မြန်မာနိုင်ငံရဲ့ အခြေအနေဟာ ပြည်တွင်းမှာ အလုပ်အကိုင် အခွင့်အလမ်းတွေ နည်းပါးလာကာ လစာငွေက ထိုက်သင့်တဲ့လစာ ဖြစ်မနေတဲ့အပြင် ကုန်ဈေးနှုန်းတွေ ကြီးမြင့်လာတဲ့အတွက် ပြည်သူအားလုံးအကြပ်အတည်းတွေနဲ့ ရင်ဆိုင်နေရပါပြီ။
ပြည်ပမှာသွားရောက်အလုပ်လုပ်ကိုင်နေသူရှိတဲ့မိသားစုတွေကြားမှာလည်း လတ်တလော ဒေါ်လာငွေလဲလှယ်နှုန်းမှာ ငွေကျပ် ၁၀၀၀ နီးပါယခင်ကထက်ကျဆင်းလာမှုတွေကြောင့် ပြည်တွင်းပြန်ပို့ငွေရရှိမှုအရင်ထက်နည်းလာတယ်လို့ပြောနေကြတာပါ။
" ဒေါ်လာဈေးကအခု ၁ ဒေါ်လာ ၃၀၀၀ ကျော်က စက်တင်ဘာလောက်ကစဖြစ်နေတာဆိုတော့အဲ့ဒီမတိုင်ခင်က ၁ဒေါ်လာကို ၄၀၀၀ ကျပ်အကျော်မှာရှိခဲ့တော့ငွေလဲရင် ၁၀၀၀ ကျပ်လောက်ကွာဟချက်က အခုနောက်ပိုင်း၂လမှာသိပ်သိသာတယ်။ ကုန်ဈေးနှုန်းကအတက်ပဲဖြစ်နေတာ ငွေပြန်ဝင်တော့ အရင်ထက်လျော့လာသလိုဆိုတော့ တဖက်ကနေအိမ်ကိုပို့တဲ့ကိုယ့်မိသားစုဝင်ကိုလည်း ပိုက်ဆံမလောက်ကြောင်းပြောရတာ အဆင်ပြေမနေပါဘူး၊ ဒေါ်လာဈေးတက်စေချင်တဲ့သဘောပြောတာတော့မဟုတ်ပါဘူး၊ ကုန်ဈေးနှုန်းကိုသာချပေးကြစေချင်တာပါ"လို့ ပြည်ပကိုသွားရောက်အလုပ်လုပ်နေတဲ့ သူတယောက်ရဲ့မိသားစုဝင်ကပြောပါတယ်။
ကုန်ဈေးနှုန်း မြင့်လာလေ လူတွေရဲ့နေထိုင်စားသောက်မှုစနစ်တွေက ပိုမြင့်လာလေဖြစ်ရမယ့်အစား ကြပ်တည်းမှုတွေ ငတ်မွတ်မှုတွေပိုဖြစ်လာနေပါတယ်။
ဒါကြောင့်နိုဝင်ဘာ ၁၅ ရက်က စလို့ နိုဝင်ဘာ၂၁ရက်အတွင်း ပြောင်းလဲဖြစ်ပေါ်ခဲ့တဲ့ ကုန်ဈေးနှုန်းတွေကို စုစည်းပြီး ဖော်ပြလိုက်ပါတယ်။
စက်သုံးဆီဈေးနှုန်း
နိုဝင်ဘာ၂၁ရက်နေ့ ရန်ကုန်လက်ကားအထိုင်ဈေးအနေနဲ့ ရောင်းချ နေတဲ့ စက်သုံးဆီဈေးနှုန်းတွေက ၉၂တစ်လီတာ ၂၆၀၀ကျပ် ၊ ၉၅ တစ်လီတာ ၂၆၇၅ကျပ်၊ ရိုးရိုးဒီဇယ်တစ်လီတာ ၂၅၅၅ကျပ်၊ ပရီမီယံဒီဇယ်တစ်လီတာ ၃၀၉၅ကျပ်ဖြစ်ပါတယ်။
အဲဒီမတိုင်မီ နိုဝင်ဘာ၂၀ရက်နဲ့တစ်ပတ်အတွင်းက စက်သုံးဆီဈေးဟာ ၉၂တစ်လီတာ ၂၅၈၅ကျပ်၊ ၉၅ တစ်လီတာ ၂၆၆၀ကျပ်၊ ရိုးရိုးဒီဇယ်တစ်လီတာ ၂၅၄၀ကျပ်၊ ပရီမီယံဒီဇယ်တလီတာ ၃၀၈၅ကျပ် ဖြစ်ခဲ့တာကြောင့် စက်သုံးဆီဈေးဟာ တစ်ပတ်အတွင်း ဓာတ်ဆီဈေးက ၁၅ကျပ်နှုန်း ဈေးတက်လာကာ ၊ ဒီဇယ်ဈေးက တော့၃၅ကျပ်နှုန်းနဲ့ဈေးတက်လာတာပါ။
ပြင်ပစက်သုံးဆီဈေးက တော့တစ်လီတာ ၃၀၀၀ နဲ့အထက် ပတ်ချာလည် ဈေးနဲ့ရောင်းချတာကို တွေ့ရပါတယ်။
ရွှေဈေးနှုန်း
ရန်ကုန်တိုင်းဒေသကြီးရွှေလုပ်ငန်းရှင်များ အသင်းက သတ်မှတ်တဲ့ ရွှေ တကျပ်သားရဲ့ ဈေးနှုန်းက ဒီကနေ့မှာ ကျပ် ၅၉,၇၀၀၀၀ ကျပ် ဈေးရှိလာပြီး အဲ့ဒီ့ဈေးဟာ ယခင် တစ်ပတ်ကြာကဈေးထက်တော့ငွေကျပ် ၁ သောင်းနှုန်းဈေးကျလာတာပါ။
ရွှေအသင်းရဲ့ဈေး သတ်မှတ်ချက်ကဈေးပိုကျလာေပမယ့် ပြင်ပပေါက်ဈေးမှာတော့ ၁၆ပဲရည်အခေါက်ရွှေတစ်ကျပ်သားကို ၈၅သိန်းပေါက်ဈေးမှာရှိလို့ ဒီဈေးဟာ အရင်တစ်ပတ်ဈေးအတိုင်းတက်မြဲတက်နေပါတယ်။
ငွေလဲဈေးနှုန်း
အခုတစ်ပတ်အတွင်း နိုင်ငံခြား ဒေါ်လာ ငွေလဲလှယ်နှုန်းတွေ ကတော့ ဈေးအကျဘက်မှာပဲရှိနေကာ ကန် ၁ ဒေါ်လာကို ငွေကျပ် ၃၉၀၀ ပတ်ချာလည် ဝန်းကျင်မှာဈေးကွက်ဖြစ်နေခဲ့ကာအရင်တစ်ပတ်ထက်တော့ ဈေးကျလာပါတယ်။
အမေရိကန်ဒေါ်လာ၁ ဒေါ်လာဈေးက ဒီကနေ့ နိုဝင်ဘာ၂၁ရက်မှာ ရောင်းဈေး ၄၀၂၀ကျပ်၊ ဝယ်ဈေး ၃၉၅၀ကျပ်ဖြစ်ရာထိုင်းဘတ်ငွေကတော့ ရောင်းဈေး ၁၂၁ကျပ်ကျော်၊ ဝယ်ဈေး ၁၂၀ကျပ် ကျော် ၊ ယွမ်းငွေကရောင်းဈေး၅၅၆ကျပ်၊ ဝယ်ဈေး ၅၅၀ကျပ်၊ ဂျပန်ယန်းဈေးက ရောင်းဈေး၂၆၀နဲ့ဝယ်ဈေး၂၅၀ကျပ်တွေမှာ ငွေလဲဈေးကွက်ဖြစ်ပေါ်နေတာပါ။
စင်ကာပူ ငွေလွှဲဈေးကလည်း အမြင့်ဆုံး စင်ကာပူတစ်ဒေါ်လာကိုရောင်းဈေး ၃၀၂၀ကျပ်အထိ ဈေးပေါက်ခဲ့ပြီး ဝယ်ဈေးကတော့၃၀၂၅ကျပ်ဈေးမှာတည်ရှိကာစင်ကာပူ ဒေါ်လာကဈေးပြန်ကျသွားပါတယ်။
အခြေခံစားသောက်ကုန်ဈေးနှုန်းများ
စားအုန်းဆီတင်သွင်း သိုလှောင်ဖြန့်ဖြူးခြင်း လုပ်ငန်း ကြီးကြပ်ရေးကော်မတီရဲ့ ရန်ကုန်အထိုင်ဈေး အခြေခံလက်ကားရည်ညွှန်း ဈေးနှုန်းကတော့ နိုဝင်ဘာ၁၄ ကနေ ၂၀ရက်အထိကို ၆၃၅၅ ကျပ် ဖြစ်လို့အရင်ထက်ငွေကျပ် ၆၀ကျော်ဈေးကျလာပါတယ်။
ဆီဈေးအကျဈေးနဲ့ပဲအသင်းရဲ့သတ်မှတ်ဈေးကိုအခြေခံပြီး ပြင်ပဈေးကွက်မှာလည်း တစ်ပိဿာ ကျပ် ၁၀ဝ၀၀ ကျော် အထိပေါက်ဈေးနဲ့ရောင်းချနေကြပါတယ်။
ပဲဆီ၊ နေကြာဆီနဲ့ အခြားဆီဈေးနှုန်းတွေကတော့ ငွေကျပ်၂၀၀၀၀ ဝန်းကျင်မှာပဲ ဈေးအစားစားရှိနေတယ်လို့ဆိုပါတယ်။
ဆန်ဈေး
ဆန်ဈေးနှုန်းတွေကတော့ ယခုလဟာ စပါးပေါ်ချိန်ကိုရောက်ရှိတဲ့အတွက် ကုန်သည်တွေက ဆန်ဈေးအကျကိုမျှော်လင့်ကြပေမယ့် ဆန်ဈေးမကျသလို စပါးဈေးဟာလည်း တင်း၁၀၀ကို ငွေကျပ်၁၁သိန်းပေါက်ဈေးပဲရှိကာ ရွာတွေမှာ စပါးဝယ်ယူသူမရှိပဲဖြစ်နေတယ်လို့လယ်သမားေတွရဲ့ ပြောဆိုချက်အရသိရပါတယ်။
ဒါကြောင့် ဆန်ဈေးကပုံမှန်အတိုင်း ဈေးကွက်မှာရွှေဘိုပေါ်ဆန်းတစ်ပြည်ကို ၉၅၀၀ကျပ်မှ ၁၀၀၀၀ ကျပ်အထိ ရှိပြီး အခြားဆန်တွေကတော့တောင်ပျံရှယ် တစ်ပြည် ၈၅၀၀၊ မြောင်းမြ ပေါ် ဆန်းတစ်ပြည် ၈၀၀၀၊ ဆင်းသွယ်တစ်ပြည် ၅၅၀၀၊ မနောသုခတစ်ပြည် ၄၅၀၀ စတဲ့ ပေါက်ဈေးအတိုင်း ရှိနေပါတယ်။
စားဖိုဆောင်သီးနှံတွေ အနေနဲ့ကတော့ကြက်သွန်နီတစ်ပိဿာ ၂၅၀၀ နဲ့၃၀၀၀ကျပ်၊ ကြက်သွန်ဖြူတစ်ပိဿာ ၁၆၀၀၀ ကျပ်နဲ့အထက် အာလူးတစ်ပိဿာ ၇၀၀၀ကျပ်၊ ဂျင်းတစ်ပိဿာ ၃၃၀၀ကျပ်၊လက်ဖက်စို တစ်ပိဿာ ၁၂၀၀၀ကျပ်၊လက်ဖက်ခြောက်တစ်ပိဿာ၂၄၀၀၀ကျပ်၊ နှစ်ပြန်ကြော် တစ်ပိဿာ ၁၄၀၀၀ ကျပ် ဈေးတွေအတိုင်းပဲရှိနေပါတယ်။
ကြက်ဥ၊ဘဲဥ ဈေးတွေကတော့ ပုံမှန်အတိုင်း ကြက်ဥတစ်လုံး၄၅၀ကျပ်ကနေ၅၅၀ကျပ် နဲ့ ဘဲဥတစ်လုံး ၆၀၀ ၊ဆေးဘဲဥတစ်လုံး ၈၀၀ကျပ်နဲ့ ငုံးဥ ၁၀လုံးကို ၁၀၀၀ ကျပ်ဈေးရှိနေပါတယ်။
မနက်ခင်း အဆာပြေစားသုံးနေကြတဲ့ ပဲပြုတ်ဈေးမှာလည်း၅၀၀ကျပ်အနည်းဆုံးဝယ်လို့ရနေကာ ၁၀သားကို ငွေကျပ်၁၂၀၀နဲ့ရောင်းပေးပြီး မုန့်ဟင်းခါး၊ အသုပ်များက တစ်ပွဲကိုအနည်းဆုံး၁၅၀၀ကျပ် မှ အများဆုံး ၃၅၀၀ကျပ်အထိဈေးရှိနေပါတယ်။
အခြေခံဟင်းသီးဟင်းရွက်ဈေးနှုန်းတွေထဲမှာတော့ ချဉ်ပေါင်ရွက်တစ်စီးလျှင် ၅၀၀ ၊ ကန်စွန်းရွက်တစ်စီး ၁၀၀၀၊ ဗူးရွက်တစ်စီး ၇၀၀၊ စူးပုတ်ရွက်တစ်စီး ၇၀၀ကျပ်နဲ့ ခရမ်းချဉ်သီးတစ်ပိဿာလျှင်ကျပ် ၄၀၀၀ ကျပ် ၊ ခေါက်ဆွဲခြောက်တစ်ထုပ်လျှင် ၁၀၀၀ကျပ်၊ ၊ ပဲလွန်းတစ်စည်း ၁၂၀၀၊ ခရမ်းသီးတစ်လုံး ၅၀၀၊ မျှစ်တစ်ပိဿာ ၄၀၀၀ ၊ ခဝဲသီး တစ်လုံး ၇၀၀ ကျပ်၊ ငြုပ်သီးစိမ်းနဲ့ နံနံပင်၊ ရှမ်းနံနံစတာတွေကတော့ ၅၀၀ ကျပ်အနည်းဆုံးပေး၀ယ်နေရတာဖြစ်ပါတယ်။
ဘုရားပန်းကပ်လှူဖို့ ပန်းစည်းတွေအနေနဲ့လည်း ဂန္ဓမာပန်းအမျိုးအစားလိုက်တစ်စည်းကို၆၀၀၀ကျပ်မှ ၃၀၀၀ကျပ်၊ နှင်းဆီအမျိုးအစားလိုက်တစ်စည်းကို၄၀၀၀ကျပ် မှ ၂၅၀၀ကျပ်၊ သပြေတစ်ခက်ကိုအနည်းဆုံး၂၀၀၀ကျပ်မှ ၅၀၀၀ကျပ် အထိဈေးရှိနေပါတယ်။
ငါးဈေးနှုန်းတွေကတော့ ၂၀၀၀၀ မှ ၂၅၀၀၀ အထိရှိပြီး မည်သည့်ငါးမဆိုအနည်းဆုံး ၅၀၀၀ ဖိုး၀ယ်ယူမှသာ တစ်နပ်စာစားသုံးလို့ရနေတာဖြစ်ပါတယ်။
ရပ်ကွက်ဈေးများထဲ အစားအများဆုံးအသားဖြစ်တဲ့ကြက်သားက တော့ ပွင့်လင်းရာသီ အလှူအတန်းတွေရှိလာလို့ အသားဈေးတက်မှုတွေထဲပါလာကာ ယခင်တစ်ပိဿာကို ငွေကျပ် ၂၅၀၀၀ ကနေ ၃၅၀၀၀ ကျပ်အထိကနေ ထပ်မံပြီး တစ်ပိဿာကိုငွေကျပ်၃၀၀၀၀ ကနေ ၄၀၀၀၀နှုန်းအထိ စံချိန်တင်မြင့်တက်နေပါတယ်။
အမဲသားနဲ့၀က်သားဈေးနှုန်းတွေဟာဆိုရင် ကျပ် ၃၅၀၀၀ ကျပ်မှ ၄၀၀၀၀ကျပ်ဈေးကိုရောက်ရှိနေပြီး ဆိတ်သားဈေးနှုန်းတွေဟာဆိုရင် ကျပ် ၆၀၀၀၀ ဈေးအထိကိုရောက်ရှိမြင့်တက်ေနလို့ဆိတ်သားဈေးနှုန်းတွေဟာဆိုရင်အခြေခံအလုပ်သမားတွေအတွက် စားသုံးနိုင်ဖို့ခက်ခဲလာတဲ့နှုန်းထားတွေဖြစ်တယ်လို့ သိရပါတယ်။
လူသုံးကုန်၊ အလှကုန်တွေ အနေနဲ့ကတော့ ပြည်ပကဝယ်ယူတင်သွင်းရတဲ့ပစ္စည်းတွေမှာ ကုန်သယ်ယူခကြီးမားတဲ့နေရာဒေသအလိုက် ဈေးကွာခြားချက်တွေရှိနေတယ်လို့သိရပါတယ်။
ဆေးနဲ့ဆေးပစ္စည်း ဈေးတွေကတော့ တက်နေဆဲဖြစ်သလို သုံးစွဲသူတွေအနေနဲ့ မူလသုံးနေတဲ့ဆေးအမျိုးအစားနေရာမှာ အလားတူ၊အာနိသင်တူဆေးဝါးအမျိုးအစားတွေကိုပဲ အစားထိုးသုံးစွဲလာနေရကာဆေးဈေးတွေကတော့ ဈေးသက်သာမှုရှိမနေဘူးလို့သိရပါတယ်။
တပတ်တာကုန်ဈေးနှုန်းတွေကို မုဒြာ က စုစည်းပေးထားတာပါ။
