စုယုအိ အထည်ချုပ် စက်ရုံက အလုပ်ဝင်ချိန် ရှိပေမဲ့ အလုပ်ပြန်ချိန် ပုံသေမရှိဘဲ အချိန်ပိုတွေ လုပ်ကိုင် ခိုင်းနေတယ်လို့ အလုပ်သမားတွေက ပြောပါတယ်။နေ့စဉ် အချိန်ပိုတွေအပြင် ပုံမှန်အလုပ်ပိတ်နဲ့ တခြား ပိတ်ရက်တွေပါ စက်ရုံဘက်က လုပ်ကိုင်ခိုင်းနေတယ်လို့ အလုပ်သမားတွေက ပြောပါတယ်။
“ ညနေ အလုပ်ဆင်းချိန်က ပုံမှန်မရှိဘူး၊ အချိန်ပိုကို ပုံစံမျိုးစုံ ဆင်းရတယ်။ ည ၆ ခွဲ ဆင်းလိုက် ၇ ခွဲ ဆင်းလိုက်နဲ့ ။ စနေနေ့ဆို ည ၇ နာရီမှ ဆင်းရတာတွေရှိတဘ်။ တနင်္ဂနွေနဲ့ တခြားရုံးပိတ်ရက်ဆိုလည်း မပိတ်ဘူး ၊ ပိတ်ရက် မရှိ ဆင်းနေရတာ” လို့ ပြောပါတယ်။
အချိန်ပို အော်လင်းဆင်းပြီး မနက် (၂) နာရီမှ စက်ရုံက ကြိုပို့ ပတ်ကားနဲ့ နီးစပ်ရာကို ပို့ပေးလို့ အမျိုးသမီး အလုပ်သမားတွေမှာ လုံခြုံရေး အခက်အခဲတွေနဲ့ ကြုံနေရတယ်လို့ အလုပ်သမားတွေက ပြောပါတယ်။
“ကြိုပို့စီးနေကြ မှတ်တိုင်ကို ပို့ပေးတာ မဟုတ်ဘူး၊ နီးစပ်ရာ လမ်းစုံ၊ လမ်းခွတွေမှာ ချပေးထားခဲ့တာ။ မိသားစုဝင်တွေလည်း မကြိုခိုင်းရဲဘူး ။ ပေါ်တာဆွဲနေတဲ့ကြားက အဆင်ပြေသလို ပြန်ရတယ်။ ကြောက်လည်း ကြောက် ၊ လုံခြုံမှုမရှိဘူးလို့ ခံစားရတယ်။” လို့ ပြောပါတယ်။
အချိန်ပို မဆင်းပါက ခေါင်းဆောင်းတွေရဲ့ အပြောအဆိုခံရသလို အငြိုးအတေးထားခံရလို့ ဆန္ဒမပါဘဲ လုပ်ကိုင်နေရတယ်လို့ အလုပ်သမား တွေကပြောပါတယ်။
“ စားဝတ်နေရေးအတွက် လက်ရှိအနေအထား အလုပ်ရ လုပ်နေရတာ၊ မနက်ဆို အလုပ်မီဖို့ သွားရတယ်။ နားချိန် အိပ်ချိန်ကို မရှိသလောက် ဖြစ်နေတာ။ ခွင့်လည်း ဘာခွင့်မှမပေးဘူး၊ ဂိတ်ပတ်စ်လည်း မရဘူး ” လို့ ပြောပါတယ်။
အလုပ်ဆင်းချိန်မှာ စက် သန့်ရှင့်ရေး လုပ်ကိုင်ခိုင်းလို့ နေအိမ်အပြန်မှာ အမြဲနောက်ကျရတယ်လို့လည်း အလုပ်သမားတွေက ပြောပါတယ်။
“ အလုပ်ချိန်ပြည့်မှ သန့်ရှင်းရေးလုပ်ခိုင်းတာ၊ အနည်းဆုံး နာရီဝက်လုပ်ပြီးမှ အိမ်ပြန်ရတယ်။ တကယ်ဆို ၁၅ မီနစ်ကြိုလုပ် ရတာကို အခုက အလုပ်ချိန်ထိမှာစိုးတာနဲ့ အလုပ်သမားတွေကတော့ နောက်ကျကြတယ်။ “ လို့ အလုပ်သမားတွေက ပြောပါတယ်။
လက်ရှိ စက်ရုံဘက်က ဒေးကြေး ၅၈၀၀ ကျပ်၊ ရက်မှန်ကြေး ၂၀,၀၀၀ ကျပ်၊ အချိန်ပို တစ်နာရီ ၁၈၀၀ ကျပ် တွက်ချက်ပေးနေဆဲ ဖြစ်ပြီး ဝန်ကြီးဌာန ညွှန်ကြားထားသလို့ ဒေးကြေးမှာ ပေါင်း မပေးဘူးလို့ အလုပ်သမားတွေက ပြောပါတယ်။
“ဒေးကြေးမှာ စက်ရုံဘက်က အခုအထိ ထည့်မပေးထားပါဘူး။ ဒေးကြေးကို ၅၈၀၀ ကျပ်နဲ့ ပဲ ပေးနေတာ။ အခြားစက်ရုံတွေလို့ ကျွမ်းကျင်ကြေး၊ အထည်ကြေးဆိုတာလည်း ပေးတာမရှိပါဘူး။ စက်ရုံဘက်က ခေါင်းပုံဖြတ် အမြတ်ထုတ်နေတာ” လို့ ပြောပါတယ်။
လုပ်ငန်းခွင် ရေသန့်ပြတ်ချိန်မှာ လက်ဆေးပိုက်က ရေကို သောက်ရသလို ထမင်းစားခုံတွေကလည်း လုံလောက် မှု မရှိဘူးလို့ အလုပ်သမားတွေက ပြောပါတယ်။ လုပ်ငန်းခွင်ညှိနှိုင်းရေးကော်မတီ ဖွဲ့ထားတယ်လို့ ပြောပေမဲ့ အဖွဲ့ဝင် ဘယ်သူဆိုတာ မသိရဘူးလို့ အလုပ်သမားတွေက ပြောပါတယ် ။
“ရှိတယ်တော့ကြားတယ် ဘယ်သူတွေမှန်းလဲမသိရဘူး၊ အခု အခြေအနေကို ဖြေရှင်းမဲ့သူလည်း မရှိပါဘူး” လို့ အလုပ်သမားတွေက ပြောထားပါတယ်။
စုယုအိ အထည်ချူပ် စက်ရုံက ရန်ကုန်မြို့၊ မင်္ဂလာဒုံမြို့နယ်၊ ရွှေနံ့သာကျေးရွာ B လမ်းဆုံ အနီးမှာ ရှိပြီ အလုပ်သမား (၈၀၀) ကျော် လုပ်ကိုင်နေတယ်လို့ သိရပါတယ်။ စက်ရုံပိုင်ရှင်မှာ ကိုရီယား နိုင်ငံသားဖြစ်ပြီး TRIPLE , TRIPLE VALUE တံဆိပ်အထည်တွေ ချုပ်လုပ်နေတယ်လို့ အလုပ်သမားတွေက ပြောထားပါတယ်။
