ရွှေပြည်သာမြို့နယ်၊ ဝါးတရာစက်မှုဇုန်တွင် ရှိသော W & F အထည်ချုပ်စက်ရုံမှာ အချိန်ပို အလွန်အကျွံ ခိုင်းစေနေတယ်လို့ အလုပ်သမားတွေက ပြောပါတယ်။ စက်ရုံဘက်က ည ၉ နာရီနဲ့ အောင်လင်းတွေ ခိုင်းစေနေတာလို့ အလုပ်သမားတွေက ပြောပါတယ်။
“ အချိန်ပိုတွေခိုင်းရင် ၉ နာရီအထိဆို ၆ နာရီမှာ အနားပေးတယ်။ အော်လင်းဆို ည ၇ နာရီမှာ အနားပေးတယ်။ နာရီဝက် နားပေးတယ်။ ၉ နာရီဆိုပြီး အောလင်းလင်းဆင်းခိုင်းရင် ထမင်းထွက်မစားတော့ဘဲနေတဲ့ အလုပ်သမားတွေ အငတ်ခံရတာ။ အဆင်မပြေဘူးပေါ့” လို့ ပြောပါတယ်။
စနေနေ့ အောလင်းခိုင်းစေခဲ့ ၃ ပတ်ရှိပြီး မတ် ၂၁ ရက်မှာတော့ ည ၉ နာရီအထိ ခိုင်းစေခဲ့တယ်လို့ အလုပ်သမား တွေက ပြောပါတယ်။ မြန်မာနိုင်ငံရဲ့ အလုပ်သမားဥပဒေအရ အလုပ်ချိန် ၅ နာရီ ဆက် လုပ်ကိုင်ခိုင်းပြီး နာရီဝက် ပေးနားဖို့ နဲ့ အချိန်ပိုကို တစ်ပတ် နာရီ ၂၀ ပဲ ခိုင်းစေဖို့ ပြဌာန်းထားတာပါ။
“စနေနေ့ အောလင်းဆင်းဖို့ စက်ရုံက WCC ကိုယ်တိုင်က လက်မှတ်ထိုးပြီး ကိုယ်တိုင်အလုပ်ဆင်းကြတယ်။ အချိန်မဆင်းလိုဘူးဆိုရင် ညီမတို့က ဘယ်သူကို သွားပြောရမလဲ” လို့ ပြောပါတယ်။
W & F Group Co., Ltd အထည်ချုပ်စက်ရုံက ၁၉၅၁ ခုနှစ်၊ အလုပ်ရုံများအက်ဥပဒေ ပုဒ်မ ၅၉၊ ၆၃၊ ၆၄၊ ၇၁ တွေကို ချိုးဖောက်ခဲ့ပြီး ပုဒ်မ ၈၅ နဲ့ တရား စွဲမယ်လို့ ၂၀၂၃ ခုနှစ်မှာ ဝန်ကြီးဌာနက ထုတ်ပြန်ခဲ့ဖူးပါတယ်။
W & F Group Co., Ltd ကုမ္ပဏီပိုင် အထည်ချုပ် စက်ရုံဟာ တရုတ်နိုင်ငံသားပိုင်ဖြစ်ပြီး စက်ရုံကတော့ ရန်ကုန်တိုင်းဒေသကြီး၊ ရွှေပြည်သာမြို့နယ်၊ ဝါးတရာ စက်မှုဇုန်၊ သိမ်ချောင်းလမ်းမှာ ရှိပါတယ်။ လုပ်သားအင်အား ၈၀၀ ဝန်းကျင်နဲ့ လုပ်ငန်း လည်ပတ် နေတယ်လို့ Myanmar Labour News ရဲ့ အချက်အလက်တွေအရ သိရပါတယ်။
