စစ်ကောင်စီက ထုတ်ပြန်ထားတဲ့ အစိုးရရုံး ပိတ်ရက် ၅ ရက် အတွက် ရက်အစား ၃ ရက်လုပ်ကိုင်ပေးရမယ်လို့ Sunrise စက်ရုံတာဝန်ရှိသူက ပြောဆိုတယ်လို့ အလုပ်သမားတွေက ပြောပါတယ်။ အဲဒီ ပိတ်ရက်တွေကို မတ် ၁၂ ကနေ မတ် ၁၆ ရက်အထိ သတ်မှတ်ထားတာ ဖြစ်ပါတယ်။
“အဲ့လို ပိတ်မယ်ဆိုတာကို သဘောတူ လားလို့ ဘယ်သူမှလာမမေးဘူး။ ၅ ရက်ပိတ်တယ် ရက်စား ၃ရက် ပြန်ပေး ရမယ်။ ဘာမှ ရှင်းမပြဘူး။ မပိတ်ရင် စက်ရုံ တရားစွဲ ခံရမှာလား။ အလုပ်သမာတွေဘက်ကို ကြည့် မပေးဘူး။ အစားထိုးရက်တွေ များလို့ အိုတီ နစ်နာရတယ်။” လို့ စက်ရုံအလုပ်သမားတဦးက ပြောပါတယ်။
လက်ရှိ အစားထိုး ပိတ်ရက် တရက်ကို ပုံမှန် အလုပ်ဖွင့်ရက်ဖြစ်တဲ့ မတ်လ ၁၅ ရက် စနေနေ့ သတ်မှတ် ထားတယ်လို့လည်း ပြောပါတယ်။ ဒါ့အပြင် အစိုးရရုံးပိတ်ရက် နှစ်ရက်အစား လာမဲ့ စနေနေ့တွေ ဖြစ်တဲ့ မတ်လ ၂၂ ရက်နဲ့ မတ်လ ၂၉ ရက်တွေမှာ ရက်အစား ဆင်းခိုင်းထားတယ်လို့ အလုပ်သမားတွေက ပြောဆိုပါတယ်။
အလုပ်သမားဥပဒေအရ တပတ် ၄၄ နာရီ ကို သာမန်အလုပ်ချိန်သတ်မှတ်ထားပြီး အဲ့ဒီထက်ပိုတဲ့ အလုပ်ချိန်ကို အချိန်ပို အဖြစ်သတ်မှတ်ထားပါတယ်။ ဒါကြောင့် တပတ်အလုပ်ချိန် ၆ ရက်အတွင်း အလုပ်ချိန် ၄၄ နာရီထက် ကျော်လွန်တဲ့ စနေ့နေ့ နေ့တပိုင်းကို အချိန်ပို အဖြစ်သတ်မှတ် လုပ်ကိုင်ခိုင်းကြတာဖြစ်ပါတယ်။
“သဘောမတူရင် ကြိုက်တဲ့ နေရာတက်တိုင် ဆိုပြီး တောင် မန်နေဂျာက ပြောသေးတယ်။ အစိုးရပိတ်ရက်ဆိုပြီး သူတို့က ပိတ်ချင်တာ ။ အလုပ်သမားတွေက ပိတ်ချင်တာ မဟုတ်ဘူး။ ပိတ်ပေးပါ မတောင်းဆိုထားဘူး။ ဘယ်ရက်နဲ့ အစားထိုးပါတယ်ဆိုတာမျိုး သဘောတူ လက်မှတ် ထိုးရမှကို။ အခုတော့ လာမထိုးခိုင်းဘူး ၊ ဘယ်ရက်တွေ ပြန်ယူမလဲဆို တာလည်း မသိခဲ့ရဘူး "ဟု စက်ရုံ အလုပ်သမားတွေက ပြောပါတယ်။
Sunrise Myanmar Fashion Garment က ရန်ကုန်မြို့၊ ရွှေပြည်သာမြို့နယ်၊ သာဓုကန်စက်မှုဇုန် ၄ ၊ ကျောက်စိမ်း လမ်းမှာ ဖွင့်လှစ်ထားပြီး အလုပ်သမားအင်အား (၁၀၀၀) ကျော်လုပ်နေတဲ့ တရုတ်နိုင်ငံသားပိုင် စက်ရုံ ဖြစ်ပါတယ်။
