ကိုရီးယားနိုင်ငံကို EPS စနစ်နဲ့ စိုက်ပျိုးရေးနဲ့မွေးမြူရေးလုပ်ငန်းစာမေးပွဲဖြေဆိုအောင်မြင်ပြီး သူတွေ အနေနဲ့ သစ်တောလုပ်ငန်းသို့ ပြောင်းရွှေ့လျှောက်ထားနိုင်ပေမဲ့ အာမခံချက်မရှိသေးဘူးလို့ သိရပါတယ်။
"စိုက်ပျိုးရေးတောင်သေအောင်ပင်ပန်းတာ။ ခုလိုတောထဲတောင်ထဲဆို သေအောင်ပင်ပန်းတာ။ အမြန်ရောက်ရင်ပြီးရောဆိုပြီး ပြောင်းလျှောက်ချင်သူတွေသတိထားသင့်တယ်။ တောထဲတောင်ထဲတစ်ခုခုဖြစ်ရင်တောင်သိရဖို့မလွယ်ဘူး။ ပူရင်မြန်မာထက်ပူတယ်။ လက်ရှိစိုက်ပျိုးရေးနဲ့ရောက်လာသူတွေတောင် မလုပ်နိုင်လို့ပြေးတာတွေတပုံကြီး။ ခုလိုသစ်တောဆိုရင်တော့ ပိုဆိုးပြီ။ရောက် ပြီးမှ ပြေးရင် အိုသမားဖြစ်မယ်ဒုက္ခရောက်မယ်။ POEA ကိုယ်တိုင်ကရော အာမခံချက်မရှိဘူးပြောထားတယ်" လို့ ကိုရီးယားရောက်အလုပ်သမားတစ်ဦးက ဆိုပါတယ်။
၂၀၂၂ ခုနှစ်၊ EPS-TOPIK စာမေးပွဲ စိုက်ပျိုးရေးနဲ့ မွေးမြူရေးလုပ်ငန်း ဖြေဆိုအောင်မြင်ပြီး အလုပ်ရှင်နဲ့ မိတ်ဆက်မခံရသေးသူတွေ အလုပ်လျှောက်လွှာသက်တမ်းကျန်ရှိသူတွေအနေနဲ့ သစ်တောလုပ်ငန်းကို ဩဂုတ် ၂၇ ရက်ကစပြီး ပြောင်းရွှေ့လျှောက်ထားနိုင်တယ်လို့ POEA ရုံးကအသိပေးထုတ်ပြန်လိုက်တာဖြစ်ပါတယ်။
" သက်တမ်းကျန်တဲ့သူတွေက စိုက်ပျိုးရေးနဲ့အလုပ်ခေါ်စာ မစောင့်ချင်ဘူးဆို သစ်တောလုပ်ငန်းနဲ့ ပြန်ပြောင်းလို့ရတယ်။ အလုပ်ရမယ်တော့အာမမခံထားဘူး။ နောက်ပြီး ခုမှအစမို့ တခြားဘာတွေညာတွေလည်း သေချာမသိသေးဘူးဆိုတော့ ပြောင်းမဲ့သူတွေအတွက် စဥ်းစားစရာပေါ့ " ကိုရီးယားသင်တန်းကျောင်းတစ်ခုမှတာဝန်ရှိသူတစ်ဦးကပြောပါတယ်။
စိုက်ပျိုးရေးလုပ်ငန်းမှသစ်တောလုပ်ငန်းလုပ်ငန်းသို့ပြောင်းရွှေ့လျှောက်တေထားလိုသူတွေ က ဩဂုတ်လ ၂၇ ရက်နေ့ မနက် ၉ နာရီကနေ နေ့လယ် ၃ နာရီအတွင်း POEA ရုံးသို့ နိုင်ငံကူးလက်မှတ်မူရင်း ၊ မိတ္တူ ၊ စာမေးပွဲဖြေဆိုခွင့်အမှတ်စဉ်ပါ တပါတည်းယူဆောင်လျှောက် ထားရမှာဖြစ်တယ်လို့သိရပါတယ်။
ပြောင်းရွှေ့လျှောက်ထားလို့ သစ်တောလုပ်ငန်းရဲ့ လျှောက်ထားမှူလူဦးရေပြည့်သွားရင်တော့ မူလလုပ်ငန်းဖြစ်တဲ့ စိုက်ပျိုးရေးနဲ့ မွေးမြူရေးလုပ်ငန်းတွေမှာ ပြန်လည်ပြောင်းရွှေ့ခွင့်ပြုသွားမှာဖြစ်သလို လက်ရှိသစ်တောလုပ်ငန်းကိုလျှောက်ထားရာမှာလည်း အလုပ်ရှင်ကတိုက်ရိုက်ရွေးချယ်ခန့်အပ်မယ်လို့ သိရပါတယ်။
EPS စနစ်ဟာ ကိုရီးယား အစိုးရနဲ့ မြန်မာအစိုးရကြား နှစ်နိုင်ငံသဘောတူညီချက်ဖြင့် ဆောက်လုပ်ရေးလုပ်ငန်း၊ စိုက်ပျိုးရေးနဲ့မွေးမြူရေး လုပ်ငန်း ၊ ကုန်ထုတ်လုပ်ငန်းသစ်လုပ်ငန်းတွေအတွက် လုပ်သားပို့ဆောင်ပေးလျှက်ရှိရာ ၂၀၂၃ ခုနှစ်အတွင်း ကိုရီးယားသို့ EPSလုပ်သား ၁၀၆၁၁ ဦး စေလွှတ်ခဲ့ပြီး၊ ယခုနှစ်မှာ မြန်မာနိုင်ငံအတွက် လုပ်သားခေါ်ယူမှုခွဲတမ်းအရ လုပ် သား ၁၁၀၀၀ ဦး စေလွှတ်ဖို့ ကြိုးပမ်းနေတယ်လို့ သိရပါတယ်။
