ရွှေပြည်သာမြို့နယ် ဝါးတရာစက်မှုဇုန်၊ မြေတိုင်းအမှတ်- ၄၉ လမ်း ၊ အမှတ်-ရှိ Tai Hong Garment အထည်ချုပ်စက်ရုံက အလုပ်သမားတွေဟာ ဆိုးဆိုးရွားရွားခြိမ်းခြောက်ခံရမှုကို အလုပ်သမားရုံးသို့ တိုင်ကြားခဲ့လို့ ညှိနှိုင်းရာ ပြေလည်မှုရရှိခဲ့တယ်လို့ သိရပါတယ်။
အလုပ်သမားတွေဟာ အလုပ်ရှင်ထံသို့ စက်ရုံကနိုင်ငံခြားသားအတတ်ပညာရှင်များက အလုပ်သမားကိုတိုက်ရိုက်မအုပ်ချုပ်ဖို့နဲ့ ရိုင်းစိုင်းစွာပြောဆိုဆက်ဆံခြင်းမပြုရန်၊ အလုပ်ရှင်ရောအလုပ်သမားရောနှစ်ဦးနှစ်ဖက်လုံးက အလုပ်ခန့်ထားမှုဆိုင်ရာသဘောတူစာချုပ်အပေါ် လေးစားလိုက်နာရန် နဲ့ အလုပ်သမားများအပေါ် အငြိုးအတေးထားကာ ခွဲခြားဆက်ဆံခြင်းမပြုလုပ်ဖို့ကို အလုပ်ရှင်အလုပ်သမားညှိနှိုင်းသဘောတူညီပြီး အဆင်ပြေစွာစာချုပ်ချုပ်ဆိုခဲ့တယ်လို့ သိရပါတယ်။
အဆိုပါစက်ရုံက အလုပ်သမားတွေဟာ လုပ်ခလစာအပြည့်မရဘဲ လုပ်အားခတွေခေါင်းပုံ ဖြတ်ခံနေရတာ၊ အထည်စံချိန်မတရားတောင်းနေတာတွေနဲ့ အချိန်ပိုကို အလုပ်သမားသဘောဆန္ဒမေးမြန်းမှုမရှိဘဲ အတင်းအကျပ်ဆင်းခိုင်းတာတွေအပါအဝင် နေ့စားတွေကိုပိတ်ရက်မပေးတာတွေနဲ့ နေ့စားအလုပ်သမားတွေကိုဖြုတ်ချင်သလိုဖြုတ်နေတာတွေအပြင် ဥပဒေပါခွင့်ခံစားခွင့်တွေမပေးတာတွေကြောင့် တိုင်ကြားမှူတွေပြုလုပ်ထားတယ်လို့ သိရပါတယ်။
လုပ်ငန်းခွင်မှာ စည်းမျဉ်းစည်းကမ်းသတ်မှတ်ရာမှာလည်း အီးစီ စာချုပ်အတိုင်း လုပ်ဆောင်ခြင်းမပြုဘဲ ငွေကြေးဖြတ်တောက်တာတွေ အရင်ဆုံးလုပ်ဆောင်မှုတွေလည်း ပြုလုပ်နေတယ်လို့ ဆိုပါတယ်။
အလုပ်သမားခံစားခွင့်တွေနဲ့ပတ်သက်ပါက ဥပဒေပါခွင့်များခံစားခွင့်မပေးခြင်း၊ ဖူလုံရေး ဆေးခွင့်ယူသော အလုပ်သမားများကိုလဲ ဒေးကြေးများဖြတ်တောက်သလို အလုပ်နေရာပြောင်းရွှေ့တာတွေပါ လုပ်ဆောင်တယ်လို့ သိရပါတယ်။
"ကျွန်တော်တို့သိရသလောက်တော့ အလုပ်သမားရောအလုပ်ရှင်ရော ညှိလိုက်တာအဆင်ပြေသွားပါတယ်ခင်ဗျ။ စာချုပ်လည်းချုပ်ပြီးပါပြီ " လို့ အလုပ်သမားနဲ့နီးစပ်သူက ဆိုပါတယ်။
အခုလို အလုပ်ရှင်အလုပ်သမား ပြေလည်မှုရပြီး စာချုပ်ချုပ်ဆိုခဲ့ရာမှာ မည်သည့်အချက်တွေ ထည့်သွင်းချုပ်ဆိုတယ်ဆိုတာတော့ မသိရပါဘူး။
အဆိုပါစက်ရုံဟာ အလုပ်သမားလူဦးရေ ၁၀၀၀ ကျော်နဲ့ EVERLAST/ DIEM အမည်ရှိ Brand အထည်တွေကို ချုပ်လုပ်နေတယ်လို့လည်းသိရပါတယ်။
စက်ရုံ ဖွင့်သည်မှာ (၁၀)နှစ် ခန့်ရှိပြီးဖြစ်သော်လည်း စက်ရုံမှာ အလုပ်သမားသမဂ္ဂဖွဲ့စည်းထားတာမရှိဘူးလို့ သိရပါတယ်။
လုပ်ငန်းခွင်ဆိုင်ရာ ညှိနှိုင်းရေးကော်မတီ WCC ဖွဲ့စည်းထားပေမဲ့ လုပ်ငန်းခွင်ထဲက အငြင်းပွားမှုတွေနဲ့နစ်နာမှုတွေကို ဖြေရှင်းပေးနိုင်တာမရှိလို့ အလုပ်သမား အများအပြားနစ်နာမှုတွေနဲ့ကြုံတွေ့နေရလို့ WCC ကိုအလုပ်သမားဆန္ဒနဲ့ပြန်လည်ဖွဲ့စည်းပေးဖို့နဲ့ ချိုးဖောက်မှုတွေကို တိုင်ကြားထားတာဖြစ်တယ်လို့ သိရပါတယ်။
