သမဂ္ဂခေါင်းဆောင်များကိုအလုပ်က ထုတ်ပယ်ခဲ့တဲ့အပြင်နိုင်ငံရေးမကောင်းတာကိုအကြောင်းပြပြီး အလုပ်သမားများအပေါ်ခေါင်းပုံဖြတ်အမြတ်ထုတ်နေတယ်လို့ KAMCAINE Garment အထည်ချုပ်စက်ရုံ အလုပ်သမားတွေကပြောပါတယ်။
အဆိုပါစက်ရုံဟာ တရုတ်လူမျိုးပိုင်ဆိုင်တဲ့စက်ရုံဖြစ်ပြီးရန်ကုန်တိုင်းဒေသကြီး၊ လှိုင်သာယာမြို့နယ်၊ စက်မှု့ဇုန်-၂၊ မက္ခရာမင်းသားကြီးမောင်ပျို့လမ်း မှာလုပ်ကိုင်နေတာဖြစ်ပြီးတော့မှီခိုလုပ်ကိုင်နေတဲ့လုပ်သားဦးရေ-၇၀၀ ဝန်းကျင်ခန့်ရှိပါတယ်။
"အလုပ်သမားတွေမနိုင်တဲ့စံချိန်တွေပေးပြီးခိုင်းတယ် ပြီးရင်စံချိန်မပြည့်ဘူးဆိုတဲ့အကြောင်းပြချက်နဲ့အိုတီအလကားဆင်းခိုင်းတယ် တနဂ်နွေနေ့ဆိုအလကားခိုင်းတာခုကသမဂ္ဂမရှိတော့ပိုဆိုးတယ်နိုင်ငံရေးမကောင်းတာကိုအကြောင်းပြပြီးဒီစက်ရုံကအမြတ်ထုတ်နေတာ"လို့အထက်ပါစက်ရုံမှာ အလုပ်လုပ်ကိုင်နေတဲ့ အလုပ်သမားတဦးကဆိုပါတယ်။
ဒါ့အပြင်လုပ်ငန်းခွင်အတွင်းမှာလည်းစူပါ၊ အောစူပါ၊ များမှအလုပ်သမားများကိုစံချိန်မပြည့်လျှင် အမျိုးသမီးအလုပ်သမားများ အရှက်ရစေရန်ရည်ရွယ်ပြီးဆဲဆိုတာတွေရှိနေသလို နေ့စားသမားများကိုအလုပ်ရှင်မှ သဘောကျပါက (၃)လကျော်မှအတည်ပြုဝန်ထမ်းခန့်ပြီး သဘောမကျသော အလုပ်သမားကိုလည်းဥပဒေမဲ့အလုပ်ကထုတ်ပယ် တာတွေရှိနေတယ်လို့အလုပ်သမားများရဲ့ပြောပြချက်အရသိရပါတယ်။
"ခုဟာကဥပဒေမှာပါတဲ့ခံစားခွင့်ရက်တွေလဲမရဘူး လူမှု့ဖူလုံရေးခံစားခွင့်လဲဘာတခုမှမရဘူး ရက်ပျက်ရင်တစ်သောင်းဖြတ်တယ် ပြီးတော့နောက်ရက်မလာနဲ့အလုပ်ဖြုတ်ပစ်မယ်ဆိုပြီးခြိမ်းခြောက်တယ် အစိုးရရုံးသွားတိုင်တော့လဲသူတို့ကအတူတူပဲဆိုတော့နောက်ဆုံးကိုပဲအ ငြိုးခံရတယ်"လို့ အဆင်မပြေမှုကို ကိုယ်တိုင်ခံစားနေရတဲ့ အလုပ်သမားတဦးကထပ်ပြောပါတယ်။
ယခုလိုစစ်အာဏာသိမ်းမှု့ကိုအခွင့်ကောင်းယူအမြတ်ထုတ်နေတဲ့အတွက် KAMCAINE GARMENTအထည်ချုပ်စက်ရုံကအလုပ်သမားတွေဟာများစွာအခက်တွေ့နေရပြီးတော့ ယခုလက်ရှိအလုပ်သမားတွေဖက်က အိုတီ (အချိန်ပို) အလကားဆင်းရသောနာရီများပြန်လည်တွက်ချက်ပေးရန်၊ ဥပဒေခံစားခွင့်များပေးရန်၊ စူပါ၊ အောစူပါများ လုပ်ငန်းခွင်အတွင်း ဆဲဆိုခြင်းမပြုလုပ်ရန်၊ စံချိန်ကိုအလုပ်သမားချုပ်လုပ်နိုင်သည့်ထက်ပိုမတောင်းဖို့စက်ရုံဖက်ကိုတောင်းဆိုနေကြတယ်လို့ သိရပါတယ်။
KAMCAINE Garment အထည်ချုပ်စက်ရုံဟာ NARVIK အမှတ်တံဆိပ်အထည်များချုပ်လုပ်ပြီးစျေးကွက်ကိုတင်ပို့ရောင်းချနေတဲ့ကုမ္ပဏီတခုလဲဖြစ်ပါတယ်။
