ဝါးတရာစက်မှုဇုန် Straightex Myanmar အထည်ချုပ်စက်ရုံမှာ မီးလောင်မှု ဖြစ်ပွားနေတယ်လို့ Myanmar Labour News ကို အလုပ်သမားတွေက ပြောပါတယ်။ မီးလောင်မှုက နေ့လည် ၁၂ နာရီ ၅ မိနစ် ဝန်းကျင်လောက်မှာ စတင်ဖြစ်ပွားခဲ့တာလို့ သိရပါတယ်။
“မီးလောင်မှန်း သိရတာ ညီမတို့ ထမင်းစား ခေါင်းလောင်းတီးလို့ ထမင်းစ စားခါစပဲ ရှိသေးတယ်။ စက်ရုံထဲက မီးခိုးတွေ အများကြီးထွက်လာတာ တွေ့လိုက်ရတယ်။ ဘာတခုမှ မယူနိုင်တော့ဘူး။ အလုပ်သမားတွေလည်း ပြေးလွှားတော့ ထိခိုက်မိတာတွေရှိတယ်။ ဒီတိုင်းထွက်ပြေးခဲ့ရတယ်.” လို့ အမျိုးသမီးအလုပ်သမားငယ် တဦးက ပြောပါတယ်။
မီးစတင်လောင်ကျွမ်းမှုက မီးပူဌာနက ဖြစ်ပြီး စက်ရုံထွက်ပေါက်ငယ်ကနေ မီးခိုး အများအပြား ထွက်လာတာကို တွေ့ခဲ့ရပြီးနောက် အလုပ်သမားအားလုံးထွက်ပြေးခဲ့ရတာလို့ ဆက်ပြောပါတယ်။ စက်ရုံအတွင်း အလုပ်သမား ၉၀၀ ဝန်းကျင်လုပ်ကိုင်နေပြီး စက်ရုံဖွင့်ခဲ့တာ တနှစ်ကျော် ရှိပြီလို့ အလုပ်သမားတွေက ပြောပါတယ်။
“စက်ရုံက နှစ်ထပ် ၊ အောာက်ထပ်မှာ စတိုပစ္စည်းတွေနဲ့ ထုတ်ပိုးပစ္စည်းတွေ ဌာနတွေရှိတယ်။ စက်ရုံက ၇ လပိုင်းမှာ တစ်နှစ်ပြည့်တယ်။ အရေးပေါ်နဲ့ ပတ်သက်တဲ့ သင်တန်းတွေ လေ့ကျင့်တာတွေ ဘာတခုမှ မလုပ်ထားဘူး။ အခုမီးလောင်တော့ မီးသတ်ဗူး ဘယ်နားထားမှန်း မသိလို့ ထွက်ပြေးခဲ့ရတာ။ စနစ်တကျမရှိခဲ့တော့ နစ်နာတာပေါ့ ” လို့ အမျိုးသမီးအလုပ်သမားငယ်က ဆက်ပြောပါတယ်။
လက်ရှိ သတင်းရေးနေတဲ့ အချိန်အထိ မီးလောင်နေဆဲဖြစ်ပြီး ကပ်လျက် အထည်ချုပ်စက်ရုံကို မီးကူးမှုရှိနေတာနဲ့ ထိခိုက်သေဆုံးမှုတွေရှိတယ်လို့ ပြောကြားထားပေမဲ့ အထည်မပြုနိုင်သေးဘူးလို့ ဆက်ပြောပါတယ်။
“ညီမတို့ အခု စက်ရုံကို လှမ်းမြင်နေရတယ်၊ မီးသတ်ကားတွေ အများကြီးပဲ။ မီးက မငြိမ်းသေးဘူးရယ်။ ဘေးရုံတွေကလည်း အထည်ချုပ်တွေရှိတယ်။ အလုပ်သမားတွေတော့ မရှိတော့ဘူး။ စက်ရုံမှာ လူ သေတယ်လို့ ပြောတယ်၊ ပိတ်မိတယ်လို့ ပြောကြတယ်။ ဒါတွေကို ညီမတို့လည်း သေချာ မသိရသေးဘူး။” လို့ အလုပ်သမားတွေက ပြောပါတယ်။
Straightex Co.,ltd အထည်ချုပ်စက်ရုံ လုပ်ငန်းရှင်နဲ့ မန်နေဂျာတွေက တရုတ်နိုင်ငံသားတွေ ဖြစ်ပြီး စက်ရုံက ရန်ကုန်မြို့ ၊ ရွှေပြည်သာမြို့နယ်၊ ဝါးတရာစက်မှုဇုန်၊ ငှက်ပျောတောလမ်းမှာ ရှိပါတယ်။ မီး လောင်ကျွမ်းနေတာ ၃ နာရီကျော် ရှိလာပေမဲ့ မီး ငြှိမ်းသတ်နိုင်မှု မရှိသေးတာကို မြန်မာနိုင်ငံ မီးသတ်တပ်ဖွဲ့ရဲ့ ထုတ်ပြန်ချက်အရ သိရပါတယ်။
