OWIC ကတ်ထုတ်ပေးမှုကို အာဏာသိမ်းစစ်ကောင်စီက ပိတ်ထားလို့ ပြည်ပက ခွင့်နဲ့ပြန်လာတဲ့ အလုပ်သမား တွေ ပြန်ထွက်မရဘဲ အခက်အခဲများစွာ ဖြစ်နေရတယ်လို့ ကိုယ်တိုင်ကြုံတွေ့သူ တဦးက ပြောပါတယ်။
ပြည်ပမှာ အလုပ်လုပ်ကိုင်ဖို့ အဓိကကျတဲ့ ပြည်ပအလုပ်သမားသက်သေခံကတ် (OWIC-Oversea Workers Identity Card) ထုတ်ပေးမှုကို ဖေဖော်ဝါရီ ၁၄ ရက်မှာ အကြောင်းပြချက်မရှိဘဲ ရပ်ဆိုင်းထားတာ ဖြစ်ပါတယ်။
“အားလုံးက ဌာန ခွင့်ပြုချက်တွေ၊ စည်းကမ်းတွေနဲ့အညီ လုပ်ထားကြတာပါပဲ။ ရုတ်တရက် ပိတ်လိုက်တော့ အကုန်လုံး ဒုက္ခရောက်တာပေါ့။ ကျွန်မလည်း ခွင့်နဲ့ပြန်လာတာ။ အခုထိကို ပိတ်မိနေတာ။ OWIC ကတ် မရတော့ ဘာမှ လုပ်မရဘူး။ အလုပ်က ခွင့်ရက်ပြည့်တော့မယ်၊ အရေးကြီးနေပြီ။ သူဌေးကလည်း အလုပ်သမား ထပ် မရှာချင်လို စောင့်ပေးမယ်တဲ့။ ဒီထက်ပိုကြာမယ်ဆို လူစားထိုးနိုင်တယ်။ဒါဆို ပြဿနာတွေ အများကြီး ဖြစ် တော့မှာ ။ စိတ်တွေလည်း မွန်းကျပ်ပြီး စိတ်ဓါတ်ကျနေပြီ” လို့ ပြောပါတယ်။
OWIC ကတ်ထုတ်ပေးမှုတွေ ဝန်ကြီးဌာနဘက်က ရုတ်တရက် ပိတ်လိုက်လို့ မြန်မာနိုင်ငံကနေ ပြန်လည် ထွက်ခွာခွင့် မရတဲ့ ခွင့်ပြန် အလုပ်သမားတွေ အများအပြား ရှိနေတယ်လို့ သိရပါတယ်။ ဒါ့အပြင် စစ်ကောင်စီရဲ့ အလုပ်သမားဝန်ကြီးဌာန သတ်မှတ်ချက်အတိုင်း ဆောင်ရွက်ထားပြီး ပြည်ပကို သွားရောက် လုပ်ကိုင်ဖို့ အသင့်ဖြစ်နေသူတွေမှာလည်း OWIC ကဒ် ပြုလုပ်ခွင့်နဲ့ စေလွတ်ထွက်ခွာခွင့်တွေ ပိတ်ထားလို့ လုပ်ငန်းခွင်တွေဆီ အချိန်မီ သွားရောက်နိုင်တာ မရှိတော့ဘဲ ဆုံးရှုံးနစ်နာမှု များစွာ ဖြစ်ပေါ်နေတယ်လို့လည်း ကိုယ်တိုင်ကြုံတွေ့နေသူတွေက ပြောပါတယ်။
“လေယာဉ်လက်မှတ်လည်း ဆုံး၊ ခွင့်ရက်လည်း ကျော်တော့ အလုပ်ရှင်က အလုပ်သမားသစ်ခေါ်သွားတယ်။ Work Permit (pass)တွေ သက်တမ်းကုန်တယ်။ Visa၊ Calling၊ COE တွေ သက်တမ်းကုန်တယ်၊ အလုပ်ခေါ်စာ (Demand)လည်း ပယ်ဖျက် ခံရတယ်၊ အဲဒါတွေ ဆုံးရှုံးရတယ်။ ဒါတွေကို ဘယ်လို ပြန်ရနိုင်မလဲ စဉ်းစား ကြည့် ပါ။” လို့ OWIC ကတ်စောင့်ဆိုင်းနေသူ တဦးက ပြောပါတယ်။
ဇန်နဝါရီလ ၃၁ ရက်က ထိုင်းနိုင်ငံဆိုင်ရာ မြန်မာသံအမတ်ကြီး ဦးချစ်ဆွေကို အလုပ်သမားဝန်ကြီးအသစ်အဖြစ် အာဏာသိမ်းစစ်ကောင်စီက ခန့်အပ်ပြီးနောက် ပြည်ပ အလုပ်သမား စေလွှတ်မှုအားလုံးကို ပြန်လည် သုံးသပ်ဖို ဆိုပြီး OWIC ကတ်ထုတ်ပေးတာတွေကို ဖေဖော်ဝါရီလ ၁၄ ရက်မှာ အကန့်အသတ်မရှိ ယာယီ ရပ်ဆိုင်းခဲ့တာ ဖြစ်ပါတယ်။
