ထိုင်းနိုင်ငံတောင်ပိုင်း ဆုန်ခလာပြည်နယ် ဟက်ယိုင်မြို့ရေကြီးနေမှုမှာကျဆင်းသွားခြင်းမရှိဘဲ ရေပိုမိုတိုးလာသောကြောင့် ရေဘေးကြုံတွေ့နေရသောမြန်မာရွှေ့ပြောင်းအလုပ်သမားများအကူအညီလိုအပ်နေကြောင်း ဟက်ယိုင်မြို့နေအလုပ်သမားများမှသိရပါတယ်။
ထိုင်းနိုင်ငံတောင်ပိုင်းတွင် ရက်ပေါင်းများစွာဆက်တိုက်မိုးရွာသွန်းခဲ့သည့်အတွက် ရေကြီးမှုအန္တရာယ်များကြုံတွေ့နေရခြင်းဖြစ်ပါတယ်။
ရေကြီးမှုအန္တရာယ်ကိုအဆိုးဆုံးခံစားနေရသည်မှာဆုန်ခလာပြည်နယ် ဖြစ်ပြီး အဓိကမြို့ဖြစ်သောဟက်ယိုင်မှာရေလျင်မြန်စွာမြင့်တက်နေခြင်းဖြစ်ပါတယ်။
"ကျွန်မတို့စက်ရုံဆိုမိုးစရွာတဲ့နေ့ထဲကရေကြီးတာ။လေးရက်ရှိသွားပြီ။ကယ်ဆယ်ရေးတွေလာကူညီပေးကြပါတယ်။အခုလက်ရှိအချိန်မှာတော့ပင်လယ်ဝနဲ့နီးတဲ့နေရာတွေကရေပြန်မကျသေးဘူး။ဒီမှာအခုအခြေအနေအခက်အခဲအများဆုံးဖြစ်နေတာ ပန်းရံသမားတွေဆောက်လုပ်ရေးလုပ်သားတွေပါ။အများစုသူဌေးတွေကိုယ်လွတ်ရုန်းပြေးကြတယ်။သူတို့တွေကူမဲ့လူသိပ်မရှိဘူး။အကူအညီတွေလိုအပ်နေပါတယ်။ညီမတို့ထက်စာရင် နာရီစင်ဘက်မြေနိမ့်ပိုင်းကလူတွေအကူအညီတွေပိုလိုအပ်ပါတယ်။မြန်မာပရဟိတအဖွဲ့တွေလည်းလာကူညီစေချင်ပါတယ်"လို့ဟက်ယိုင်မြို့ရှိမြန်မာအလုပ်သမား တစ်ဦးမှပြောပါတယ်။
တိုင်နိုင်ငံတောင်ပိုင်းပြည်နယ်၁၀ခုတွင်ရေကြီးနေခြင်းဖြစ်ပြီး လူဦးနှစ်သန်းနီးပါထိခိုက်နေကြောင်း ထိုင်းသဘာဝဘေးအန္တာရာယ်ကာကွယ်လျှော့ချရေးဌာနမှနိုဝင်ဘာ၂၄ရက်မှာသတင်းထုတ်ပြန်ထားပါတယ်။
"ကျွန်တော်ကတော့ဟက်ယိုင်နဲ့မိနစ်၂၀လောက်ဝေးတယ်။ဟက်ယိုင်အဝင်မြို့မှာနေတာပါ။၇ရက်လောက်ရှိပြီမိုးကရွာနေတာ ။မနေ့ညကဆိုမိုးကအရင်ထက်ပိုများတယ်။အခန်းထိရေရောက်တယ်။ဟက်ယိုင်ဘက်ကသူငယ်ချင်းတွေအကုန်လုံးကတော့သူတို့အခန်းတွေကိုမနေ့ကထဲကရေရောက်တယ်ပြောတယ်။မိုးကမတိတ်ဘူးဖြစ်နေတာ။ဆက်တိုက်ရွာနေတာ။တိတ်လည်းနာရီဝက်လောက်ဘဲတိတ်သွားတာ”လို့မြန်မာစက်ရုံအလုပ်သမား ကို လူကြီးမှပြောပါတယ်။
ထိုင်းနိုင်ငံတောင်ပိုင်းရေကြီးမှုများနှင့်ပတ်သက်၍ ထိုင်းဘုရင်မင်းမြတ်မှလည်း ရှိသမျှအင်အားအကုန်သုံးကာ ကယ်ဆယ်ရေးလုပ်ရန်အမိန့်ပေးထားပြီး ထိုင်းတော်ဝင်စစ်တပ်၊ရေတပ်၊လေတပ်နှင် ့ပြည်ထဲရေးတို့ပူးပေါင်းကာ ပြည်သူလူထုကိုကယ်တင်ရန်ညွှန်ကြားထားကြောင်းသိရပါတယ်။
