ထိုင်းနိုင်ငံရှိ မြန်မာ၊လာအိုနဲ့ ဗီယမ်နမ် နိုင်ငံသား ရွှေ့ပြောင်းလုပ်သား ၃သိန်းကျော်အတွက် အလုပ်လုပ်ခွင့် ပါမစ် သက်တမ်း တိုးရက်ကို ၂၀၂၆ခုနှစ် မတ်လ ၃၁ရက်အထိ ရက် တိုးမြှင့်ပေးလိုက်တယ်လို့ ထိုင်းနိုင်ငံ၊ အလုပ်သမားဝန်ကြီးဌာနက ဖေဖေါ်ဝါရီ ၂၀ရက်မှာ အတည်ပြုကြေညာပါတယ်။
၎င်းအတည်ပြုချက်ကို ၂၀၂၆ ခုနှစ်အတွက် နိုင်ငံခြားသားအလုပ်အကိုင် စီမံခန့်ခွဲမှုမူဝါဒကော်မတီ (COIMP)ရဲ့ ဒုတိယအကြိမ်မြောက် အစည်း အဝေးတွင် ချမှတ်ခဲ့ခြင်းဖြစ်ကာ အလုပ်သမားဝန်ကြီး မစ္စစ် ထရီနပ်ခ်ျ သီယန်သောင်က သဘာပတိအဖြစ် ဆောင်ရွက်ခဲ့တယ်လို့သိရပါတယ်။
အခုသက်တမ်းတိုးတာဟယ ၂၀၂၅ခုနှစ် နိုဝင်ဘာလကတည်းက ပါမစ်သက်တမ်းတိုးဖို့ လျှောက်ထားဆဲ ဖြစ်တဲ့ အလုပ်သမားတွေ အတွက် ဖြစ်ကာ ကျန်းမာရေးအာမခံစာရွက်စာတမ်းများ တင်သွင်း တာ၊ ကျန်းမာရေးစစ်ဆေးမှုတွေနဲ့ အလုပ်လုပ်ခွင့်ကြေး ဘတ် ၉၀၀ ပေးဆောင်ခြင်းတို့နဲ့ ဆက်စပ်နေတဲ့ အခက်အခဲတွေကို ဖြေရှင်း နိုင်ဖို့ ရည်ရွယ်ခြင်းဖြစ်တယ်လို့ သိရပါတယ်။
၎င်းလုပ်ငန်းစဉ်တွေကို ၂၀၂၆ခုနှစ် ဖေဖေါ်ဝါရီ ၂၄ရက်မှာ အပြီးသတ် လုပ်ဆောင်ရမှာ ဖြစ်ပေမယ့် သက်တမ်းတိုး လုပ်ငန်းစဉ်တွေ ကျန်ရှိနေတဲ့ လုပ်သားတွေ အဆင်ပြေစေဖို့ မတ်လ ၃၁ရက်အထိ အချိန်တိုးပေးလိူက်တယ်လို့ဆိုပါတယ်။
အခုလို သက်တမ်းတိုးပေးလိုက်တဲ့ အတွက် လုပ်ငန်းစဉ်မပြီးသေးဘဲ ကျန်ရှိနေတဲ့ လာအို၊ မြန်မာနဲ့ဗီယက်နမ်နိုင်ငံတို့မှ နိုင်ငံခြားသား ရွှေ့ပြောင်းအလုပ်သမား (၃၇၅,၀၃၈) ဦး တို့ သက်တမ်းတိုး လုပ်ငန်းကိုအဆင်ပြေစွာ လုပ်ဆောင်နိုင်တော့မှာဖြစ်တယ်လို့ သိရပါတယ်။
ထိုင်း အလုပ်သမားဝန်ကြီးဌာနဟာ ကော်မတီအစည်းအဝေးရဲ့ ရလဒ်များကို အစိုးရအဖွဲ့ထံ အတည်ပြုချက်ရယူရန် တင်ပြသွားမှာဖြစ်ပြီး လာအို၊ မြန်မာနှင့် ဗီယက်နမ်နိုင်ငံသားတွေရဲ့ အလုပ်လုပ်ခွင့်ဆိုင်ရာ ကြေညာချက်တစ်စောင်ကိုလည်း အမြန်ဆုံးရေးဆွဲသွားမှာ ဖြစ်တယ်လို့ သိရှိရပါတယ်။
