Victor House Co.Ltd အထည်ချုပ်စက်ရုံ လုပ်ငန်းခွင်အတွင်း ခွင့်ရက် နဲ့ ခွင့်ခံစားခွင့်တွေကို ခွဲခြားပေးပြီး ရက်ပျက်ပါက ခံစားခွင့်တွေ ဖြတ်တောက်ခံရတယ်လို့ မြန်မာနိုင်ငံကုန်ထုတ်နှင့် စက်မှုလက်မှုအလုပ်သမားများအဖွဲ့ချုပ်(IWFM) ကို အလုပ်သမားတွေက ပြောပါတယ်။
“အလုပ်သမားတွေ နေထိုင်မ ကောင်းလို့ ရက်ပျက်ရင်လဲ ပြောဆိုခံရတယ်။ ခွင့်ဆို ပေးချင်ရတယ်၊ သူတို့ မပေးရင် မရဘူး။ ခွင့်ပေးရင်လည်း ဒေးကြေးတစ်ခုပဲ ပေးတယ်။ တခြားခံစား ခွင့်ဆို အကုန်ဖြတ်တယ်။ ခွင့်ရတယ်ဆိုတာ အောစူပါ၊စူပါတွေနဲ့ အဆင်ပြေမှ ရတယ်” လို့ အလုပ်သမားတွေက ပြောပါတယ်။
အလုပ်တရက်ပျက်ပါက ကျပ် ငါးသောင်း နစ်နာရတယ်လို့လည်း အလုပ်သမားတွေက ပြောပါတယ်။ အထည်စံချိန် တနာရီ အထည် ၆၀ အထိ တောင်းခံတာကြောင့် အလုပ်သမားတဦးကို ပွိုင့် နှစ်မျိုးသုံးမျိုး အထိ ချုပ်လုပ်နေရတယ်လို့လည်း အလုပ်သမားတွေက ပြောပါတယ်။
“အထည်စံချိန် အလုပ်သမား ၃၀ ကို တစ်နာရီ အထည် ၆၀အထိ တောင်းတယ် ။ အလုပ်သမားတစ်ယောက်ကို နှစ်ပွိုင့်မှသုံးပွိုင့်အထိ ချုပ်လုပ်ရတာ၊ ပဲထည်ကျရင် အောစူပါ၊ စူပါတွေက အော်ဟစ် ဆဲတယ်။ လီတာက ပိုဆိုးတယ်။ ပဲထည်ကျ ဆဲ စတိုင်ချိန်းလည်း ဆဲ၊ ချုပ်ရတာ ဘောင်း ဘီ၊ အင်္ကျီတွေ၊ bbအထည်က အများဆုံးချုပ် ရတယ်။” လို့ ပြောပါတယ်။
လုပ်ငန်းခွင်ထဲ အထည်ကို ဓါတ်ပုံရိုက်ပြီး အခြားစက်ရုံတွေကို ပြမှာ စိုးလို့ ဆိုပြီး အလုပ်သမားတွေကို ဖုန်းကိုင်ခွင့်မပေးတာကြောင့် အရေးပေါ် ဆက်သွယ်ဖို့ အခက်အခဲတွေ ရှိနေတယ်လို့လည်း အလုပ်သမားတွေက ပြောပါတယ်။
Victor House Co.Ltd အထည်ချုပ်စက်ရုံကို တရုတ်နိုင်ငံသားပိုင်ဆိုင်ပြီး ရန်ကုန်မြို့၊ လှိုင်သာယာမြို့နယ်၊ အောက်ထိပ်မှာ ဖွင့်လှစ် လုပ်ကိုင်နေပါတယ်။ လက်ရှိ လုပ်သား ၉၀၀ ဝန်းကျင်က အထည်တွေကို ချုပ်လုပ်နေတယ်လို့ အလုပ်သမားတွေက ပြောဆိုထားပါတယ်။
