ရက်သတ္တပတ် တပတ်ကို နာရီ ၈၀ ကျော် အလုပ် လုပ်ကိုင်ခိုင်းစေနေတဲ့ W&F GROUP အထည်ချုပ် စက်ရုံ တာဝန်ရှိ သူတွေဟာ စက်ရုံကို အလုပ်သမားရုံး တာဝန်ရှိသူတွေ ဝင်ရောက်စစ်ဆေးပြီးနောက် ၃ ရက်ကြာမှာ အချိန်ပို ပြန်လည် လုပ်ကိုင် ခိုင်းနေတာ ၆ ရက်ရှိပြီလို့ စက်ရုံအလုပ်သမားတွေက ဇူလိုင်လ ၁ ရက်က ပြောပါတယ်။
“ ပြီးခဲ့တဲ့အပတ်က သောကြာ၊ စနေ၊ တနင်္ဂနွေ သုံးရက်လောက် နားလိုက်ရတယ် ။ တနင်္လာ အလုပ်ဆင်းတဲ့ ရက်ကစပြီး ည ၈ နာရီခွဲမှ ပြန်ရတယ်။ ဒီတပတ်ထည်းမှာပဲ အချိန်ပိုက ၂၅ နာရီ လုပ်ခဲ့ရတယ်။” လို့ စက်ရုံ အလုပ်သမား အမျိုးသမီး တစ်ဦးကပြောပါတယ် ။
SYLVIE MEIS အမှတ်တံဆိပ် အထည်တွေချုပ်လုပ်တဲ့ W&F GROUP CO.,LTD စက်ရုံမှာ တရက်ကို အလုပ်ချိန် ၁၂ နာရီနဲ့ ၇ ရက် တပတ်ကို နာရီ ၈၀ လောက် လုပ်ကိုင်နေရလို့ ပြီးခဲ့တဲ့ ဇွန်လ နောက်ဆုံးအပတ်ထဲမှာ ရွှေပြည်သာမြို့နယ် အလုပ်သမားရုံးတာဝန်ရှိသူတွေက ဝင်ရောက်စစ်ဆေးခဲ့ပါတယ်။
အဲဒီလို စစ်ဆေးခဲ့ပေမဲ့ စက်ရုံတာဝန်ရှိသူတွေက ၃ ရက်သာ အချိန်ပိုရပ်နားခဲ့ပြီးနောက် ဇွန်လ ၂၆ ရက်ကစလို့ ည ရှစ်နာရီခွဲအထိ လုပ်ကိုင်ခဲ့ရတယ်ဆို အလုပ်သမားတွေက ပြောပါတယ်။
“ အဲလို အချိန်ပိုပြန်လုပ်ရနေရတုန်းမှာပဲ ဇွန်လ ၃၀ ရက်မှာ အလည တိုင်းဦးစီးမှူးပါတဲ့ စစ်ဆေးအဖွဲ့က စက်ရုံ ကို လာ စစ်တယ်။ အဲ့နေ့မှာတော့ ည ၇ ခွဲအထိ ဆင်းရတယ်။ အဲ့ကနေ စနေအထိ ည ၇ ခွဲတွေ ဆက်ဆင်း ခဲ့ရတာ” လို့ စက်ရုံအလုပ်သမားတွေက ပြောပါတယ်။
အလုပ်သမားဥပဒေတွေအရ တပတ်အတွက် အလုပ်ချိန်နဲ့ အချိန်ပို စုစုပေါင်း နာရီ ၆၀ သာ လုပ်ကိုင်ခွင့်ပြုထားပြီး အချိန်ပိုအနေနဲ့ ၇ ရက် တပတ်ကို နာရီ ၂၀ သာ လုပ်ကိုင်ဖို့ သတ်မှတ်ထားတယ်လို့ အလုပ်သမားရေး ကူညီပေးသူ တဦးက ပြောပါတယ်။
အချိန်ပိုတွေ ဆက်တိုက်လုပ်ကိုင်နေရတာကြောင့် အလုပ်သမားတွေမှာ စိတ်ပိုင်း၊ ရုပ်ပိုင်း ကြံ့ခိုင်မှုအားနည်းလာတာကို အခုလို့ ပြောပြပါတယ်။
“ဒီလို ရက်ဆက် အချိန်ပို ဆင်းရတာ ၃ လ ကျော်လာပြီး ။ အလုပ်လုပ်ရတာ စိတ်လည်း မပါတော့ဘူး။ စက်ရုံ ဘက်က မလုပ်နိုင်တဲ့သူ မလုပ်နဲ့လို့ပြောတယ်။ ဒါပေမဲ့ ဖိအားတွေရှိတယ်။ ဝမ်းရေးလည်း ရှိတယ် ။ အချိန်မဆင်း လို့ ထွက်ချင်ထွက်ဆိုတာတွေကို စက်ရုံဘက်က ပြောတယ်။ ခေါင်းဆောင်တွေ ပြောဆိုတာတွေ၊ နောက် ခွဲခြားတာတွေက စိတ်အခန့်မသင့်ရင် ဘယ်လိုမှ အဆင်မပြေဘူး။ ပြီးတော့ လူက မလန်းဆန်း တော့ဘူး။”လို့ W&F GROUP စက်ရုံ အလုပ်သမားတစ်ဦးက ပြောဆိုပါ တယ်။
အချိန်များစွာ အချိန်ပိုလုပ်ကိုင်နေရတဲ့အကြောင်း အလုပ်သမားရုံးတာဝန်ရှိသူတွေကို မကြာခဏ တိုင်ကြားခဲ့လို့ ဝင်ရောက်စစ်ဆေးပေမဲ့ စက်ရုံဘက်က အပြောင်းအလဲမရှိသလို စက်ရုံတာဝန်ရှိသူတွေက အလုပ်နဲ့ပတ်သက် ပြီး ခြိမ်းခြောက်ပြောဆိုမှုတွေ ပိုများလာတယ်လို့လည်း ကိုယ်တိုင်ကြားသိခဲ့ရတဲ့ အလုပ်သမားတစ်ဦးက ပြောပါ တယ်။
W&F GROUP CO.,LTD ရဲ့ စက်ရုံကတော့ ရန်ကုန်မြို့၊ ရွှေပြည်သာမြို့နယ်၊ ဝါးတရာ စက်မှုဇုန်၊ သံဒင်းလမ်းမှာ ရှိပြီး လုပ်သားအင်အား ၈၀၀ ဝန်းကျင်နဲ့ အထည်ချုပ်လုပ်ငန်း လုပ်ကိုင်နေတယ်လို့ သိရပါတယ်။
#MyanmarLabourNews
