ထိုင်းနိုင်ငံ စူရတ်ဌာနီခရိုင် ကော့တောင်ကျွန်းအနီး ပင်လယ်ပြင်တွင် မြန်မာနိုင်ငံသားများအပါအဝင် စီးနင်းလိုက်ပါလာတဲ့ ကုန်တင်သင်္ဘော ၃ထပ်ယာဥ်တစ်စီး မီးလောင်မှုဖြစ်ပွားခဲ့တယ်လို့ သိရပါတယ်။ 

"မြန်မာရောထိုင်းရောနိုင်ငံခြားသားရော တစ်ရာကျော်လောက်ပါတယ်ကြားတယ်။ လူတွေဘာမှမဖြစ်သွားဘူး။ ရေထဲခုန်ချတာတွေအသက်လုပြေးရတာဆိုတော့ ဖုန်းနဲ့အထောက်အထားတွေအကုန်ဆုံးရှုံးကုန်တယ်တော့ကြားတယ်"လို့ ထိုင်းရောက်မြန်မာတစ်ဦးကဆိုပါတယ်။

အဆိုပါသင်္ဘောဟာ ဧပြီ ၃ ရက်နေ့ ညနေပိုင်းမှာ စူရတ်ဌာနီမြို့ကနေ စထွက်ခွာလာခဲ့တာဖြစ်ပြီး၊ ကော့ဖငန်းမြို့နယ် လိပ်ကျွန်းကို ဧပြီ၄ရက်နေ့ နေ့လည် ၁ နာရီအချိန် ကမ်းဆိုက်ဖို့ထွက်ခွာလာရာ ကော့ဖငန်းမြို့နယ်လိပ်ကျွန်းကို မရောက်ခင်မှာ မီးလောင်ကျွမ်းမှုဖြစ်ပွားခဲ့တာပါ။

မီးလောင်မှုဖြစ်ပွားတဲ့သင်္ဘောပေါ်မှာတော့ မြန်မာနိုင်ငံသားများအပါအဝင် ထိုင်းနဲ့နိုင်ငံခြားသားများအပါ
ခရီးသွား ၉၇ ဦး၊ လှေဝန်ထမ်း ၁၁ ဦးလိုက်ပါခဲ့ပြီး ကယ်ဆယ်ရေးအဖွဲ့က အားလုံးကို ထိခိုက်မှုမရှိ ကယ်ထုတ်နိုင်ခဲ့ပေမဲ့ သင်္ဘောပေါ်တင်ဆောင်လာတဲ့ကား၊ ဆိုင်ကယ်နှင့်သင်္ဘောထဲ သယ်ဆောင်လာတဲ့ ပစ္စည်းတွေကတော့ ပျက်စီးသွားတယ်လို့ သိရပါတယ်။