ထိုင်းနိုင်ငံမှာ Work Permit နဲ့ အလုပ်လုပ်နေတဲ့ မြန်မာလုပ်သားတွေ တရားဝင် ဆက်နေနိုင်ဖို့အတွက် မည်သူမည်ဝါဖြစ်ကြောင်းသက်သေခံလက်မှတ် CI စာအုပ်အသစ် ထုတ်ပေးခြင်းကို ဖေဖေါ်ဝါရီ ၁၇ ရက်မှ စတင်ပြီး စခန်း၅ခု ဖြင့် ဖွင့်လှစ် ပြုလုပ်ပေးမယ် လို့ ဘန်ကောက်အခြေစိုက် မြန်မာအလုပ်သမားသံအရာရှိရုံးက ဖေဖေါ်ဝါရီ ၁၂ရက်မှာ ထုတ်ပြန်ကြေညာပါတယ်။
CI စာအုပ် ထုတ်ပေးရေးစခန်းတွေကို စမုစခွန်၊ စမုပရာကန်၊ ဆူရတ်ဌာနီ၊ ချင်းမိုင်နဲ့ ချွန်ဘူရီ စတဲ့ မြို့ (၅) မြို့မှာ ဖွင့်လှစ်ပြီး လုပ်ငန်းစဉ်တွေကိုဖေဖေါ်ဝါရီ ၁၇ ရက်က စတင် ဆောင်ရွက်ပေးသွားမယ်လို့ သိရပါတယ်။
CI စာအုပ် ပြုလုပ်ချင်တဲ့ သူတွေ အနေနဲ့ နီးစပ်ရာ 7-Eleven စတိုးဆိုင်တွေမှာ စာအုပ်ဖိုး ၂,၆၇၀ ဘတ် ကို အရင်ပေးသွင်းပြီး မိမိ လုပ်ဆောင်မယ့် CI စခန်း နဲ့ ရက်စွဲကို တစ်ခါတည်း ရွေးချယ်နိုင်ပြီး သတ်မှတ်ရက်မှာ စခန်းကို သွားရောက်ရမှာ ဖြစ်တယ်လို့ ဆိုပါတယ်။
CI စခန်း ကို သွားရောက်တဲ့ အခါ မှာ ကြိုတင်ရက်ချိန်းယူထားတဲ့စာရွက်နဲ့ အလုပ်လုပ်ခွင့် လက်မှတ်(Work permit) စာရွက် တွေကို ယူဆောင်ပြီးသွားရမှာ ဖြစ်သလို စခန်းတွေကိုတော့ အပတ်စဉ် တနင်္လာနေ့တိုင်း နဲ့ သံရုံးရုံးပိတ်ရက်တွေမှာ ပိတ်ထားမှာဖြစ်တာကြောင့် သွားမယ့်ရက်ကို သေချာကြည့်ပြီးမှ ချိန်းဆိုကြဖို့ အသိပေးထားပါတယ်။
ဒါ့အပြင် CI စာအုပ် လျှောက်ထားတာမှာ ၂,၆၇၀ ဘတ် ပဲ ကျသင့်မှာဖြစ်လို့ ပွဲစားတွေနဲ့ ပိုက်ဆံပိုမကုန်အောင် ဂရုစိုက်ကြဖို့ သတိပေးထားပါတယ်။
CIစာအုပ် ဆိုတာဟာ နိုင်ငံကူးလက်မှတ်မရှိတဲ့ ထိုင်းရောက် မြန်မာအလုပ်သမားတွေ အတွက် ခရီးသွားလာ နိုင်တဲ့ လက်မှတ်အဖြစ် ထုတ်ပေးတာ ဖြစ် ပြီး CIစာအုပ်ရှိမှသာ အလုပ်လုပ်ခွင့်ဗီဇာ (Non LA)ကိုထည့်သွင်း၍ ထိုင်းနိုင်ငံအတွင်းတရားဝင် ခရီးသွားလာခွင့်ရရှိမှာဖြစ်ကာ စာအုပ်သက်တမ်းဟာ ၄နှစ် ရှိတယ်လို့သိရပါတယ်။
