မြန်မာပြည်တွင်းက အလုပ်သမားတွေဟာ ကိုဗစ်-၁၉ ကပ်ဘေးနဲ့ ၂၀၂၁ခုနှစ် စစ်တပ်ကအာဏာလွှဲပြောင်းယူတဲ့ နောက်ဆက်တွဲတွေကြောင့် စိန်ခေါ်မှုအခက်အခဲများစွာကို ရင်ဆိုင်နေရတယ်လို့ အပြည်ပြည်ဆိုင်ရာ အလုပ်သမားရေးရာအဖွဲ့ (ILO) က ဇူလိုင်လ (၂၇) ရက်မှာ ထုတ်ပြန်ခဲ့ပါတယ်။
ILO (မြန်မာ)ရဲ့ ဆက်သွယ်ညှိနှိုင်းရေးအရာရှိ Mr. Donglin LI က “အလုပ်သမားအများအပြားက မရေရာတဲ့အနာဂတ်ကို ရင်ဆိုင်နေရတယ်။ ပြီးတော့ အလုပ်အကိုင်အခြေအနေတွေ မခိုင်မာတော့တဲ့အတွက် စိန်ခေါ်မှုတွေကတော့ ရှိနေဆဲဖြစ်တယ်” လို့ ဆိုပါတယ်။
ပြည်တွင်းစီးပွားရေးဟာ တစ်ချို့ကဏ္ဍတွေမှာ လတ်တလော ပြန်လည်ကောင်းမွန်လာပြီး အလုပ်အကိုင်အခွင့်အလမ်းတွေ ပြန်တိုးလာပေမယ့် တိုးပွားလာတဲ့ အလုပ်လက်မဲ့ဦးရေနှုန်းကို လိုက်မမှီသေးဘူးလို့ ထုတ်ပြန်ချက်မှာ ပါရှိပါတယ်။
“ကိုဗစ်ကာလကတည်းက ကုမ္ပဏီတွေမှာလူလျှော့တာတွေ၊ လစာအပြည့် မပေးတာတွေ ရှိနေတာပါ။ အခုချိန်ကျတော့ လုပ်ခလစာကို ပညာကြေးနဲ့တန်အောင် မပေးချင်ကြတော့ဘူး။ ပေးတာက သုံးသိန်းလောက်ကို လူနှစ်ယောက်စာ လုပ်ရမယ့်ဟာလောက် ခေါ်ကြတယ်။ နောက်ပြီး ရတဲ့လစာလေးနဲ့ အခုခေတ်ကုန်ဈေးနှုန်းနဲ့ ဘယ်လိုမှအဆင်မပြေတော့ဘူး”လို့ ပုဂ္ဂလိက ဝန်ထမ်းတစ်ဦးက ပြောပါတယ်။
စစ်အာဏာသိမ်းပြီးနောက်ပိုင်းမှာ ပြည်တွင်းက ကုမ္ပဏီတွေ၊ စက်ရုံတွေမှာ အလုပ်သမား အခွင့်အရေး ချိုးဖောက်တာတွေ ရှိနေပြီး ဥပဒေအရ အရေးယူဆောင်ရွက်တာ မျိုးတွေ အားနည်းနေပြီး ဘက်ပေါင်းစုံကနေ ရိုက်ခတ်မှုတွေကြောင့် အလုပ်လုပ်နေရင်းနဲ့ စားဝတ်နေရေး အခက်အခဲတွေ ရင်ဆိုင်နေရ တယ်လို့ အလုပ်သမားအရေး ဆောင်ရွက်သူတွေဆီက သိရပါတယ်။
#MyanmarLabourNews
ဓါတ်ပုံ-ပုံဟောင်း
