တောင်ကိုရီးယား နိုင်ငံရောက် မြန်မာလုပ်သား တစ်ဦးဟာ စက်ရုံ အတွင်း မိမိကိုယ်ကို သတ်သေမှု ဖြစ်ပွားခဲ့တယ်လို့ တောင်ကိုရီးယား ရှိ မြန်မာလုပ်သား အရေး ကူညီသူထံမှ သိရပါတယ်။
ဖြစ်စဉ်မှာ ကိုရီးယား ရှိ အထည်ချုပ်စက်ရုံမှာ အလုပ်လုပ်နေတဲ့ မြန်မာလုပ်သား ကိုသက်ထွေးဇော် ဟာ အလုပ်မဆင်းတာ ၃ရက် ခန့်ရှိနေတဲ့ အတွက် ကိုရီးယား အလုပ်ရှင်ကသေဆုံးသူ ကိုသက်ထွေးဇော်ရဲ့ မြန်မာပြည်ကတည်းက သူငယ်ချင်း ဖြစ်သူ ကိုဝေဖြိုးထွန်း ထံ သွားမေးခဲ့သလို မြန်မာပြည်မှ ကိုသက်ထွေးဇော်ရဲ့ အစ်မ ဖြစ်သူကလဲ မောင်ဖြစ်သူ နဲ့ အဆက်သွယ်မရတာ ၃ရက် ခန့်ရှိသဖြင့် စုံစမ်းပေးဖို့ သေဆုံးသူရဲ့ သူငယ်ချင်းဖြစ်သူ ကိုဝေဖြိုးထွန်း ထံ ဖုန်းဆက်အကူညီတောင်းခဲ့တယ်လို့ သိရပါတယ်။
ဒါကြောင့် ကိုဝေဖြိုးထွန်း က နိဝါန်ရဲစခန်း တွင် ကိုသက်ထွေးဇော် ပျောက်နေကြောင်း လျှောက်ထားခဲ့ ပြီး နောက် ကိုရီးယား ရဲ များက ပျောက်ဆုံးနေတဲ့ ကိုသက်ထွေးဇော် အကြောင်း လိုက်လံ စုံစမ်းခဲ့ရာ ဇန်နဝါရီ ၁၈ရက် ညနေ ၄နာရီ ခန့်မှာ အထည်ချုပ် စက်ရုံ ရဲ့ မြေအောက် ခန်း တွင် ကြိုးဆွဲချ သေဆုံးနေတဲ့ ကိုသက်ထွေး ဇော်ကို တွေ့ရှိခဲ့တယ်လို့ ဆိုပါတယ်။
သေဆုံးသူ မြန်မာလုပ်သားကို တွေ ရှိတဲ့ မြေအောက်ထပ်ဟာ အလုပ်ရှင်နဲ့ အလုပ်သမားတွေ ဆင်းလေ့မရှိတဲ့ နေရာ ဖြစ်ကြောင်း သိရပါတယ်။
သေဆုံးသူ ကိုသက်ထွေးဇော် ဟာ မကွယ်လွန်မီ စိတ်ထိခိုက်မှု တွေရှိကြောင်း မိသားစု တွေမှ မြန်မာပြည် ကို ပြန်လာဖို့ ခေါ်ပေမယ့် ကိုရီးယားမှာနေချင်ကြောင်းပြောကြားတယ်လို့ ကျန်ရစ်သူ မိသားစု ထံမှသိရပါတယ်။
မြန်မာလုပ်သား ကိုသက်ထွေးဇော်ရဲ့ ကျန်ရစ်တဲ့ ရုပ်အလောင်းကို ရဲဝန်ထမ်း တွေက စစ်ဆေးပြီး လိုအပ်ပါက အကြောင်းကြားမယ်လို့ အလုပ်ရှင် ကို ပြောကြားခဲ့ကြောင်းသိရပါတယ်။
ကိုသက်ထွေးဇော်ဟာ အသက်၃၂ နှစ် ခန့်ရှိပြီး မြန်မာပြည် ရန်ကုန်မြို့ ဒဂုံမြို့သစ် အရှေ့ပိုင်းမှာ နေထိုင်ခဲ့သူ ဖြစ်ကြောင်းသိရပါတယ်။
