Saung Oo Shwe Nay စက်ရုံဝန်းအတွင်းက A ရုံကို ပြန်ဖွင့်ပေးဖို့ တောင်းဆိုနေတယ်လို့ အလုပ်သမားတွေက ပြောပါတယ်။ A ရုံကို ပြန်မဖွင့်ပေးနိုင်ပါကလည်း တန်ရာတန်ကြေးပေးပြီး အလုပ်ထုတ်ဖို့ တောင်းဆိုထား တယ်လို့ စက်ရုံ အလုပ်သမားတွေက ပြောပါတယ်။
" အလုပ်သမားဆန္ဒကို မမေးဘူး။ မတ် ၂၃ ရက်မှာ ပြောင်းရမယ်ဆိုပြီး အမိန့်ပေးသလိုကြီး ပြောတယ်။ အဲ့ဒီမှာ ပြဿနာ စဖြစ်တယ်။စက်ရုံက WCC ရော၊ သမဂ္ဂရော ရုံးပေါ်တက် ညှိပေးတယ်။ အဆင်မပြေ ဘူး။ နောက် တခေါက်လည်း အဆင်ပြေဘူး ။ GM နဲ့ HR မန်နေဂျာကိုယ်တိုင်က ရုံပြောင်းမဲ့ကိစ္စနဲ့ ပတ်သက်ရင် မညှိတော့ဘူး ဆိုပြီး ပြောတယ်ဆိုပြီး WCC ကရော၊ စက်ရုံ သမဂ္ဂက ပြောတယ်။ “လို့ အလုပ်သမားတဦးက ပြောပါတယ်။
EC စာချုပ်ချုပ်ဆိုထားရာမှာ လိုင်းအမှတ်အလိုက် စာချုပ်ချုပ်ဆိုတားတာဖြစ်ပြီး အလုပ်သမားတွေ လုပ်ကိုင်တဲ့ စက်ရုံ မဟုတ်ဘဲ့ လိုင်းပြောင်းတာ၊ ရုံပြောင်းတာနဲ့ လူဖြည့်တာတွေဟာ စာချုပ် ချိုးဖောက်တာ ဖြစ်တယ်လို့ အလုပ်သမားတွေက ပြောပါတယ် ။ အလုပ်သမားတွေက A ရုံမှာသာ ဆက်လက် လုပ်ကိုင်လိုပြိး ရုံပြန်လည် မဖွင့်ပေးနိုင်ပါလည်း တန်ရာတန်ကြေးပေး အလုပ်ထုတ်ဖို့ကို WCC နဲ့ စက်ရုံသမဂ္ဂ ကတဆင့် ညှိနှိုင်းခဲ့ပေမဲ့ စက်ရုံဘက်က ငြင်းဆန်နေတာကြောင့် အခုလို တောင်းဆို နေတာလို့ အလုပ်သမားတွေ က ပြောပါတယ်။ ဒီလိုတောင်းဆိုတာက ဧပြီ ၆ ရက်နေ့ကတည်း ဖြစ်ပြီး A ရုံပိတ်ထားလို့ စက်ရုံအပြင်ကနေ အလုပ်သမားတွေက တောင်းဆိုနေကြတာလို့ ပြောပါတယ်။
" EC စာချုပ်က လိုင်း အလိုက် စာချုပ်ထားတယ်၊ ဒီကိစ္စက EC စာချုပ် ချိုးဖောက်ခံရတာပါပဲ ။ လေဘာရုံး ကလည်း EC နဲ့ အကြုံးမ၀င်ဘူးလို့ ပြောလိုက်တယ်။ တခုခု အလုပ်သမားဘက် ချိုးဖောက်ရင် ၀မ်တိမ်ထိုးရတာနဲ့ အပြစ်ပေး ရတာနဲ့။ အလုပ်ရှင် ချိူးဖောက်တာကိုတော့ တရားမ၀င်ဘူး၊ အကြုံးမဝင်ဆိုတော့ ဒါက ဖိနှိပ်တာပဲ။” လို့ အလုပ်သမားတွေက ပြောပါတယ်။
၂၀၂၃ ခုနှစ် ဒီဇင်ဘာမှာ စက်ရုံ ပြောင်းမဲ့အကြောင်း အောစူပါတွေကို စက်ရုံဘက်က အသိပေးခဲ့ပြီး B ရုံနဲ့ C ရုံက အလုပ်သမားတွေ A ရုံမှာ လာပေါင်းမယ်ဆိုပြီး ဦးစွာအသိပေးခဲ့တာလို့ အလုပ်သမားတွေက ပြောပါတယ်။
“A ရုံ အလုပ်သမားဆီ B နဲ့ C ရုံက အလုပ်သမားတွေ လာပေါင်းမှာ ဖြစ်လို့ လိုင်းလေးတွေ ပေါင်းပေးပါ။ ဘေး တဘက် တချက်ဆီ ကပ်ပေးပါလို့ မီတင် (Meeting ) ခေါ် ပြောတယ်။ ဒါကြောင့် A ရုံက အလုပ်သမား တွေက လက်ခံဖို့ ပြင်ဆင်ထားပြီးသား၊ ၂၀၂၄ မတ်လ ၂၁ ရက်မှာ Aရုံ အလုပ်သမားတွေကို B ရုံ ကို ပေါင်းပေး ရမယ်။ ၃ ရက် အတွင်း ပြင်ဆင်ပါဆိုပြီး ပြောတယ်။ မတ် ၂၃ ရက်မှာ စက်ပစ္စည်းတွေ အားလုံး ထုတ်ယူသွားတာ၊ ဒါကြောင့် အလုပ်သမားတွေက လက်မခံနိုင် ဖြစ်တာပါ။ “ လို့ အလုပ်သမားတဦးက ပြောပါတယ်။
Saung Oo Shwe Nay စက်ရုံအထည်ချုပ် စက်ရုံရဲ့ A ရုံမှာ စက်လိုင်း ၁၅လိုင်းရှိပြီး အလုပ်သမား ၃၀၀ ကျော် လုပ်ကိုင်နေတနယ်လို့ သိရပါတယ် ။ စက်ရုံတရုံလုံးမှာ အလုပ်သမား ၁၈၀၀ ဝန်းကျင်ရှိပြီး SMOG ၊ H&M နဲ့ DIVIDED တံဆိပ်တွေ ချုပ်လုပ်နေတယ်လို့ သိရပါတယ်။ နောက်ထပ် စက်ရုံခွဲ ၄ ရုံ ရှိပြီး အခုလို အငြင်းပွားမှု ဖြစ်ချိန်မှာ H&M ကုန်အမှတ်တံဆိပ်က တခြားစက်ရုံခွဲကို အထည်တွေ အပ်နှံလိုက်တယ်လို့ အလုပ်သမားတွေက ပြောကြားပါတယ်။
#MyanmarLabourNews
