ပြီးခဲ့တဲ့ ရက်ပိုင်းက လူမှုကွန်ယက် မှာ ဝေဖန်မှုမြင့်တက်ခဲ့တဲ့ မြန်မာ မိန်းကလေးငယ် နေအိမ် အထိ မိန်းမလာတောင်းတဲ့ တရုတ်နိုင်ငံသားနဲ့စကားပြန် တွေ ကို လူကုန်ကူးမှု နဲ့ အရေးယူထားတယ်လို့ လူကုန်ကူးမှုတားဆီးနှိမ်နှင်းရေးရဲတပ်ဖွဲ့ ထံ မှ သိရပါတယ်။
ရန်ကုန်တိုင်းဒေသကြီး ဒလမြို့နယ် မှာ နေထိုင်တဲ့ မိန်းကလေးငယ်မိသားစုထံ တရုတ်နိုင်ငံသားနဲ့စကားပြန် တို့က နေအိမ်အထိ လာရောက်ပြီး လက်ထပ်ထိမ်းမြားစေရန် အလို့ငှာ ဗီဒီယိုရိုက်ကူး ပြီး အွန်လိုင်းပေါ်တွင်လွှင့်တင်ခဲ့ ရာ မှာ လူမှုကွန်ယက် သုံးစွဲ သူတွေ က ၎င်း ဖြစ်စဉ်အပေါ် ဝေဖန်ရှုတ်ချခြင်း တွေ ဖြစ်ပေါ်ခဲ့ကာ လူကုန်ကူးမှု နဲ့ အရေးယူပေးဖို့ တောင်းဆိုသူတွေ များပြားခဲ့ပါတယ်။
ဒါကြောင့် မိသားစု၏ ဘဝရပ်တည်ရန် ခက်ခဲသည့် အခြေအနေပေါ် အခွင့်ကောင်းယူ ပြီး ငွေကြေးနဲ့ ဖြားယောင်းသွေးဆောင်ကာ တရုတ်မယားအဖြစ် လက်ထပ်ထိမ်းမြားစေဖို့ လုပ်ဆောင်ခဲ့တဲ့ အတွက် တရုတ်နိုင်ငံသား Mr.Luo Fei နှင့် အမည်မသိ တရုတ်နိုင်ငံသား တစ်ဦးတို့နဲ့အတူ စကားပြန် အဖြစ် ပူးပေါင်းပြင်ဆင် အားထုတ်ခဲ့တဲ့ မသီတာအောင်၊ အောင်ဇော်ဦး(ခ) ဟာမီဒူလာ တို့ကို ဥပဒေနှင့်အညီ အရေးယူပေးရန် တိုင်တန်းချက်အရ ဖေဖေါ်ဝါရီ ၆ ရက် ညနေပိုင်းက ဒလမြို့မရဲစခန်း (ပ)၂၀/၂၀၂၅၊ လူကုန်ကူးမှုတား ဆီးနှိမ်နင်းရေးဥပဒေပုဒ်မ-၃၅/၄၄ ဖြင့် အမှုဖွင့်လှစ်ခဲ့တယ်လို့ သိရပါတယ်။
၎င်း အမှုမှ တရားခံဖြစ် တဲ့ တရုတ်နိုင်ငံသား Mr.Luo Fei ကို ဖေဖေါ်ဝါရီ ၆ ရက် ညနေ ၅ နာရီ ၄၅ မိနစ် မှာ ရန်ကုန်အပြည်ပြည်ဆိုင်ရာလေဆိပ်ကနေ ထိုင်းနိုင်ငံ၊ သုဝဏ္ဏဘူမိလေဆိပ်သို့ Thai Airway လေကြောင်းလိုင်း နဲ့ ထွက်ခွာရန် ပြင်ဆင် နေချိန်မှာ ရန်ကုန်လေဆိပ်၊ လူဝင်မှုကြီးကြပ်ရေး ကောင်တာသို့ ဝင်ရောက်လာချိန် မှာ အမှတ်(၁၉)လူကုန်ကူးမှုတားဆီးနှိမ်နင်းရေးရဲတပ်ဖွဲ့စု(ရန်ကုန်လေဆိပ်)မှ ပြည်ပထွက်ခွာခွင့်အား တားဆီးခဲ့ တရားခံ တရုတ်နိုင်ငံသား Mr.Luo Feiအား လူကုန်ကူးမှုတား ဆီးနှိမ်နင်းရေးဥပဒေပုဒ်မ-၃၅/၄၄ အမှုဖြင့် ဆက်လက် စစ်ဆေးနိုင်ရန် အမှတ်(၆)လူကုန်ကူးမှုတားဆီးနှိမ်နင်းရေး ရဲတပ်ဖွဲ့စု(ရန်ကုန်)သို့ လွှဲပြောင်းပေးခဲ့တယ်လို့ သိရပါတယ်။
ယခုရက်ပိုင်းတွင် လည်း မြန်မာအမျိုးသမီး တို့ကို ငွေကြေး နဲ့ သွေးဆောင်ဖြားယောင်းကာ တရုတ်မယား အဖြစ် ရောင်းစားခံရတာ တွေ ကို တိုင်ကြား တာတွေ များနေပြီး ဖမ်းမိတဲ့ တရားခံ တွေ ကို နှစ်ရှည်ထောင်ဒဏ်တွေ ချမှတ် လျက်ရှိတယ်လို့ သိရပါတယ်။
