ဒေးကြေးတိုးပေးဖို့ Tianjin Fashion Milestone Garment အလုပ်သမားတွေတောင်းဆိုမှုကို စက်ရုံဘက်က လိုက်လျောလိုက်တာကြောင့် မနက်ဖြန် မေ ၂၁ ရက်မှာ လုပ်ငန်းခွင် ပြန်လည်ဝင်ရောက်ကြမှာလို့ ပြောပါတယ်။ မေ ၁၆ ရက်မှာ လုပ်ငန်းခွင်ရပ်နားပြီး စတင် တောင်းဆိုခဲ့တာဖြစ်ပြီး ၄ ရက်မြောက်နေ့ ညှိနှိုင်းမှုအပြီးမှာ နှစ်ဖတ်သဘောတူနိုင်ခဲ့တာလို့ နီးစပ်သူတွေက ပြောပါတယ်။
“ဒီကနေ့ နေ့ ၁ နာရီခွဲလောက်မှာ ညှိနှိုင်းခဲ့ပြီး ၂ နာရီခွဲလောက်မှာ နှစ်ဖက်သဘောတူနိုင်ခဲ့တာပါ။ တောင်းထားတဲ့ အတိုင်း နေ့တွက် ဒေးကြေးက ကျပ် ၁၀၀၀၀ နဲ့ အိုတီကို တစ်နာရီ ၂၀၀ ပေါင်းပြီး ၂၂၀၀ တိုးပေးလိုက်တယ်။ အလုပ်သမားတွေ ညီလို့ ရတာပါ။ မနက်ဖြန် အလုပ် ပြန်လုပ်ကြမှာ” လို့ ပြောပါတယ်။
စက်ရုံဘက် ဒေးကြေး ၈၈၀၀ နဲ့ အိုတီ တနာရီ ကျပ် ၂၀၀၀ ပဲ ပေးခဲ့တာကြောင့် အလုပ်သမားတွေက ဒေးကြေး ကျပ် ၁၃၀၀၀ နဲ့ အချိန်ပိုကြေးကိုပါ တိုးပေးဖို့ တောင်းဆိုခဲ့တာဖြစ်ပါတယ်။ အလုပ်ရပ် တောင်းဆိုမှုအတွင်း စက်ရုံလုပ်သား ၁၀၀၀ ကျော်ပါဝင်ခဲ့ပြီး ဒေးကြေးနဲ့ အချိန်ပိုကြေးတွေတိုးပေးဖို့ကို အလုပ်သမား ၇၀၀ နီးပါးက လက်မှတ်ထိုးတောင်းဆို ခဲ့ကြပါတယ်။
တောင်းဆို ညှိနှိုင်းမှု ၄ ရက်အတွင်း စစ်ကောင်စီရဲ့ လက်နက်ကိုင်တပ်ဖွဲ့တွေ စက်ရုံရှေ့ ရောက်လာသလို အလုပ်သမားဝန်ကြီးဌာန ဒုဝန်ကြီးလည်း တောင်းဆိုမှုပြုလုပ်နေတဲ့ အလုပ်သမားတွေနဲ့ တွေ့ဆုံခဲ့ ပါတယ်။
“ ခြိမ်းခြောက်မှုတွေကတော့ အမျိုးမျိုးပါပဲ။ စက်ရုံမလာကြဖို့တို့၊ လက်နက်ကိုင်တွေ စက်ရုံထဲ ဝင်မှာတို့ အမျိုးမျိုး ပြောခဲ့တာ။ လုပ်ဖော်ကိုင်ဖက်တွေရဲ ဆန္ဒနဲ့ပဲ အခုလို တောင်းဆိုတာကို ရခဲ့တာ” လို့ အလုပ်သမားတဦးက ပြောပါတယ်။
Tianjin Fashion Milestone Garment အထည်ချုပ် စက်ရုံကို တရုတ်နိုင်ငံသားပိုင်ဆိုင်ပြီး ရန်ကုန်မြို့၊ လှိုင်သာယာမြို့နယ်၊ ရွှေလင်ဗန်းစက်မှုဇုန် ၊ ဆိပ်ကမ်းသာလမ်းမှာ ဖွင့်လှစ်လုပ်ကိုင်နေပါတယ်။ လုပ်သား ၁၀၀၀ ဝန်းကျင်လုပ်ကိုင်နေပြီး VERO MODA အမှတ်တံဆိပ် ချုပ်နေတယ်လို့ သိထားပါတယ်။
