ထိုင်းနိုင်ငံ ပထုမ်ဌာနီ ခရိုင်ရှိ အီလက်ထရွန်းနစ်စက်ရုံ မှ ကုန်ကျစရိတ်စိုက်ထုတ်ပေးတဲ့ ဇီးရိုးကော့စ် စနစ်နဲ့ မြန်မာ လုပ်သား တွေကို ခေါ်ယူတာ မှာ မြန်မာပြည်ဘက်က တရားဝင်အေဂျင်စီနဲ့ ပွဲစားတွေက အလုပ်သမား ၅၉ ဦး ထံ မှ ထိုင်းဘတ်ငွေ ၁ဒသမ ၆ သန်းကျော် ကောက်ယူထားတဲ့ အတွက် ပြန်တောင်းပေးရတယ်လို့ ရွှေ့ပြောင်းအလုပ်သမားအခွင့်ရေးကွန်ယက်(MWRN)ထံကသိရပါတယ်။
ပြည်တွင်းက ပြည်ပလုပ်သားပို့ဆောင်ပေးနေတဲ့ နာမည်ကြီးလိုင်စင်ရ အေဂျင်စီတစ်ခုမှ ထိုင်းနိုင်ငံရှိ အီလက်ထရွန်းနစ်စက်ရုံ ကို မြန်မာအလုပ်သမား ၅၉ ဦး ပို့ဆောင်တာ မှာအေဂျင်စီနဲ့ ပွဲစားတွေကအလုပ်သမားတစ်ဦးကို ကျပ် ၃၅ သိန်းမှ ကျပ် ၄၂ သိန်းကျော်အထိ ကောက်ယူခဲ့တဲ့ အပြင် လေယာဥ်ခကိုလည်း ၈သိန်းခွဲ အထိ ပေးခဲ့ရတယ်လို့လဲဆိုပါတယ်။
ယင်းအလုပ်သမားတွေ စက်ရုံ ကို ရောက်ရှိပြီး နောက် စက်ရုံသူဌေး မှ လေယာဉ်ခ အတွက် အလုပ်သမားတွေကို ပြန်လည်ပေးတာမှာ အလုပ်သမား အချို့သာ ရရှိခဲ့တဲ့ အတွက် မကျေနပ်တာကြောင့် ရွှေ့ပြောင်းအလုပ်သမားအခွင့်ရေးကွန်ယက်(MWRN)ထံကို အကူညီတောင်းခံခဲ့တယ်လို့ သိရပါတယ်။
"အလုပ်သမားတွေ ထွက်ခါနီး လေဆိပ်ကျ မှ အခုအလုပ်က Zero cost ဖြစ်သွားပြီ သွင်းထားတဲ့ ငွေ တွေကိုတော့ပြန်မပေးတော့ဘူး အဲ့ဒါတော့ မေ့ထားလိုက်ဘာညာပြောလိုက်တယ် ဒီအထိ လည်း အလုပ်လိုချင်တော့ အလုပ်သမားတွေက ဘာမှ မပြောဘူး စက်ရုံ ရောက်တော့ ဒီဘက်က သူဌေးက လေယာဉ်လက်မှတ်ဖိုး ပြန်ပေးတယ် အဲ့လိုပေးတော့လည်း ထိုင်းဘက်က ဘတ်ငါးသန်းအေဂျင်စီ က အလုပ်သမား တွေအားလုံး ကို မပေးဘူး ရတဲ့သူရတယ်မရတဲ့သူမရတော့ အလုပ်သမားတွေကမကျေနပ် တော့ ကျွန်တော်တို့အဖွဲ့ ကို အကူညီလာတောင်းတာပါ""လို့ MWRN မှ တာဝန်ရှိသူတစ်ဦးက ပြောပါတယ်။
ယခုကိစ္စနဲ့ပက်သက်ပြီး MWRN အနေနဲ့ ၎င်းစက်ရုံနဲ့ နိုင်ငံခြားဝယ်လက် ကုမ္ပဏီ တို့ကို ဖြေရှင်းပေးဖို့ အကြောင်းကြားပေးခဲ့ရာ အလုပ်သမား တစ်ဦး ကို ဘတ် ၂သောင်း ၈ထောင်ခန့် နဲ့ ဦးရေစုစုပေါင်း ၅၉ ဦးအတွက် ဘတ်ငွေ ၁ဒသမ ၆ သန်း ပြန်လည်ရရှိစေခဲ့တယ်လို့ သိရပါတယ်။
၎င်း အီလက်ထရွန်းနစ်စက်ရုံ မှာ နာမည်ကြီး အမှတ်တံဆိပ် ရဲ့ ကုန်ထုတ်စက်ရုံ တစ်ခု ဖြစ်ကာ မြန်မာအလုပ်သမား တွေကို ယခုမှ ပထမဆုံး ခေါ်ယူဖူးတဲ့စက်ရုံ ဖြစ်တယ်လို့လည်း သိရပါတယ်။
