မှော်ဘီမြို့နယ်ရှိ Pepsi အချိုရည်စက်ရုံတာဝန်ရှိသူတွေကို အလုပ်သမားက တရားစွဲဆိုထားမှုမှာ စက်ရုံ CEO၊ HR ကိုတရားစွဲဆိုထားရုံမက Pepsi ကုမ္ပဏီကိုပါ ထပ်တိုးတရားစွဲဆိုမှုကို ကုမ္ပဏီကချေပလွှာတင်သွင်းခဲ့တယ်လို့ သိရပါတယ်။
"၂၁နေ့ရုံးချိန်းမှာ တရားပြိုင်ဖြစ်တဲ့ ပက်စီဘက်ကပြင်ဆင်ချေပလွှာတင်သွင်းပါတယ်။ နောက်ရုံးချိန်းကိုတော့ ၇ လပိုင်း ၅ ရက်နေ့ပြန်ချိန်းထားတယ်" လို့ အဆိုပါအမှုကိုကူညီဆောင်ရွက်ပေးနေသူက ဆိုပါတယ်။
ပြီးခဲ့တဲ့လမေလ၂၁ရက်နေ့က မှော်ဘီခရိုင် တရားရုံး မှာ ဦးသောင်းဟန် နှင့် Pepsi ရုံးချိန်း တွင် ကုမ္ပဏီအမည်ကိုပါထပ်တိုးတရားစွဲခြင်းအပေါ် တရားပြိုင် ၃ ဦး အတွက် Pepsi ဘက်မှ အမည်စာရင်း တင်သွင်းခဲ့ရာဆုံးဖြတ်ချက်အရ ဒေါ်စုစုမြတ်ကို ကုမ္ပဏီကိုယ်စား စွဲဆိုထားသည့်အမှု တွင်ထုချေခွင့်ပြုခဲ့ရာ ယခုလဇွန်၂၁ရက်နေ့မှာ အဆိုပါအမှုအတွက်ပြင်ဆင်ချေပလွှာတင်သွင်းခဲ့ခြင်းဖြစ်တယ်လို့သိရပါတယ်။
အလုပ်သမားဖြစ်သူ ဦးသောင်းဟန်က စွဲဆိုထားတဲ့ (Pepsi)အမှုကို မှော်ဘီခရိုင်တရားရုံးမှာ နှစ်ဖက်စစ်ဆေးမှုတွေပြုလုပ်ခဲ့ပြီးနောက် ဧပရယ်လ ၃ ရက်နေ့ရုံးချိန်းမှာတော့ တရားသူကြီးက နောက်တိုးတရားပြိုင်အဖြစ် ကုမ္ပဏီကိုပါ တရားစွဲဆိုဖို့အမိန့်ချမှတ်ခဲ့လို့ ကုမ္ပဏီအမည်ကိုပါတရားစွဲဆိုခဲ့ရာ ကုမ္ပဏီဘက်ကပြန်လည်ရင်ဆိုင်နေရခြင်းပဲဖြစ်ပါတယ်။
ရုံးချိန်းကို လာမဲ့ဇူလိုင်လ ၅ရက်နေ့သို့ပြန်လည်ချိန်းဆိုထားတယ်လို့သိရပါတယ်။
အလုပ်သမားဦးသောင်းဟန်ဟာ ၂၀၂၂ခုနှစ် အောက်တိုဘာလ ၃၁ ရက်က အီးစီစာချုပ်နှင့်မညီဘဲ အသက်အရွယ်ကြီးရင့်မှုကြောင့်ဆိုကာ အလုပ်ထုတ်ခံခဲ့ရတာဖြစ်လို့ ညှိနှိုင်းမှုအဆင့်ဆင့်မှာပြေလည်မှုမရခဲ့လို့ ၂၀၂၃ခုနှစ် မတ်လလယ်ရောက်မှသာ အလုပ်သမားကတရားစွဲစေဖို့ ညွှန်ကြားခဲ့တာဖြစ်လို့ တရားစွဲဆိုမှုစတင်တာဖြစ်တယ်လို့ သိရပါတယ်။
ပက်စီအချိုရည်စက်ရုံဟာ နှစ် ၂၀ ကြာ၊ လုပ်သက်ရင့်အလုပ်သမားကိုနစ်နာကြေးမပေးဘဲအလုပ်ထုတ်ထားသလို အရောင်းဝန်ထမ်းတွေကိုလည်း target ပြည့်မီအောင်မရောင်းနိုင်လို့ဆိုကာ လျော်ကြေးမပေးဘဲ အလုပ်ထုတ်တာတွေလည်းရှိခဲ့တာကြောင့် Pepsi ဟာ အလုပ်သမားအခွင့်အရေးချိုးဖောက်မှုတွေကျူးလွန်ထားလို့ ထုတ်ကုန်များအားလုံးကို မသုံးစွဲဘဲ Boycott ပြုလုပ်ရန် နိုင်ငံတကာအဆင့် စားသုံးသူCampaign ပြုလုပ်ခံထားရတယ်လို့လည်း သိရပါတယ်။
