ထိုင်းနိုင်ငံ၊ တာ့ခ်ပြည်နယ်၊ မဲဆောက်ခရိုင်မှာ ဂျပန်နိုင်ငံသား လေးဦးကို  ထိုင်း-မြန်မာနယ်စပ် တရားမဝင် ဖြတ်ကျော်ဝင်ရောက်မှုနဲ့ ထိုင်းရဲတပ်ဖွဲ့က ဖမ်းဆီးခဲ့တယ်လို့ Bangkok Post  မှာ ဖော်ပြထားပါတယ်။ ပြီးခဲ့တဲ့ ဖေဖော်ဝါရီ ၇ ရက် သောကြာနေ့က ဖမ်းဆီးခဲ့တာလို့ ဖော်ပြထားပြီး မြန်မာနိုင်ငံ၊ မြဝတီမြို့ဘက်ကနေ ထိုင်းဘက်ကို ဖြတ်ကျော်လာစဉ် ဖမ်းဆီးခဲ့တာလို့ ရဲတပ်ဖွဲ့က ပြောဆိုပါတယ်။ 

ဖမ်းဆီးထားတဲ့ ဂျပန်နိုင်ငံသားတွေက မဲဆောက်ကို ဗန်ကားနဲ့ သွားရောက်ခဲ့ပြီး ဇန်နဝါရီ ၃၁ ရက်က ဟိုတယ် တစ်ခုမှာ တည်းခိုခဲ့တယ်လို့ ရဲတပ်ဖွဲ့က ပြောဆိုပါတယ်။  ဖေဖော်ဝါရီ ၁ ရက်မှာ အဲ့ဒီဟိုတယ်ကနေ ထိုင်း-မြန်မာ ချစ်ကြည်ရေးတံတား အမှတ် ၁ အနီးက Rim Moei စျေးကို သွားရောက်ခဲ့တာလို့ သိရပါတယ်။  

အဲဒီနေ့ မနက် ၁၁ နာရီမှာ မြန်မာနိုင်ငံသားတစ်ဦးက ဂျပန်အမျိုးသားတွေရဲ့ ခရီးဆောင်အိတ်တွေကို ဟိုတယ် ကနေ ယူပြီး ထိုင်းအကောက်ခွန်ဂိတ်ကို မဖြတ်သန်းဘဲ မြန်မာနိုင်ငံဆီ သယ်ယူသွားခဲ့တယ်လို့လည်း ထိုင်းရဲတပ်ဖွဲ့က ဆိုပါတယ်။ 

ဖမ်းဆီးထားတဲ့ ဂျပန်အမျိုးသားတွေက နယ်စပ်ကို တရားမဝင် ဖြတ်ကျော်ခဲ့ပြီး ဂျပန်နိုင်ငံသားတွေကို ပစ်မှတ် ထားတဲ့ နိုင်ငံဖြတ်ကျော် ရာဇဝတ်မှု ဒါမဟုတ် ဖုန်းခေါ်ဆိုမှု လိမ်လည်ဂိုဏ်းတွေမှာ ပါဝင်ခဲ့ဖွယ်ရှိတယ်လို့ ထိုင်းရဲတပ်ဖွဲ့က ယူဆထားပါတယ်။ 

အမျိုးသားလေးဦးရဲ့ ရာဇဝတ်မှတ်တမ်းတွေကို သံရုံးကို ဆက်သွယ်ပြီးစစ်ဆေးရမှာ မူးယစ်ဆေးဝါးနဲ့ ဆက်နွယ်တဲ့ ပြစ်မှု ဖမ်းဝရမ်းတွေ ရှိနေတယ်ဆိုတာကို  အတည်ပြုထားတယ်လို့ ဆိုပါတယ်။ 

တရုတ်နိုင်ငံ အပါအဝင် နိုင်ငံတကာ စိုးရိမ်မှုတွေ  မြင့်တက်နေတာကြောင့် ထိုင်းရဲတပ်ဖွဲ့နှင့် ဒေသဆိုင်ရာ အာဏာပိုင်တွေက ထိုင်း-မြန်မာနယ်စပ်က တရားမဝင်ထွက်နိုင်တဲ့လမ်းကြောင်းတွေကို  ပိုမို ကင်းလှည့် စောင့်ကြည့်မှု တွေ တိုးမြှင်လုပ်ဆောင်ဖို့ ကြိုးပမ်းနေတယ်လို့လည်း ဆိုပါတယ်။ 

ဂျပန်အမျိုးသားတွေကို မဲဆောက် လူဝင်မှုကြီးကြပ်ရေးရုံးမှာ ထိန်းသိမ်းထားပြီး တရားရေးဆိုင်ရာ လုပ်ထုံး လုပ်နည်းတွေအတွက် ဘန်ကောက်မြို့လူဝင်မှုကြီးကြပ်ရေး ထိန်းသိမ်းရေးစခန်းသို့ ပို့ဆောင်ဖို့ စိစဉ်ထားတယ်လို့ Bangkok Post မှာ သတင်းဖော်ပြထားပါတယ်။ 

Ref / Photo ; Bangkok Post  
 #MyanmarLabourNews 
 #MNK