အလုပ်သမားတွေ၊ လက်လုပ်လက်စားပြည်သူတွေကို ပစ်မှတ်ထားတဲ့ ငွေကြေးလိမ်လည်မှုပုံစံသစ် ကျားဖြန့်လုပ်ငန်းတွေ ပေါ်ပေါက်နေတယ်လို့ ကိုယ်တိုင်ကြုံတွေ့ရသူ တဦးက ပြောပါတယ်။ အဲ့ဒီ လိမ်လည်မှုပုံစံ ပုဂ္ဂိုလ်ရေး
အချက်အလက်တွေကို အသုံးပြုပြီး လိမ်လည်မှု ပြုလုပ်တာလို့ သိရပါတယ်။
“ ဘဏ်ဝန်ထမ်းအယောင်ဆောင်ပြီး အလုပ်သမားတွေနဲ့ လူစည်ကားရာနေရာတွေမှာ (Kpay) သို့မဟုတ် KBZ ဘဏ်အကောင့်တွေ အခမဲ့ဖွင့်ပေးဆိုပြီး စပြောတယ်။ အဲ့လို အကောင့်ဖွင့်တာနဲ့ ငွေကြေး နည်းနည်းပေးတယ်။ ကိုယ်ကလည်း တကယ်ထင်ပြီး မှတ်ပုံတင်နဲ့ သူရဲ့ ဖုန်းကတ်နဲ့ အကောင့်ဖွင့်ပေးလိုက်တယ်” လို့ ပြောပါတယ်။
လိမ်လည်သူရဲ့ ဖုန်းနံပါတ်နဲ့ မိမိ မှတ်ပုံတင်ပိုင်ရှင် အမည်ဖြင့် ဖွင့်လှစ်ထား ဘဏ်အကောင့်ကို အသုံးပြုပြီး တရားမဝင်ငွေကြေးလိမ်လည်မှုတွေ လုပ်ဆောင်ကြတာ ဖြစ်တယ်လို့ ကိုယ်တိုင်ကြုံတွေ့ ခဲ့သူတဦးက ပြောပါတယ်။
ဒီလို လိမ်လည်တဲ့ ပုံစံ ပုဂ္ဂိုလ်ရေးဆိုင်ရာ အချက်အလက်တွေကို အသုံးချပြီး ငွေကြေး အလွဲသုံးစား ပြုလုပ်တာ ဖြစ်လို့ ကြီးမားသော ဆိုးကျိုးများ ဖြစ်ပေါ်စေနိုင်တယ်လို့ ဥပဒေ ကျွမ်းကျင်သူတွေက ပြောပါတယ်။
“အများစုက ချက်ချင်းရရှိမည့် ငွေကြေးအနည်းငယ်ကိုသာကြည့်တာ၊ ဖြစ်လာနိုင်သည့် အန္တရာယ်ကို သတိမမူမိကြဘူး၊ မသိကြဘူး။ ဒါနဲ့ အလွယ်တကူ လုပ်ပေးလိုက်ကြတာ” လို့ ပြောပါတယ်။
လိမ်လည်သူတွေရဲ့ လုပ်ရပ်ကြောင့် ငွေကြေးဆုံးရှုံးခဲ့ရသူတွေ တရားစွဲဆိုလာပါက လိမ်လည်သူတွေ မဟုတ်ဘဲ အကောင့်ဖွင့်ထားတဲ့ မှတ်ပုံတင်ပိုင်ရှင်ကသာ တရားရင်ဆိုင်ရမှာ လို့ ဆိုပါတယ်။ ဥပဒေအရ တရားစွဲခံရပါက ထောင်ဒဏ်အထိ ကျခံရနိုင်တယ်လို့ ဥပဒေရေးရာ ကျွမ်းကျင်သူတွေက ပြောဆိုထားပါတယ်။
“လက်ရှိမှာကို ဒီလို လိမ်လည်မှုကြောင့် တရားရင်ဆိုင်နေရသူတွေ ရှိနေတာ။ ဒါကြောင့် အလုပ်သမားတွေရော၊ ပြည်သူတွေရော မှတ်ပုံတင်ကို အလွယ်တကူ မငှားရမ်းမိစေနဲ့၊ ဘဏ်အကောင့်ဖွင့်ဖို့ ဘဏ်ဝန်ထမ်းအစစ်အမှန် ဟုတ်မဟုတ် သေချာစွာ စစ်ဆေး ဖို့ လိုပါတယ်။” လို့ သတိပေးထားပါတယ်။
ကိုယ်ပိုင်ဖုန်းဆင်းမ်ကတ်နဲ့ ဖွင့်လှစ်ခြင်းမဟုတ်ဘဲ တခြားသူ ဖုန်းဆင်းမ်ကတ်နဲ့ ဘဏ်ငွေစာရင်း ဖွင့်ခိုင်းပါက လုံးဝမလုပ်ဆောင်သင့်ဘူးလို့လည်း သက်ဆိုင်ရာတာဝန်ရှိသူတွေက သတိပေးနှိုးဆော်ထား ပါတယ်။
(ဓါတ်ပုံဟောင်း)
