ရန်ကုန်တိုင်း၊ ရွှေပြည်သာမြို့၊ ၁၈ ရပ်ကွက်၊ ရေပြာလမ်း ၊အမှတ် - ရှိ Kingsrich (MYANMAR) Fashion Limited မှာ၀င်ရောက်လုပ်ကိုင်နေကြတဲ့ အလုပ်သမားတွေဟာ စားဝတ်နေရေးအခက်အခဲတွေ ကြုံနေရလို့ ဒေးကြေးတိုးပေးဖို့ စက်ရုံအတွင်းဆန္ဒပြတောင်းဆိုမှုပြုလုပ်ခဲ့တဲ့အပေါ် အလုပ်ရှင်ဘက်က တောင်းဆိုမှုကိုလိုက်လျောတယ်လို့ သဘောတူခဲ့ပေမဲ့ အမှန်တကယ် လုပ်ခတိုးပေးခြင်းမရှိဘူးလို့ သိရပါတယ်။
အဆိုပါစက်ရုံတစ်ရုံလုံးကအလုပ်သမားအားလုံးဟာ ပြီးခဲ့တဲ့ဇွန် ၁၀ ရက်နေ့က အခြေခံလစာတိုးပေးဖို့အတွက် အလုပ်ရပ်ပြီး ဆန္ဒပြတောင်းဆိုခဲ့ကြတာဖြစ်ရာ အလုပ်ရှင်က ဒေးကြေး ၇၅၀၀ ကျပ် OT ၂၀၀၀ ကျပ်နဲ့သဘောတူညီခဲ့တယ်လို့သိရပြီး စာချုပ်ထွက်မလာခဲ့ဘဲ သဘောတူညီခဲ့ကြတာဖြစ်ပါတယ်။
"ခုထိတော့ဘာမှမကြားရသေးဘူး။ ဒေးကြေး ၇၅၀၀ အချိန်ပိုကြေး၂၀၀၀ ပေးမယ်လို့သဘောတူတယ်ဆိုပြီး စာချုပ်လည်းမချုပ်ဘူး။ ဒေးကြေးမတိုးပေးရဲဘူးတဲ့။ ထောက်ပံ့ကြေးတဲ့။ အချိန်ပိုကပိတ်ရက်မှာဆင်းရတယ်ဆိုရင် ၂၀၀၀ နဲ့တဲ့။ အဲ့တာကိုလက်မှတ်လိုက်ထိုးခိုင်းတာ။ ထိုးတဲ့သူလည်းရှိသလို မထိုးတဲ့သူလည်းရှိတယ်"လို့ အလုပ်သမားနဲ့နီးစပ်သူကဆိုပါတယ်။
နောက်နေ့မှာတော့ ဒေးကြေးတိုးလာတာမဟုတ်ဘဲ ထောက်ပံ့ကြေး အဖြစ် လက်မှတ်လိုက်ထိုး ခိုင်းတာကြောင့် အလုပ်သမားအချို့လက်မှတ်ထိုးတာရှိသလို လက်မှတ်မထိုးတဲ့အလုပ်သမားတွေလည်းရှိနေတယ်လို့အလုပ်သမားများထံမှ သိရှိရပါတယ်။
အဆိုပါစက်ရုံဟာ H&M အမှတ်တံဆိပ်ချုပ်နေတဲ့ အလုပ်သမားထောင်ကျော်ရှိတဲ့ စက်ရုံတစ်ရုံဖြစ်ပါတယ်။
အဆိုပါစက်ရုံမှာ အလုပ်သမားသမဂ္ဂမရှိဘဲ အလုပ်သမားများသာ စုပေါင်း ဆန္ဒပြတောင်းဆိုခဲ့ကြတာဖြစ်လို့ ဦးဆောင်ညှိနှိုင်းဖို့ အလုပ်သမားသမဂ္ဂခေါင်းဆောင်မရှိတဲ့အပေါ်အခွင့်ကောင်းယူကာ အလုပ်သမားတွေရဲ့တောင်းဆိုမှုများကို အလုပ်ရှင်ကတောင်းဆိုချက်လိုက်လျောတယ်လို့ဆိုခဲ့ပြီးမှ စာချုပ်မချုပ်ဆိုဘဲ ယခုလိုလုပ်တာဖြစ်တယ်လို့ အလုပ်သမားတွေကပြောပါတယ်။
အဲ့ဒီလိုတောင်းဆိုမှုတွေပြုလုပ်ခဲ့ပြီးနောက် အလုပ်သမားတွေဟာ စက်ရုံအတွင်းမှာ စောင့်ကြည့်ခံရတာရှိသလို စက်လိုင်းအတွင်းစည်းကမ်းတင်းကြပ်မှုတွေကိုပါ လုပ်ဆောင်ခံနေရတာတွေရှိနေပြီလို့ ဆိုပါတယ်။
