နိုင်ငံခြားသားတွေကို လုပ်ကိုင်ခွင့် မပြုတဲ့ ကန့်သတ်ထား လုပ်ငန်းတွေ လုပ်ကိုင်တဲ့ မြန်မာရွှေ့ပြောင်းလုပ်သား ၅၀၀ နီးပါးကို ဖမ်းဆီးခဲ့တယ်လို့ The Nation သတင်းစာမှာ ဖော်ပြပါတယ်။
ထိုင်းနိုင်ငံသားတွေပဲ လုပ်ခွင့်ရှိတဲ့ အလုပ်ကို လုပ်ကိုင်လို့ အရေးယူခံရတဲ့ နိုင်ငံခြားသား လုပ်သား ၈၈၃ ဦး ရှိပြီး အဲဒီထဲမှာ မြန်မာလုပ်သား ၄၈၁ဦး ပါဝင်တယ်လို့ ထိုင်းအလုပ်သမားဝန်ကြီးဌာနက ထုတ်ပြန်ထားတာဖြစ်ပါတယ်။
ဖမ်းဆီးခံရတဲ့ မြန်မာလုပ်သားအများစုက ဈေးရောင်း၊ ဆံပင်ညှပ်၊ အငှားယာဉ်မောင်း စတဲ့ ကန့်သတ် လုပ်ငန်းတွေမှာ လုပ်ကိုင်ကြသူတွေလို့ သိရပါတယ်။
၂၀၂၄ ခုနှစ် အောက်တိုဘာ ၁ ရက်ကနေ ၂၀၂၅ ခုနှစ် ဧပြီ ၁၈ ရက်အထိ ထိုင်းနိုင်ငံက စီးပွားရေး လုပ်ငန်းပေါင်း ၃၈,၇၃၄ ခုကို စစ်ဆေးခဲ့ပြီး လုပ်ငန်း ၁၃၂၉ ခုက ချမှတ်ထားတဲ့ စည်းမျဥ်းတွေကို ဖောက်ဖျက်လို့ အရေးယူခဲ့တယ်လို The Nation သတင်းမှာ ဖော်ပြပါတယ်။
နိုင်ငံခြားသားအလုပ်သမား ၅၂၃,၇၀၆ ဦးကို စစ်ဆေးခဲ့ပြီး မြန်မာ (၃၉၈,၄၉၃) ဦး၊ ကမ္ဘောဒီးယား (၇၀,၃၇၁)၊လာအို (၃၂,၉၈၃)၊ ဗီယက်နမ် (၅၂၂)၊ တရုတ် (၉,၁၈၉) နဲ့ တခြားနိုင်ငံသား (၁၂,၁၄၈) ဦး ပါဝင်တယ်လို့ ဆိုပါတယ်။
အလုပ်သမား၂၅၇၅ ဦးက အကြောင်းအမျိုးမျိုးနဲ့ ဥပဒေ ချိုးဖောက်တာကြောင့် အရေးယူခဲ့တယ်လို့လည်း သိရပါတယ်။
အလုပ် လုပ်ခွင့် ပါမစ် မရှိသူ ဒါမှမဟုတ် ခွင့်မပြုထားတဲ့ အလုပ်တွေ လုပ်ကိုင်တဲ့ နိုင်ငံခြားသား အလုပ်သမားတွေကို ထိုင်းဘတ်ငွေ ၅,၀၀၀ ကနေ ၅၀,၀၀၀ အထိ ဒဏ်ရိုက်တာ ၊ မိခင်နိုင်ငံကို ပြန်ပို့ကာ၊ ထိုင်းနိုင်ငံအတွင်း အလုပ်လုပ်ခွင့်ပါမစ် လျှောက်ထားတာကို ၂နှစ် ပိတ်ပင်တာ စတဲ့ပြစ်ဒဏ်တွေ ချမှတ်နိုင်တယ်လို့ သိရပါတယ်။
ဒါ့အပြင် ခွင့်ပြုချက်မရှိဘဲ အလုပ်လုပ်ကိုင်တဲ့ နိုင်ငံခြားသား လုပ်သားတွေကို ငှားရမ်းတဲ့ လုပ်ငန်းရှင်ကိုလည်း လုပ်သားတစ်ဦး အတွက် ဘတ် ၁၀,၀၀၀ ကနေ ၁၀၀,၀၀၀ ကြား ဒဏ်ငွေပေးဆောင်ရမှာဖြစ်ပါတယ်။
ထပ်မံ ကျူးလွန်ပါက ထောင်ဒဏ်တစ်နှစ် ချမှတ်နိုင်ပြီး လုပ်သားတစ်ဦး အတွက် ဘတ် ၅၀,၀၀၀ နဲ့ ၂၀၀,၀၀၀ ကြား ဒဏ်ရိုက်ခံရမဲ့အပြင် နိုင်ငံခြားသား လုပ်သားငှားရမ်းခွင့် ၃နှစ် ပိတ်ပင်နိုင်တယ်လို့လည်း သိရပါတယ်။
