မြဝတီ-မဲဆောက် အမှတ်(၁) ချစ်ကြည်ရေးတံတားမှတစ်ဆင့် ထိုင်းနိုင်ငံမဲဆောက်မြို့သို့ Border Passဖြင့်သွားရောက်လိုသူများအနေဖြင့် ဖြေလျှော့မှုတွေပြုလုပ်ထားလို့ နိုင်ငံသားမှတ်ပုံတင်တစ်ခုတည်းသာ လိုအပ်တယ်လို့ သိရပါတယ်။
“အရင်ကတော့ Border Passနဲ့သွားမယ်ဆိုရင် မှတ်ပုံတင်တစ်ခုပဲလိုတယ်။ အရင်လိုကိုဗစ်ကာကွယ်ဆေး သုံးကြိမ်ထိုးထားတဲ့ ကျန်းမာရေးစာရွက်စာတမ်းအထောက်အထားတွေမလိုတော့ဘူး။ နိုင်ငံသားမှတ်ပုံတင်ပါရင် ၀င်လို့ရတယ်။ ”လို့ ထိုင်းရောက်မြန်မာအလုပ်သမားအရေးဆောင်ရွက်သူတစ်ဦးက ဆိုပါတယ်။
ယခင်က မြဝတီမြို့ မြဝတီ-မဲဆောက်ချစ်ကြည်ရေးအမှတ် (၁) တံတားမှ တဆင့် ထိုင်းနိုင်ငံ၊ မဲဆောက်မြို့သို့ ယာယီနယ်စပ်ဖြတ်သန်း ခွင့်လက်မှတ်(Border Pass)နဲ့ သွားရောက်ရာတွင် နိုင်ငံသားမှတ်ပုံတင်နှင့် ကိုဗစ်-၁၉ ရောဂါ ကာကွယ်ဆေး ၃ ကြိမ်ထိုးထားသည့် လက်မှတ်ပါရှိမှသာ သွားရောက်ခွင့်ပြုခဲ့ခြင်းဖြစ်ပေမဲ့ ယခုလဇူလိုင်၁ရက်နေ့ကနေစလို့ နိုင်ငံသားမှတ်ပုံတင်တစ်ခုတည်းဖြင့် ၀င်ရောက်ခွင့်ပြုခဲ့တာလို့ သိရပါတယ်။
ယာယီနယ်စပ်ဖြတ်သန်းခွင့်စာအုပ်ဖြင့် ၀င်ရောက်ကြသူတွေဟာ ထိုင်းနိုင်ငံဘက်အခြမ်းရှိ မဲဆောက်မြို့ နယ်၊ မယ်လမတ်မြို့နယ်နှင့် ဖိုးဖမြို့နယ်အပါအဝင် ၃ မြို့နယ်အတွင်း ၇ ရက် သွားလာလည်ပတ်နေထိုင်ခွင့်ရှိသလို မြန်မာဘက်အခြမ်းကအလုပ်သမားအများစုဟာလည်း မြန်မာနိုင်ငံရဲ့လုပ်အားခနည်းပါးမှုကြောင့် ထိုင်းဘက်အခြမ်းသို့ (Border Pass)ဖြင့် ၀င်ရောက်လုပ်ကိုင်မှုတွေရှိရာ မြန်မာလုပ်ခတစ်နေ့ကျပ်၄၈၀၀ထက် ထိုင်းဘက်အခြမ်းမှာဘတ်၂၀၀ရရှိမှုကြောင့် (Border Pass)ရဲ့သတ်မှတ်ထားတဲ့မြို့နယ်တွေမှာ ၀င်ရောက်လုပ်ကိုင်မှုတွေရှိတယ်လို့ သိရပါတယ်။
အဲဒီလို၀င်ရောက်လုပ်ကိုင်သူတွေနဲ့လည်ပတ်သူတွေဟာ သတ်မှတ်ထားတဲ့၆ညအိပ်၇ရက်တာအတွင်းမှာ သတ်မှတ်နေရာတွေကိုကျော်လွန်၍ သွားလာခွင့်မပြုထားဘူးလို့လည်း သိရပါတယ်။
#MyanmarLabourNews
