XING YUAN (Myanmar) အထည်ချုပ်စက်ရုံမှာ အလုပ်သမားတွေရဲ့ ဆန္ဒမပါဘဲ တာဝန်ရှိသူတွေက အချိန်ပို ခိုင်းစေနေတယ်လို့ ပြောပါတယ်။သင်္ကြန်ပိတ်ရက်အပြီး အလုပ်ပြန်စတဲ့ ဧပြီလ ၂၂ ရက်မှာ ည ၁၂ နာရီအထိ လုပ်ကိုင်ရမယ်ဆိုပြီး စက်ရုံဘက်က ပြောဆို ခိုင်းစေခဲ့တာလို့ အလုပ်သမားတွေက ပြောပါတယ်။
“ည ၁၂ အထိ ဆိုတော့ အလုပ်သမားတွေက မဆင်းနိုင်ဘူး ငြင်းကြတယ်။ အလုပ်သမားတွေကတော့ ည ၈ နာရီအထိ လုပ်ပေးဆိုပြီး လုပ်ပေးခဲ့တယ်။ ည ၈ နာရီ ရောက်တော့ အလုပ်သမားတွေကို ပြန်လွှတ်မပေးဘူး။ အထည်တွေ ပြီးမှ ဆင်းပေးမယ်ဆိုပြီး ပြန်လွှတ်မပေးဘူး။ ပြန်ချင်ရင် ကိုယ့်ဖာသာလမ်းလျှောက်ပြန်ကြဆိုပြီး လိုင်း ၃ အောစူပါနဲ့ မန်နေဂျာ ဒေါ်မျိုးမျိုးက ပြောခဲ့တယ်။” လို့ အလုပ်သမားတွေက ပြောပါတယ်။
အဲဒီနေ့က စက်ရုံ အလုပ်သမားတွေ ည ၉ နာရီအထိ မပြန်ရဘဲ တချို့အလုပ်သမားတွေက နီးစပ်ရာ မိသားစု ၊ အသိ မိတ်ဆွေတွေကို ဆက်သွယ်၊ အကူညီတောင်းပြီး နေအိမ်ပြန်ခဲ့ရတာလို့ သိရပါတယ်။ စက်ရုံက ရန်ကုန်မြို့၊ရွှေပြည်သာမြို့နယ်၊ ဝါးတရာစက်မှုဇုန်၊သိမ်ချောင်းလမ်းမှာ ရှိပြီး လှိုင်သာယာမြို့နယ်ကနေ လာရောက် လုပ်ကိုင်နေသူတွေလည်း ရှိတယ်လို့ အလုပ်သမားတွေက ပြောပါတယ်။
XINGYUAN(Myanmar)အထည်ချုပ်စက်ရုံက ပြီးခဲ့တဲ့ ဒီဇင်ဘာလက ဖွင့်လှစ်ထားတဲ့ စက်ရုံဖြစ်ပြီး အောစူပါတွေ က ညစ်ညမ်း ရိုင်းစိုင်းစွာပြောဆိုတာ၊ အထည်စံချိန် အဆမတန်တောင်းတာ၊ ခွင့်ရဖို့ ခက်ခဲတာ၊ အချိန်ပို အတင်းအကျပ် ခိုင်းတာ၊ အချိန်ပိုမဆင်းပါက အလုပ်မလာနဲ့ဆိုပြီး ခြိမ်းခြောက်တာ၊ မန်နေဂျာ အမျိုးသမီးကိုယ်တိုင် ရိုင်းစိုင်းစွာဆဲဆိုတာ၊ သန့်ရှင်းတဲ့ သောက်ရေမရတာ၊ သန့်စင်ခန်းတွေ သန့်ရှင်းမှု မရှိတာ၊ စက်ရုံ သန့်စင်ခန်း၊ အမှိုက်နဲ့ စွန့်ပစ်ပစ္စည်းတွေရဲ့ အနံဆိုးတွေ နေ့စဉ် ရှုရှိုုက်ရတာ၊ အချိန်ပိုအတွက် ၁၅ မိနစ် အနားပေးပေမဲ့ တချို့စက်လိုင်းတွေ ဖိအားပေး ဆက်ခိုင်းခံရတာ၊ အစမ်းခန့်ကာလ ကျော်ပေမဲ့ EC စာချုပ် ချုပ်မပေးတာတွေ ကြုံတွေ့နေရတယ်လို့ အလုပ်သမားတွေက ပြောပါတယ်။
လက်ရှိ XINGYUAN(Myanmar) စက်ရုံမှာ အလုပ်သမား ၅၀၀ ဝန်းကျင် လုပ်ကိုင်နေပြီး RESERVE, Sinsay, GUESS စတဲ့ တံဆိပ်တွေနဲ့ ဂျပန်အော်ဒါအထည်တွေ ချုပ်လုပ်နေတာကို Myanmar Labour News က သိထားပါတယ်။
