ထိုင်းနိုင်ငံမှာ အကြောင်း အမျိုးမျိုးနဲ့ ဖမ်းဆီးခံခဲ့ရပြီး ပြစ်ဒဏ်ကျခဲ့ပြီး ဖြစ်တဲ့ မြန်မာအလုပ်သမား ၁၂၇ဦး ကို စက်တင်ဘာ၂၆ရက် နေ့လည်ပိုင်းကမြန်မာပြည်ဘက်သို့ ပြန်လည်ပို့ဆောင်ခဲ့တယ်လို့ ထိုင်းနိုင်ငံလူဝင်မှု့ကြီးကြပ်ရေးနှင့်စစ်ဆေးရေးဌာန ရဲ့ ထုတ်ပြန်ချက်အရ သိရပါတယ်။ 

၎င်းအလုပ်သမားတွေဟာ  ထိုင်းနိုင်ငံတောင်ပိုင်းက အချုပ်တွေမှာ ပြစ်ဒဏ်ကျခံပြီးတဲ့ အတွက်  ထိုင်းအာဏာပိုင်တွေက ရနောင်းမြို့ကနေတစ်ဆင့်ကော့သောင်းဘက်ကိုပြန်လည်ပို့ဆောင်ပေးခဲ့တာ ဖြစ်တယ်လို့ သိရပါတယ်။ 

"" အချုပ်အနှောင်က လွတ်တာတော့ပျော်စရာ ဆိုပေမယ့် ကိုယ့်နေရပ် ကို ချောချောမွေ့မွေ့ပြန်ရောက် ပါစေ လို့ပဲဆုတောင်းပေးနေရတယ် ရှေ့မှာလည်း ဒီဘက်က ပြန်ပို့လိုက်တဲ့ မြန်မာအလုပ်သမားတွေထဲ က​နေအမျိုးသားအသက်လတ်ပိုင်းတွေ စစ်မှုထမ်းဖို့ ခေါ်ခံရတာ တွေရှိတော့ထိုင်းက ဖမ်းတာထက် မိခင်နိုင်ငံပြန်ပို့မှာကို  ထိုင်းရောက်မြန်မာအလုပ်သမားတွေစိတ်ထဲမှာပို စိုးရိမ်နေကြတယ်""လို့ကော့သောင်းရောက်မြန်မာအလုပ်သမားတစ်ဦးကပြောပါတယ်။ 

ထိုင်းနိုင်ငံအတွင်းမှာလည်း အထောက်အထားမဲ့ နိုင်ငံခြားသားရွှေ့ပြောင်း အလုပ်သမားတွေကို ရက်ပေါင်း ၁၂၀ စီမံချက်နဲ့ ဖမ်းဆီးလျက်ရှိရာမှာ လက်ရှိ ရက် ၁၀၀ ကျော် အတွင်း မှာ မြန်မာအလုပ်သား၂သိန်းနီးပါးအဖမ်းခံရတယ်လို့သိရပါတယ်။