ထိုင်းနိုင်ငံကို ရောက်ရှိနေတဲ့ မြန်မာ လူငယ် အယောက် ၄၀ ဟာ ဆူညံစွာနေထိုင်တယ်ဆိုပြီး ဒေသခံတွေရဲ့ တိုင်ကြားချက်အရ အာဏာပိုင်တွေကဖမ်းဆီးကာ မြန်မာနိုင်ငံဆီ ပြန်လည် ပို့ဆောင်ဖို့ စီစဥ်နေတယ်လို့ ထိုင်းအခြေအစိုက် အလုပ်သမားအရေး ဆောင်ရွက်နေသူ တဦးက ပြောပါတယ်။
"အရင်က အဲဒီလိုမျိုး ပြန်ပို့တာမရှိဘူး။ ဖမ်းပြီး အရေးယူတာတော့ ရှိတယ်။ အခုက အနေအထားက ဒီလူတွေ က စုဖွဲ့နေပြီး ဟေးလားဝါးလားနဲ့ အသံကျယ်တာ မျိုးတွေ လုပ်ကြတာနဲ့ တူတယ်။ သူများနိုင်အတွင်းထဲမှာ ပတ်ဝန်းကျင် အနှောက်ယှက် ဖြစ်စေမှုဆိုတော့ တရားဝင်ဝင်လာတယ်ဆိုပေမဲ့ အလည်အပတ်လည်း မဟုတ်တော့ ပတ်ဝန်းကျင်က သတင်းပေးတာဖြစ်နိင်တယ်။ ပြန်ပို့တာက နည်းနည်းတော်တယ် ထောင်ထဲပို့ရင် ၁ လ နေရမယ်၊ ဒဏ်ငွေ ၅ထောင် ပတ်ဝန်းကျင်၊ တစ်ပါးသူအား အနှောက်ယှက်ဖြစ်မှုနဲ့ "လို့ အလုပ်သမားရေး ဆောင်ရွက်သူ ကိုစိုင်းက ပြောပါတယ်။
ဖမ်းဆီးခံရတဲ့ မြန်မာနိုင်ငံသားလူငယ် ၄၀ ဟာ တာချီလိတ် အမှတ် (၁) ချစ်ကြည်ရေးတံတားကနေ ဧပြီ ၆ ရက်ကနေ ၈ ရက်အတွင်း ယာယီနေထိုင်ခွင့်လက်မှတ် နဲ့ ထိုင်းနိုင်ငံအတွင်း ဝင်ရောက်လာကြတာဖြစ်ပြီး ချင်းရိုင်ခရိုင် မယ်ဆိုင်မြို့ ရွမ်ဖိုငန်ရွာက နေအိမ်တစ်လုံးကို ငှားရမ်းနေထိုင်နေကြတာလို့ သိရပါတယ်။ အုပ်စုလိုက် ဆူညံနေလို့ အဲ့ဒီရွာ ဒေသခံ ထိုင်းလူမျိုးတွေက ဆူညံလို့ဆိုပြီး တိုင်တန်းခဲ့တာကြောင့် ဖမ်းဆီးခဲ့ပြီး မြန်မာနိုင်ငံဆီ ပြန်ပို့ဖို့ ထိုင်းအာဏာပိုင်တွေက စီစဉ်နေတာလို့ သိရပါတယ်။
ထိုင်းနိုင်ငံမှာ မဲဆောက်၊ ရနောင်း၊ မဲဆိုင်၊ စုရတ်ဌာနီ၊ ဖူးခက်၊ မဟာချိုင်စတဲ့နေရာတွေမှာ မြန်မာနိုင်ငံသား အများအများဆုံး နေထိုင်ကြာတာဖြစ့်ပြီး မြန်မာလုပ်သားတွေအုပ်စုလိုက် ဆောင်းဘောက်သံတွေ ဆူညံလို့ ဖြစ်စေ၊ အရက်စုသောက်ပြီး ရန်ဖြစ်လို့ဖြစ်စေ၊ လင်မယားချင်း အချင်းများလို့ဖြစ်စေ ဆူညံမှုကြောင့် တိုင်ကြားခံရတဲ့ မြန်မာတွေကို အချုပ်ခန်းအတွင်း ရက်အနည်းငယ်ထိန်းသိမ်းထားပြီး ဒဏ်ငွေရိုက် ပြန်လည် လွှတ်ပေးလေ့ရှိပေမဲ့ အခုလို မြန်မာနိုင်ငံဆီ ပြန်ပို့တာဟာ ပထမဦးဆုံးအကြိမ်ဖြစ်တယ်လို့သိရပါတယ်။
ထိုင်းနိုင်ငံအတွင်း ရောက်ရှိနေတဲ့ မြန်မာလူငယ်တွေနဲ့ အမှားတစ်ခု ကျူးလွန်တာကြာင့် ပြည်တွင်း ပြန်လည်ပို့ဆောင်ခံရနိုင်တဲ့ အခြေအနေတွေကို အထူးသတိပြု ဖို့လည်း အလုပ်သမားအရေး ကူညီဆောင်ရွက်ပေးနေသူတွေက သတိပေးထားပါတယ်။
