုဖြစ်ပြီးမန်နေဂျာတွေဟာလဲ တရုတ်လူမျိုးတွေဖြစ်တယ်လို့အလုပ်သမားတွေဖက်ကပြောပါတယ်။
"နှစ်ကြေးမရတာသုံးနှစ်ရှိပြီ၊ သွားပြောလဲသူတို့ကခေါင်းဆောင်တွေကိုငွေပေးပြီးစည်းရုံးလိုက်တော့ပြီးသွားရော စက်ရုံဖက်ကတအားနှိမ်တယ်၊ ဘာခံစားခွင့်မှမရဘူး"လို့အဆိုပါစက်ရုံအလုပ်သမားတဦးက MLN ကိုပြောပါတယ်။
ယခင်ကတည်းကနှစ်စဥ်ကြေးမပေးခဲ့တဲ့အဆိုပါစက်ရုံရဲ့ယခုလက်ရှိလုပ်ငန်းခွင်အခြေအနေတွေဟာထင်ထားတာထက်ပိုမိုဆိုးဝါးနေတယ်လို့လဲအလုပ်သမားတွေကဆိုပါတယ်။
အဲ့ဒီ့ထဲမှာအိုတီမဆင်းမနေရပုံစံပြောဆိုတာတွေ၊အောစူပါတွေရဲ့မနက်လင်းတာနဲ့အော်ငေါက်တာတွေ၊ အာဝါဒီးအထည်တွေတိုးတောင်းတာတွေ၊ မဖြစ်နိုင်တဲ့အပ်ထည်အရေအတွက်တွေတိုးတောင်းတာတွေအထိရှိနေတယ်လို့သိရပါတယ်။
"စက်ရုံထဲမှာကဘာမှမရှိတော့ဘူး၊ အလုပ်သမားအခွင့်အရေးကဘာခံစားခွင့်မှမရှိဘူး၊ မနက်မိုးလင်းအလုပ်ထဲက ဆယ်မိနစ်အလိုမှာ ဘဲလ်တီးပြီးထဲကစတာပဲ နေမကောင်းရင်တောင်ပြန်မလွှတ်ချင်ဘူး၊ ထွက်စာတင်မယ်ပြောမှဆူအောင့်ပြီးပေးပြန်တာ"လို့ Rainbow Tex Co.Ltd စက်ရုံလုပ်ငန်းခွင်အခြေအနေနဲ့ပတ်သက်ပြီးအလုပ်သမားတဦးက MLN ကိုပြောပါတယ်။
အထက်ပါစက်ရုံဝန်ထမ်းတွေဟာနှစ်ကြေးကိစ္စကိုအလုပ်ရုံပိုင်ရှင်ဆီမကြာခဏဆိုသလိုသွားရောက်ပြောဆိုဖို့စီစဥ်ခဲ့ပေမယ့်ခေါင်းဆောင်ဆိုသူတွေကကြားထဲကအပြောမခံခဲ့ဘူးလို့ဆိုပါတယ်။
စစ်အာဏာသိမ်းပြီးကာလနောက်ပိုင်း နိုင်ငံတွင်းကအထည်ချုပ်စက်ရုံ၊ အလုပ်ရုံတွေဟာအလုပ်ရှင်အလုပ်သမားနှစ်ဦးသဘောတူစာချုပ်တွေကိုပေါ်ပေါ်တင်တင်ပဲချိုးဖောက်နေပြီး အလုပ်သမားတွေဖက်ကလဲလုပ်သားအခွင့်အရေးချိုးဖောက်ခံရမှု့များစွာရှိနေပါတယ်။
