ထိုင်းနိုင်ငံအတွင်း လုပ်ကိုင်နေကြတဲ့အလုပ်သမားတွေကို လာမည့်အောက်တိုဘာလကနေစပြီး အနိမ့်ဆုံးလုပ်ခလစာ ၄၀၀ ဘတ် တိုးပေးဖို့ထိုင်းနိုင်ငံအစိုးရကသတ်မှတ်လိုက်တဲ့အပေါ် စီးပွားရေးလုပ်ငန်းရှင်တွေက ကန့်ကွက်မှုတွေရှိနေတယ်လို့ သိရပါတယ်။
“ ကန့်ကွက်တယ်ရယ်လို့မဟုတ်ပါဘူး။ နိုင်ငံရေးပါတီတွေကနေ တနိုင်ငံလုံးအတိုင်းတာနဲ့ တန်းတူ ဘတ်၄၀၀ ပေးဖို့ဆိုတာကို ကန့်ကွက်တာ။ လုပ်ငန်းရှင်တွေက တစ်နိုင်ငံလုံးတန်းတူမသတ်မှတ်ဘဲ နယ်မြေအလိုက် အလုပ်အကိုင်အလိုက်သတ်မှတ်ပေးဖို့ပြောကြတာ” လို့ထိုင်းနိုင်ငံအတွင်းက မြန်မာအလုပ်သမားတွေကို ကူညီဆောင်ရွက်ပေးနေသူတစ်ဦးက ဆိုပါတယ်။
ထိုင်းနိုင်ငံကအလုပ်သမားတွေရဲ့ အနည်းဆုံးအခကြေးငွေတိုးမြှင့်ပေးဖို့ကို တိုင်းနဲ့ပြည်နယ်အလိုက် ထောက်ပံ့ပို့ဆောင်ရေး လုပ်ငန်း၊ ပင်လယ်စာလုပ်ငန်း၊ ကုန်ပစ္စည်းတင်ပို့ခြင်းလုပ်ငန်း စတဲ့ စီးပွားရေး လုပ်ငန်းအမျိုးအစားတွေအလိုက် လုပ်ငန်းအမျိူးအစားအတော်များများကို ၂ လအတွင်း လေ့လာခဲ့ပြီး တစ်ရက်ကို ဘတ် ၄၀၀ အထိ တိုးမြှင့်ပေးဖို့ ပြည်နယ်အလိုက် တိုးမြင့်သတ်မှတ်ရေးကော်မတီတွေက သုံးသပ်ခဲ့ကာ ထိုင်းနိုင်ငံကအလုပ်သမားတွေကို တစ်ရက် အနည်းဆုံးလုပ်ခ ဘတ် ၄၀၀အထိပေးချေရန်လိုအပ်တယ်လို့ ပြီးခဲ့တဲ့ ဧပြီလ ၁၇ ရက်က ထုတ်ပြန်ခဲ့တာဖြစ်ပြီး အဲ့ဒီအပေါ် ထိုင်းအလုပ်သမားဝန်ကြီးဌာန အမြဲတမ်းအတွင်းဝန် Mr. Pairot Chotikasathien က လက်မှတ်ရေးထိုးခဲ့တာလို့ သိရပါတယ်။
“ ခုကဆိုကြပြောကြတာပဲရှိပါတယ်။ သတ်မှတ်ရက် မရောက်ခင်မှာ ကြိုတင် အစည်းဝေးဆိုတာရှိသေးတယ် အဲ့ဒီအစည်းအဝေးထုတ်ပြန်အတည်ပြုပြီးမှသာ အကြုံး၀င်မှာပါ။ ခုအတိုင်းဆို ဘတ် ၄၀၀ တိုးတာအတည်လို့ပြောလို့မရသေးပါဘူး” လို့ထိုင်းရောက် မြန်မာအလုပ်သမားတစ်ဦးကဆိုပါတယ်။
ဒီလိုမျိုးတစ်နိုင်ငံလုံးအတိုင်းအတာနဲ့ ဘတ်၄၀၀တိုးပေးဖို့ သတ်မှတ်လိုက်တဲ့အပေါ် ထိုင်းနိုင်ငံအတွင်းက လုပ်ငန်းရှင်များက ကန့်ကွက်ကြပြီး ထိုင်းနိုင်ငံအလုပ်သမားဝန်ကြီးထံမှာလည်း လုပ်ငန်းရှင်များက ကန့်ကွက်ကြောင်းလက်မှတ်ထိုးထားပြီး ကန့်ကွက်စာအဖြစ်ပေးပို့ထားတယ်လို့ လည်း သိရပါတယ်။
လက်ရှိ အခြေခံလုပ်အားခက ခရိုင်အလိုက် ၃၂၈ - ၃၅၄ ဘတ်အတွင်းပေးချေနေတာလည်းဖြစ်ပါတယ်။လက်ရှိပေါက်ဈေးအရ ထိုင်းဘတ် ၁ ကျပ်လျင် မြန်မာငွေ ၁၀၇ ကျပ် ဝန်းကျင် ပေါက်ဈေးရှိနေပါတယ်။
အဲ့ဒီလို ဘတ်၄၀၀တိုးမြှင့်မယ်ဆိုတာကြောင့် လက်ရှိထိုင်းမှာ ကုန်စျေးနှုန်းတွေကလည်း တနေ့တခြားမြင့်တက်နေပြီး၊ စက်သုံးဆီစျေးနဲ့အခြားကုန်စျေးနှုတွေကြီးလာတာကြောင့် လုပ်ငန်းရှင်တွေက အကျပ်အတည်းတွေနဲ့ရင်ဆိုင်နေရတဲ့အပြင် အစိုးရက အလုပ်သမားတွေကို လုပ်အားခတိုးမြင့်ပေးဖို့ ချမှတ်လိုက်တဲ့အပေါ် အစိုးရအနေနဲ့ ပြန်လည်စိစစ်ပေးရန်အတွက် အလုပ်သမားဝန်ကြီးထံကို ကန့်ကွက်စာပေးပို့ထားတာဖြစ်တယ်လို့လည်း သိရပါတယ်။
