လှိုင်သာယာမြို့နယ်, ရွှေလင်ဗန်းစက်မှုဇုန် တွင်သင်းထိုက်ဝန်ဦးထွန်းညိုလမ်းမှာ ဖွင့်လှစ်ထားတဲ့ Yuan Hong Garment စက်ရုံက အလုပ်သမားတွေဟာ အလုပ်သမားအခွင့်အရေးချိုးဖောက်ခံရမှုတွေရှိနေတယ်လို့ သိရပါတယ်။
အဆိုပါစက်ရုံဟာ တရုတ်နိုင်ငံသားပိုင်စက်ရုံ
ဖြစ်ပြီး အလုပ်သမား (၈၀၀)ခန့်နဲ့ လုပ်ငန်းလည်ပတ်နေကာ BONOBO/OFALO/(niko and) စတဲ့အမှတ်တံဆိပ်တွေ ချုပ်လုပ်နေတာဖြစ်တယ်လို့ သိရပါတယ်။
အဆိုပါအလုပ်သမားတွေဟာ တနင်္လာနေ့မှသောကြာနေ့အထိ အချိန်ပို ည(၈:၀၀) အထိ ဆင်းရပြီး အချိန်ပိုမဆင်းလျှင် HR ရုံးခန်းသို့ခေါ်၍အဆူခံရခြင်း၊ အလုပ်ထုတ်မည်ဟုခြိမ်းခြောက်ခြင်း၊ အချိန်ပိုကြေးမပေးဘဲ အလုပ်ဆင်းခိုင်မယ်ပြောဆိုခြင်းတွေ
ကြောင့် အလုပ်သမားတွေက စိတ်ညစ်နေကြတယ်လို့ ဆိုပါတယ်။
" စက်ရုံမှာ အလုပ်သမားများ၏ သဘောဆန္ဒကိုမေးမြန်ခြင်းမရှိဘဲ အချိန်ပိုဆင်းရန်အတွက် အလုပ်သမားများကို လက်မှတ်ထိုးခိုင်းခြင်းမျိုးမရှိဘဲ လိုင်းစာရေးမများက လက်မှတ်ထိုးပြီး တနင်္လာနေ့မှ သောကြာနေ့ထိ အလုပ်သမားများကို ည ၈နာရီထိ အချိန်ပိုဆင်းရတယ်။ အထည်အရေးကြီးရင် တနင်္ဂနွနေ့တွေ အချိန်ပိုဆင်းပေးရတယ်" လို့ အလုပ်သမားကဆိုပါတယ်။
ဒါ့အပြင် ဥပဒေပါခွင့်နှင့်ပတ်သက်ပြီး ရှောင်တခင်ခွင့်ယူရာမှာ တစ်ရက်ကြိုတင်ယူမှသာပေးခြင်း၊ ဆေးခွင့်ဖြင့်ခွင့်ယူရင်လည်း ဖူလုံရေးဆေးခန်းမှဆေးခွင့်ဖြင့်သာပေးပြီး လုပ်သက်ခွင့်နှင့်ပတ်သက်ပြီးလည်း အလုပ်သမားများက ခွင့်ခံစားခွင့်ရှိသည်ကို နားမလည်ကြဘဲ အလုပ်ရှင်ဘက်မှ ငွေကြေးခံစားခွင့်ကိုသာပေးတယ်လို့ သိရပါတယ်။
" စက်ရုံဘက်က ခွင့်နှင့်ပတ်သက်ပြီး အလုပ်သမားများကို သေချာရှင်းပြတာမျိုးမရှိဘူး။ စက်ရုံမှာ နေ့စားအလုပ်သမားတွေရှိပြီး တနင်္ဂနွအေလုပ်ပိတ်ရက်တွေမှာ ဒေးကြေးခံစားခွင့် မရှိသည့်အပြင် အလုပ်အရေးကြီးတဲ့အချိန်ဆို ခေါ်ခိုင်းပြီး အလုပ်ပါးသည့် အခါမျိုးမှာ နေ့စားတွေကိုလစာခန့်ခြင်း မျိုးမရှိဘဲ အလုပ်ထုတ်တာတွေရှိနေတယ်" လို့ အလုပ်သမားကဆိုထားပါတယ်။
စက်ရုံမှာ လုပ်ငန်ခွင်ညှိနှိုင်းရေးကော်မတီ WCC ဖွဲ့စည်းထားတယ်လို့သိရပေမဲ့ ခုလိုဥပဒေမဲ့ ခိုင်းစေတာတွေကိုလည်း ဖြေရှင်းပေးခြင်းမရှိသလို အထည်စံချိန် တောင်းတဲ့အခါမှာလည်း အလုပ်သမားတွေရဲ့ ချုပ်လုပ်နိုင်တဲ့ အထည်စံချိန်ထက် ပိုတောင်းကာ အထည်စံချိန်မရပါက စူပါလီတာများမှ နားမခံသာအောင် ဆဲဆိုခြင်းများရှိနေပါတယ်။
အဆိုပါစက်ရုံမှာ အလုပ်သမားတွေရဲ့ ကျန်မာရေးအတွက် ဆေးပေးခန်းစီစဉ်ထားပေးသော်လည်း ဆေးပစ္စည်းလုံလောက်မှုမရှိဘူးလို့လည်းသိရပါတယ်။
#MyanmarLabourNews
