Tianjin Fashion Milestone စက်ရုံက အထည်တွေကို အပေါ်ထပ်ဆီ ထမ်းတင် ထမ်းချတာတွေ လုပ်ကိုင်ခိုင်းနေတယ်လို့ အလုပ်သမားတွေက ပြောပါတယ်။ စက်ရုံမှာ A ရုံနဲ့ B ရုံ ဆိုပြီး နှစ်ရုံ ဖြစ်ပြီး နှစ်ထပ်ရုံတွေ ဖြစ်တယ်လို့ သိရပါတယ်။
“Aရုံမှာက ဓာတ်လှေကားရှိတယ်။ Bရုံ မှာ ကမရှိပါဘူး ။ ထမ်းချထမ်းတက်လုပ်ရပါတယ်။အမျိုးသားတွေ နေတိုင်း လုပ်နေရတာ။ တခါတလေအမျိုးသမီးတွေလည်း လုပ်ရတယ်။
အလုပ်ကြမ်းသမားတွေလို အင်းအားနဲ့ထမ်းတင်ထမ်းချက နေတိုင်းပဲ လုပ်နေရတာပါ။” လို့ ပြောပါတယ်။
HR ဌာနကို တင်ပြပေမဲ့ နေရာကျဉ်းလို့ဆိုပြီး စီစဉ်ပေးတာ မရှိဘူးလို့လည်း အလုပ်သမားတွေက ပြောပါတယ်။
ထမ်းတင် ပေးရတာက အထည်တွေ ဖြစ်ပေမဲ့ မတော်တဆ ဖြစ်ပွားပါက နစ်နာမှုတွေ ရှိမှာကို စိုးရိမ်တယ်လို့ အလုပ်သမားတွေက ပြောပါတယ်။
“ခြေချော်ပြီးတခုခုဖြစ်ခဲ့ရင် အလုပ်သမားတွေပဲ နစ်နာရမှာ။ မချုပ်ရသေးတာတွေကိုထမ်းတင်ရတယ် ။ စက်လိုင်းကချုပ်ပြီးသားအထည်တွေကို ပြန်ထမ်းချရတယ်။ မိန်းကလေးတွေလည်း QC အလုပ်နဲ့ဝင်ပြီး၊ အထည်မစစ်ရဘဲ အထုတ်ဆွဲခိုင်း၊ လှည်းတွေ တွန်းခိုင်းပါတယ်။ “ လို့ အလုပ်သမားတွေက ပြောပါတယ်။
Finshin ဋ္ဌာနက အလုပ်သမား အမျိုးသမီးနဲ့ အမျိုးသားတွေကို လုပ်ကိုင်ခိုင်းနေတာလို့ သိရပါတယ်။ တနင်္ဂနွေ အချိန်ပို အတင်းအကျပ်ဆင်းခိုင်းပြီး အထည်စံချိန်ကို စက်လိုင်း စူပါတွေက ဆဲဆိုပြီးတောင်းတယ်လို့ အလုပ်သမားတွေက ပြောပါတယ်။
“ တနင်္ဂနွေဆိုလည်း အချိန်ပိုအတင်းကို ဆင်းခိုင်းတာ၊ အလုပ်မားတွေကို ခြိမ်းခြောက်ပြီးပြောတော့ ကြောက်လို့ ဆင်းပေးရတယ်၊ အထည်စံချိန်တွေ မတရားတောင်းတယ်၊ မရရင်တာနဲ့ ဆဲတာပဲ။ အထည်ပြည့်တော့ ဆုကြေး မပေးဘူး။ လူဦးရေနဲ့ တောင်းတာ၊ တဦးကို တစ်နာရီ ၁၀ ထည်မပြည့်လို့ဆိုပြီး မပေးပြန်ဘူး။ အလုပ်သမားတွေ အတွက် စက်ရုံက ပြည့်စုံတာလည်း မဟုတ်ဘူး” လို့ ပြောပါတယ်။
စက်ရုံမှာ လုပ်သား ၁၄၀၀ ကျော် ရှိပေမဲ့ သန့်စင်ခန်း ၁၀ လုံးကျော်ကလည်း အမြဲ ညစ်ပတ်ပြီး လုံခြုံမှုမရှိဘူးလို့ အလုပ်သမားတွေက ပြောပါတယ်။ ဒါ့အပြင် အရေးပေါ်သုံး ဆေးပစ္စည်းတွေကလည်း မရတာက များနေတယ်လို့ ပြောပါတယ်။
“အောတစ်(စစ်ဆေးရေး) ရှိမှ သူနာပြုက ဆေးပုံးတွေ လိုက်ထည့်တာ။ သူနာပြုရှိလည်း ဆေးတောင်းရင် မပေးချင်ပေးချင်နဲ့ပေးတယ်။ ဆေးက ကုန်နေတာကများတယ်။ Aရုံ ပေါ်မှာ အိမ်သာက သုံးလုံး၊ အောက်မှ လေးလုံး၊ Bရုံမှာ အမျိုးသား အိမ်သာ ၅ လုံး ပဲရှိတာ။ အမြဲ နံစော်နေတော့တာ။” လို့ ပြောပါတယ်။
Tianjin Fashion Milestone အထည်ချုပ်စက်ရုံက ရန်ကုန်မြို့၊ လှိုင်သာယာမြို့နယ်၊ ရွှေလင်ဗန်းစက်မှုဇုန်၊ ဆိပ်ကမ်းသာလမ်းမှာ ရှိတဲ့ တရုတ်နိုင်ငံသားပိုင် စက်ရုံဖြစ်ပါတယ်။
