Sheng Jie(Myanmar) Clothing Co.,Ltd အထည်ချုပ်စက်ရုံက မိုအလင်း ရက်ဆက်လုပ်ကိုင်ခိုင်းပြီး လုပ်ငန်းခွင် လိုအပ်ချက်တွေကြောင့် လုံခြုံရေးအခက်အခဲတွေနဲ့ ကြုံတွေ့နေရတယ်လို့ အလုပ်သမားတွေက ပြောပါတယ်။
“အထည် အော်ဒါအရေးကြီးတယ်ပြောပြီးတော့ အချိန်ပိုကို တနင်္ဂနွေနေ့ပါ မနားရဘဲ ဆင်းရတယ်။ တစ်ခါတလေ ဒဘလယ်အောလင်း(၂ရက် ဆက်) ဆင်း ရတယ်။ ။ ညဘက် အချိန်ပိုဆင်းရလို့ အိမ်သာ သွားချင်တာ၊ အခန်းတွေ မီးမရှိတော့ မလုံခြုံသလို ခံစားရတယ်။ ကြောက်လည်း ကြောက်မိတယ်။ အဖော်ခေါ်ပြီး နှစ်ယောက်သွားလည်း မကြိုက်ဘူး။ အပြော အဆို ခံရတယ်။ မီးက အခုအထိကို တပ်မပေးတာ။” လို့ ပြောပါတယ်။
အရေးပေါ်ကိစ္စရှိလို့ အလုပ်သမားတွေ ဂိတ်ပတ်စ်တောင်းတာမရလို့ မိသားစုပြဿနာတွေနဲ့ တွေ့ကြုံနေရတယ်လို့ အလုပ်သမားတွေက ပြောပါတယ်။ အလုပ်သမားတွေကို စက်ရုံဘက်က အထည် စံချိန် အလွန်အကျွံတောင်းခံပြီး စံချိန်မပြည့်ပါက အောစူပါ၊ စူပါတွေက အော်ဟစ် ဆဲဆိုတာ ခံရတယ်လို့ အလုပ်သမားတွေက ပြောပါတယ်။
“စက်တစ်လိုင်း အလုပ်သမား ၅၀ လောက်ကို တစ်နာရီ အနွေးထည် ၄၀ လောက်တောင်းတာ။ အရင်က ၂၅ ထည်လောက်ပဲ တောင်းတာ။ တောင်းတဲ့ စံချိန်က အလုပ်သမားတွေ မချုပ်နိုင်တဲ့ အရေအတွက် ဖြစ်နေပြီ”လို့ အလုပ်သမားတဦးက ပြောပါတယ်။
စက်ရုံဘက်က ဒေးကြေး ကျပ် ၁၀၀၀၀ ၊ ရက်မှန်ကြေး ၂၂၀၀၀ သတ်မှတ် ပေးထားပေမဲ့ အလုပ်သမားတွေဆီက လုပ်ခလစာ ဖြတ်တောက်ခံရတယ်လို့ သိရပါတယ်။
“ပိုက်ဆံတွေ ဖြတ်တယ် ၊ စစ်ကောင်စီဘက်ကို အခွန်ပေးရတယ်ဆိုပြီး ဖြတ်တာ။ အလုပ်သမား တစ်ယောက်ကို အနည်းဆုံး ၅၀၀၀ ကနေ ၅၀၀၀နဲ့ အထက် ဖြတ်ခံရတယ်။ အလုပ်ထဲမှာ အသက်မပြည့်တဲ့ (လူငယ်) အလုပ်သမား ၃၀ လောက်ကို ခိုင်းတာလည်း ရှိတယ်” လို့ အလုပ်သမားတွေက ပြောပါတယ်။
လူငယ်၊ လူရွယ် အလုပ်သမားတွေကို ဆရာဝန်ရဲ့ ဆေးထောက်ခံချက်မပါဘဲ လူကြီးအလုပ်သမားတွေနဲ့ တန်တူ လုပ်ကိုင်ခိုင်းနေတာလို့ အလုပ်သမားတွေက ပြောပါတယ်။
Sheng Jie (Myanmar) Clothing Co.,Ltd အထည်ချုပ်စက်ရုံက Celio၊ H&M တံဆိပ် အထည်တွေချုပ်လုပ်နေပြီး တရုတ်နိုင်ငံသားတဦး ပိုင်ဆိုင်တယ်လို့ သိရပါတယ်။ စက်ရုံအတွင်းအလုပ်သမား ၁၀၀၀ ကျော်လုပ်ကိုင်နေပြီး အလုပ်သမား သမဂ္ဂကို ဖွဲ့စည်းထားတာ မရှိဘူးလို့ အလုပ်သမားတွေက ပြောထားပါတယ်။
