Yongon Fashion Myanmar (ယုံအန်း) အထည်ချုပ်စက်ရုံ အလုပ်သမားတွေက လုပ်ခလစာတိုးမြှင့်ရေးအပါအဝင် အချက်တချို့ကို အလုပ်ရပ်တောင်းဆိုခဲ့ရာ တောင်းဆိုမှု အနည်းငယ်ပဲ တိုးမြှင့်ရရှိခဲ့တယ်လို့ အလုပ်သမားတွေက ပြောပါတယ်။
“အင်္ဂါနေ့ က ညှိလိုက်တာ၊ ဘာမှ သိပ်ပြီး တိုးရတာမရှိဘူး၊ တောင်းထားတဲ့ ပမာဏထက် ရတာက အများကြီးနည်းပါတယ်။ ရက်လည်း ကြာတော့ အလုပ်သမားတွေ အတွက် စိုးရိမ်တာနဲ့ လက်ခံလိုက်ရတာ.” လို့ အလုပ်သမားတွေက ပြောပါတယ်။
အလုပ်သမားတွေက ရက်တွက် ဒေးကြေး ၁၂၀၀၀၊ ဂရိတ်ကြေး အဆင့် ၄ ဆင့်အတွက် အမြင့်ဆုံးကျပ် ၁၀၀၀၀၀ ကနေ အနိမ့်ဆုံးကျပ် ၄၀၀၀၀ အထိ တိုးပေးဖို့၊ စနေနေ့တိုင်း ညနေ ၄ နာရီ အလုပ်ဆင်းပေးဖို့၊ အထည်ကြေး အနည်းဆုံး ကျပ် ၇၀ ရရှိဖို့ နဲ့ အိုတီကြေး ကျပ် ၂၂၀၀ သတ်မှတ်ပေးဖို့ တောင်းဆိုခဲ့တာ ဖြစ်ပါတယ်။
“ညှိနှိုင်းမှုတွေ အပြီး ဂိတ်ကြေး အဆင့်လိုက် အများဆုံး ကျပ် ၄၀၀၀ က၊ အနည်းဆုံးက ကျပ် ၂၀၀၀ အဲ့ဒါပဲ တိုးရတယ်။ ဒေးကြေးနဲ့ အိုတီကြေး လုံးဝ တိုး မပေးဘူး။ စနေနေ့ အလုပ်ချိန်က နဂို ၆ ခွဲကနေ ညနေ ၄ နာရီးဆင်းပေးဖို့ရခဲ့တယ်။ ရက်မှန်ကြေး ရှေ့ ၁၅/ နောက် ၁၅ ရတယ်။ အထည်ကြေးကို အထည်ပေါ်မှာ မူတည်ပြီး ပေးမယ်လို့ ပြောတယ်.” လို့ အလုပ်သမားတွေက ပြောပါတယ်။
တောင်းဆိုမှု ငါးရက် ကြာမြင့်ခဲ့မှာ ညှိနှိုင်းမှုတွေ ပြီးစီးခဲ့တာဖြစ်ပါတယ်။ စက်ရုံမှာ အလုပ်သမား ၅၀၀ ဝန်းကျင်လုပ်ကိုင်နေကြပြီး တောင်းဆိုမှုမှာ သုံးပုံတစ်ပုံ ပါဝင်ကြတယ်လို့ သိရပါတယ်။
Yongon Fashion Myanmar အထည်ချုပ်စက်ရုံက ရန်ကုန်မြို့၊ ရွှေလင်ဗန်းစက်မှုဇုန်၊ ယောအတွင်းဝန်ဦးဖိုးလှိုင်လမ်းမှာ ရှိပြီး UniBoss ကိုရီးယားအမှတ်တံချုပ်ကို ချုပ်လုပ်နေပါတယ်။
