ရန်ကုန်တိုင်း လှိုင်သာယာစက်မှုဇုန် ၅ မှာရှိတဲ့ "Wan Xin" အထည်ချုပ် စက်ရုံမှာ အလုပ်သမားတွေကို ကြိုတင်အကြောင်းကြားခြင်းမရှိဘဲ စက်ရုံလုပ်ငန်းတွေ ရပ်ဆိုင်းခဲ့တာကြောင့် အခက်အခဲနဲ့ ရင်ဆိုင်နေရတယ်လို့ အလုပ်သမားတွေက ပြောပါတယ်။

 

စက်ရုံမှာ လွန်ခဲ့တဲ့ ခုနှစ်လပိုင်းကတည်းက အော်ဒါပြတ်လပ်ခဲ့ပြီး နောက် စက်ရုံလုပ်သား ၃၅၀ ဝန်းကျင်ကို လျှော့ချခဲ့တယ်လို့လည်း အလုပ်သမားတွေက ပြောပါတယ်။

 

စက်ရုံထဲက စက်ပစ္စည်းတွေကို သြဂုတ်လ ကတည်းက စတင်ရွှေ့ပြောင်းခဲ့ပြီး စက်တင်ဘာလမှာတော့ လုံးဝရွှေ့ပြောင်းပြီးစီး သွားတယ်လို့လည်း ဆိုပါတယ်။

 

“လက်ရှိတော့ စက်ရုံကို လေးရက် ပိတ်လိုက်ထားတယ်၊ ကြိုတင် အကြောင်းကြားတာမရှိဘူး။ စက်ရုံပိုင်ရှင် ပါ ထွက်ပြေးသွားပြီထင်တာပဲ။ ကိုးလပိုင်း လစာတွေ လျှော့ပေးခဲ့တယ်။ ပုံမှန် ငါးသိန်းရရင် သုံးသိန်း၊ နှစ်သိန်း၊ နှစ်သိန်းခွဲလောက်ပဲ ရခဲ့တယ်။” လို့ အလုပ်သမားတွေက ပြောပါတယ်။

 

လက်ရှိ မှာ ကြီးကြပ်ရေး စူပါနှစ်ဦး နဲ့ အလုပ်သမား ၁၅၀ ကျော်ပဲ စက်ရုံမှာ ကျန်ရှိနေတယ်လို့ သိရပါတယ်။

လျော်ကြေးပေး ရမှာကို ရှောင်ရှားလိုတာကြောင့် အလုပ်သမားတွေကို စက်ရုံဘက် တဖြည်းဖြည်း လျှော့ချခဲ့ပြီး စိတ်ဓါတ် ကျအောင် ရည်ရွယ်လုပ်ဆောင်ခဲ့တယ်လို့ အလုပ်သမားတွေက ပြောပါတယ်။

 

“ဖယ်ရီကား မပေးဘဲ ပြန်လွှတ်တယ်။ ဥပဒေအတိုင်းမလုပ်ဘဲ အကြမ်းဖက်တယ်။ ရဲခေါ်၊ စစ်တပ် ခေါ် ရိုက်နှက်တာတွေ လုပ်ခဲ့တယ်တယ်။” လို့ ပြောပါတယ်။

 

ရုတ်တရက် စက်ရုံပိတ်သိမ်းလို့ လက်ရှိအခြေအနေတွေကို မသိရှိရဘဲ အလုပ်သမားတွေမှာ တခြားအလုပ်ရှာဖို့ ၊ စားသောက်စာရိတ်အတွက်နဲ့ အခက်အခဲတွေပါ ကြုံတွေ့နေရတယ်လို အလုပ်သမားတွေက ပြောပါတယ်။

 

“အလုပ်သမားတွေ အားလုံးလောက်က နယ်ကပါ။ လက်ရှိက တစ်ယောက်ကို နေထိုင် စားသောက်စာရိတ်က တစ်နေ့ အနည်းဆုံး တစ်သောင်းခွဲလောက်ရှိတယ်။ တစ်လ လေးသိန်း၊ ငါးသိန်း ကုန်တယ်။ နှစ်သိန်း၊ သုံးသိန်းဆိုတာ ဘယ်လိုမှ မဖြစ်နိုင်ဘူး။ စားစရာမရှိလို ငိုနေသူတွေတောင် ရှိတယ်။” လို့ ပြောပါတယ်။

 

လက်ရှိ အခြေအနေတွေကို လှိုင်သာယာမြို့နယ် အလုပ်သမားဦးစီးဌာနကို တိုင်ကြားထားပေမဲ့ စက်ရုံကို လာရောက် ဖြေ

ရှင်းပေးတာမျိုး မရှိသေးဘဲ အောက်တိုဘာ ၉ ရက်မှ လာရောက်ရှင်းပေးမယ်လို့တာဝန်ရှိသူတွေက ပြောကြားထားတယ်လို့ အလုပ်သမားတွေက ပြောပါတယ်။

 

“စက်ရုံပိတ်သိမ်းမယ်ဆိုလည်း ရှင်းရှင်းလင်းလင်း ကြိုတင်အကြောင်းကြားပေး၊ နောက် ဥပဒေအတိုင်း လျော်ကြေးပေး ဖို့ပဲ၊ အလုပ်သက်အလိုက် လစာ အလိုက်သတ်မှတ်ထားသော လျော်ကြေး ပေးဖို့ တောင်းဆိုတာပါ။” လို့ အလုပ်သမားက ပြောပါတယ်။

 

စက်ရုံ အလုပ်ရုံ လုပ်ငန်းတွေအနေနဲ့ လုပ်ငန်းပိတ်သိမ်းလိုပါက ဂုဏ်သိက္ခာရှိစွာနဲ့ အလုပ်သမားတွေကို ကြိုတင်အသိပေးဖို့ ၊ ပေးလျော်စရာရှိတာတွေကို ပေးလျော်ဖို့ လိုအပ်ပြီး ဒါမှသာ အလုပ်သမားတွေက ကြိုတင်ပြင်ဆင်မှုတွေပြုလုပ်နိုင်မှာလို့လည်း အလုပ်သမားအရေးလှုပ်ရှားသူက အကြံပြုထားပါတယ်။

 

"စက်ရုံပိတ်သိမ်းမယ်ဆိုရင်လည်း အလုပ််ရှင်ဖြစ်တဲ့အားလျော်စွာ ဂုဏ်သိက္ခာရှိစွာ ကြိုတင်အကြောင်းကြားရမယ် ဥပဒေနဲ့အညီ ပေးစရာ ‌လျော်စရာရှိတာတွေကိုလည်းပေးလျော်ရမှာဖြစ်ပါတယ်" လို့ မြန်မာနိုင်ငံ ကုန်ထုတ်နှင့်စက်မှုလက်မှုအလုပ်သမားများအဖွဲ့ချုပ် IWFM မှ တာဝန်ရှိသူတဦးကပြောပါတယ်။

 

“ဗုဒ္ဓဟူးနေ့မှာ စက်ရုံပြန်ဖွင့်ခြင်းရှိ/မရှိ ကြည့်မယ်၊ လှိုင်သာယာလေဘာရုံးကနေ လိုအပ်ရင် နေပြည်တော်အထိ တောင်းဆိုမှာပါ။” လို့ အလုပ်သမားတွေက Myanmar Labour News ကို ပြောဆိုထားပါတယ်။