Yangon Young clothing အထည်ချုပ်စက်ရုံက အချိန်ပိုတွေကို တပတ် နာရီ ၂၀ ကျော် လုပ်ကိုင်ခိုင်းနေတယ်လို့ အလုပ်သမားတွေက ပြောပါတယ်။ ဒီလို အချိန်ပိုလုပ်ကိုင်နေရတာက ၅ လပိုင်း(မေလ) အစ ကတည်းက လုပ်ကိုင်နေရတာလို့ သိရပါတယ်။
"၅လပိုင်းလစကတည်းက အိုတီ တွေ တောက်လျှောက် ဆင်းရပါတယ်ရှင်။ ညီမ တို့စက်ရုံက ရုံ ၂ရုံရှိပါတယ်။ ရုံသစ်ကတော့ဖွင့်တာမကြာသေးပါဘူး။ ညီမတို့ ရုံကတော့ကြာပါပြီ။ အစကတော့ ည ၈နာရီကို အထည်မနိုင်တဲ့ ပွိုင့်တွေပဲခေါ်တာပါ။ အခုတော့ နိုင်လည်းဆင်း ၊ မနိုင်လည်းဆင်းဆိုပြီး အတင်းအကျပ် ဖြစ်လာတယ်။” လို့ အလုပ်သမားတွေက ပြောပါတယ်။
စက်ရုံရဲ့ ပုံမှန် အလုပ်ချိန်က မနက် ၇ နာရီခွဲကနေ ညနေ ၄ နာရီ ဖြစ်ပြီး အချိန်ပိုကို ည ၈ နာရီအထိ နားချိန်မပေးဘဲ လုပ်ကိုင်ရတယ်လို့ အလုပ်သမားတွေက ပြောပါတယ်။ ဒါ့အပြင် စနေနေ့ပါ ည ၈ နာရီအထိ လုပ်ကိုင်ရလို့ အဆင်မပြေမှုတွေ ဖြစ်နေတာလို့ အလုပ်သမားတွေက ပြောပါတယ်။
“အလုပ်ချိန်က မနက် ၇ ခွဲကနေ ၁၁ ခွဲ၊ ထမင်းစားပြီး ၁၂ နာရီကနေ အချိန်ပို ပြီးတဲ့အထိကို တဆက် တည်း လုပ်ရတယ်။ လုံးဝ နားချိန်မပေးတာ။ စနေနေ့လည်း ၈ နာရီအထိဆင်းရတယ်၊ တနင်္ဂနွေနေ့ မလုပ်ရတော့ဘူး။ ဒီနေ့လည်း ည ၈နာရီအထိ ဆင်းရမယ်။ နောက်ကျတော့ ညဘက် မိုးတွေရွာ၊ မီးကပျက်နဲ့ ပြန်ရတာအဆင်မပြေဘူး။ ဖြစ်နိုင်ရင် အချိန်ပိုတွေ အမြဲ မခေါ် စေချင်ဘူး။ခေါ်ရင်တောင် နားချိန်လေးပေးစေချင်ပါတယ်။ ” လို့ ပြောပါတယ်။
လုပ်ငန်းခွင် ဝင်ရောက်ပါက အလုပ်သမားတွေရဲ့ လုပ်ကိုင်ဖုန်းတွေ သိမ်းဆည်းပြီး ကျန်းမာရေး နေမကောင်းလို့ ဂိတ်ပတ်စ်တောင်းလည်း စက်ရုံတာဝန်ရှိသူတွေက မပေးလို့ ပြန်မရဘူးလို့ အလုပ်သမားတွေက ပြောထားပါတယ်။
“အချိန်ပိုတွေ နေတိုင်းဆင်းရတာ အဆင်မပြေတော့ဘူး။ သောက်ရေတွေဆို သံကြေး အနံတွေရတယ်။ ။ လိုင်းခေါင်းဆောင်တွေကနေ တဆင့် ပြောပြဖူးတယ်။ လုပ်မပေးကြဘူး။ အလုပ်သမားတွေစုပြီး ဝယ်သောက်ရတယ်။ အိမ်သာတွေလည်း မကောင်းဘူး။ “ လို့ ပြောပါတယ်။
Yangon Young clothing အထည်ချုပ်စက်ရုံက တရုတ်နိုင်ငံသားပိုင်စက်ရုံ ဖြစ်ပြီး ရန်ကုန်မြို့ ရွှေပြည်သာ မြို့နယ်၊ သာဓုကန်စက်မှုဇုန်၊ ကျောက်စိမ်းလမ်းမှာ လုပ်သား ၁၀၀၀ ဝန်းကျင်နဲ့ လုပ်ငန်းလုပ်ကိုင် နေပါတယ်။
