ထိုင်းနိုင်ငံရောက် ရွှေ့ပြောင်း မြန်မာလုပ်သားတွေ အနေနဲ့ လက်ရှိဖြစ်ပွားနေတဲ့ လူမျိုးရေးပဋိပက္ခ တွေကို မလို လားကြောင်းနဲ့ အေးချမ်းစွာနေထိုင်လိုကြောင်း၊ စည်းကမ်းရှိစွာ ယဉ်ကျေးကြောင်း ပြသတဲ့ အနေနဲ့ ၁၄ရက်ကြာ တိတ်ဆိတ်ငြိမ်သက်စွာ နေထိုင်မယ့် လှုပ်ရှားမှု ပြုလုပ်လျက်ရှိတယ်လို့ မြန်မာအလုပ်သမားအရေးကူညီသူတွေ ထံမှ သိရပါတယ်။
၁၄ရက်တာ လှုပ်ရှားမှု ကို ဇန်နဝါရီ ၂၆ရက်က စတင် ခဲ့တာ ဖြစ်ပြီး မြန်မာရွှေ့ပြောင်း လုပ်သားတွေ အများဆုံးရှိတဲ့ အယုဒယ၊မဟာချိုင်နဲ့ မဲဆောက်မြို့က ရပ်ကွက် တွေ ရှိ မြန်မာလုပ်သားတွေ အများပြားပါဝင်ဆင်နွဲနေတယ်လို့ သိရပါတယ်။
၎င်း လှုပ်ရှားမှုဟာ ဆန္ဒပြမှု သို့မဟုတ် နိုင်ငံရေးလှုံဆော်တာမျိုး မဟုတ်ဘဲထိုင်းရောက် မြန်မာနိုင်ငံသားတွေ အနေနဲ့ လူစည်ကားတဲ့နေရာ တိတ်ဆိတ်တဲ့နေရာတွေမှာ အသံကျယ်လောင်စွာပြောဆိုခြင်းမပြုရန်၊ကွမ်းတံတွေးနဲ့အမှိုက်စွန့်ပစ်ရာမှာ စည်းကမ်းရှိရန်၊ပတ်ဝန်းကျင်ကို စိတ်အနှောက်ယှက်ဖြစ်စေတဲ့ အရာတွေ မပြုလုပ်ရန် ၊ပွဲလမ်းသဘင်သွားလာခြင်း၊သောက်စားမူးယစ်ခြင်း ရန်လိုခြင်းတွေကို ရှောင်ကြဉ်ရန် စတဲ့အချက်တွေပါဝင်တယ်လို့ လှုပ်ရှားမှု ပြုလုပ်ရန် စီစဉ်သူတွေ က နှိုးဆော်ထားပါတယ်။
၁၄ရက်တာ လှုပ်ရှားမှု တွင် အလုပ်သွားခြင်းကဲ့သို့သော မရှိမဖြစ် နေ့စဉ်လုပ်ငန်း ဆောင် တာများကို တော့ ပုံမှန် လုပ်ဆောင်ကျရပြီး အလုပ်ပြီးပါက အိမ်သို့ တန်းပြန်ရန်နှင့် မလိုအပ်ဘဲ အပြင်ထွက်ခြင်း၊ လူစုလူဝေးပြုလုပ်ခြင်းများကို ရှောင်ကြဉ်ကာ ငြိမ်သက်စွာ နေထိုင်ကြရန် ရည်ရွယ်ခြင်းဖြစ်တယ်လို့ သိရပါတယ်။
"နှစ်ပတ်တာ ငြိမ်သက်တိတ်ဆိတ်ခြင်း ဆိုတာ စည်းကမ်းရှိကြောင်း နှိမ့်ချတတ်ကြောင်း ယဉ်ကျေးကြောင်း၊လိမ္မာပါးနပ်စွာနဲ့ဖော်ထုတ်တဲ့ လုပ်ဆောင်ချက်ပါ ဆန္ဒပြတာ၊သပိတ်မှောက်တာ မဟုတ်သလို နိုင်ငံရေးလှုပ်ရှားမှုလဲ မဟုတ်ပါဘူး ရည်ရွယ်ချက်က အေးအေးချမ်းချမ်းနေလိုတာကို ပြသတဲ့ လုပ်ဆောင်ချက်ဖြစ်တယ်"လို့ AAC ကိုရဲမင်း က ပြောပါတယ်။
ယခု လှုပ်ရှား မှု ကြောင့် ထိုင်းနိုင်ငံရှိ ဈေး တွေ လမ်းတွေ နဲ့ နေရာအချို့မှာ လူအသွားအလာ အလွန် နည်းသွား ကာ လှုပ်ရှားမှု ပြုလုပ်တာနဲ့ ပက်သက်ပြီး ထိုင်းနိုင်ငံက အဖွဲ့အစည်းအချို့က ဝေဖန်တာတွေရှိပေမယ့် လှုပ်ရှားမှု ပြုလုပ်ရန် စီစဉ်သူတွေ က ထိုင်းရောက် မြန်မာလုပ်သားတွေ အနေနဲ့ ပြန်လည် တုံပြန် ပြောဆိုတာမျိုး မလုပ်ဘဲ အလုပ်ပုံမှန်ဆင်းဖို့ကိုသာ တိုက်တွန်းထားပါတယ်။
Photo-Ye Min (AAC)
