စစ်ကောင်စီရဲ့ စစ်မူထမ်းဥပဒေအရ ပြည်သူ့စစ်မှုထမ်းဆောင်ဖို့အတွက် အမျိုးသမီးများကို စာရင်းကောက်ယူနေခြင်း မရှိသေးဘူးလို့ စစ်ကောင်စီက သတင်းထုတ်ပြန်ကြေငြာလိုက်ပေမဲ့ ရပ်ကွက်အချို့မှာတော့ အမျိုးသမီးဆင့်ခေါ်မှုတွေအထိပါရှိလာတယ်လို့ သိရပါတယ်။
"သူတို့ကမဟုတ်ဘူးဆိုပြီးသတင်းထုတ်ပြန်တာ တို့သင်္ဃန်းကျွန်းမှာဆိုရင် ဆင့်ခေါ်တာတွေအထိရှိနေပြီ။ ဆင့်ခေါ်စာနဲ့ကိုခေါ်တာ။ စစ်မှုထမ်းကိစ္စအတွက်ဆိုပြီးတောင် စာမှာပါသေး။ သူကတော့ဆွေးနွေးညှိနှိုင်းဖို့ဆိုပြီး အစည်းအဝေးခေါ်တာ။ ကောင်မလေးက စက်ရုံမှာလုပ်တာမဟုတ်ဘူး။ အပြင်ကအလုပ်ကုမ္ပဏီလည်းမဟုတ်ဘူး။ ဘယ်လိုဖြစ်မယ်တော့မသိဘူး"လို့ သင်္ဃန်းကျွန်းမြို့နယ်မှ ရပ်ကွက်နေပြည်သူတစ်ဦးကဆိုပါတယ်။
ဇန္နဝါရီ ၂၉ရက်နေ့က စစ်ကောင်စီရဲ့သတင်းထုတ်ပြန်ရေးအဖွဲ့က ပြည်သူ့စစ်မှုထမ်းဆောင်ရန်အတွက် အမျိုးသမီးများကို စာရင်းကောက်ယူမှုတွေရှိနေတာနဲ့ပတ်သက်ပြီး သတင်းမီဒီယာအချို့ရဲ့ မေးမြန်းမှုတွေ အပေါ် စစ်ကောင်စီရဲ့ သတင်းထုတ်ပြန်ရေးအဖွဲ့က ရှင်းလင်းထုတ်ပြန်ခဲ့ပါတယ်။
အဆိုပါရှင်းလင်းချက်အရ ပြည်သူ့စစ်မှုထမ်းဆောင်ရန်အတွက် အမျိုးသမီးများကို စာရင်းကောက်ယူနေခြင်း မရှိသေးကြောင်းဘူးလို့ ငြင်းဆိုလိုက်တာဖြစ်ပေမဲ့ ရန်ကုန်တိုင်းဒေသကြီး ကော့မှူးမြို့နယ်နှင့် မှော်ဘီမြို့နယ်၊ ပုဇွန်တောင်မြို့နယ်၊ဒဂုံမြို့သစ်အရှေ့ပိုင်းမြို့နယ်၊ သင်္ဃန်းကျွန်းမြို့နယ်၊ လှိုင်သာယာနဲ့ ရွှေပြည်သာ စတဲ့မြို့နယ်တွေက ရပ်ကွက်အချို့မှာတော့ အမျိုးသမီးများ၏ စာရင်းများ ပါရှိနေသလို ရပ်ကွက်ရုံးသို့ဆင့်ခေါ်မှုတွေပါရှိလာတယ်လို့ Myanmar Labour News မှစုံစမ်းသိရှိရသလို စစ်ကောင်စီလက်အောက်ခံ သတင်းမီဒီယာအချို့ကပါ စုံစမ်းဖော်ပြထားလာတာတွေ့ရပါတယ်။
မြို့နယ်အချို့တွင် စစ်မှုထမ်းရန် အမျိုးသမီး စာရင်းအချို့ ရပ်ကွက်ရုံးသို့ ရောက်ရှိနေသည်ဟူသော ပြောဆိုမှုအချို့လည်း ရှိနေသလို စစ်မူထမ်းအတွက်အစည်းဝေးဖိတ်ကြားခြင်းဟူသောဆင့်ခေါ်စာများနဲ့ စစ်မူထမ်းဖို့အတွက် အမျိုးသမီးပါအလှည့်ရောက်ရှိလာပြီဖြစ်လို့ သန်ခေါင်စာရင်းမိတ္တူတောင်းယူတာရှိသလို နောက်ဆုံးတိုင်ကြားထားတဲ့ ဧည့်စာရင်းမိတ္တူတောင်းယူတာတွေလည်းရှိနေတာဖြစ်တယ်လို့ စုံစမ်းသိရှိရပါတယ်။
စစ်ကောင်စီကတော့ မီဒီယာ တွေက ပြည်သူ့စစ်မှုထမ်း ဆောင်ခြင်းနှင့်ပတ်သက်ပြီး အများပြည်သူ စိုးရိမ်ပူပန်မှုများဖြစ်ပေါ်စေဖို့ ကောလာဟလသတင်း များဖြင့်ဝါဒဖြန့်လှုံ့ဆော်နေခြင်းသာဖြစ်တယ်လို့ ရှင်းလင်းချက်မှာ ထည့်သွင်းတုံ့ပြန်ထားတာဖြစ်ပါတယ်။
