ပြည်ပအလုပ်အကိုင် အလုပ်သမား သက်သေခံကတ်ပြား (OWIC) လက်ဝယ်ကိုင်ဆောင်ထားသူများအနေဖြင့် ပြည်ပထွက်လိုပါက အလုပ်သမားဝန်ကြီးဌာနထံ ခွင့်ပြုချက်တောင်းခံကာ ခွင့်ပြုချက်ရမှ ပြည်ပထွက်ရမယ်လို့ စစ်ကော်မရှင် က ထပ်မံအသိပေးလာပါတယ်။

 

၂၀၂၆ ခုနှစ် ဇန်နဝါရီ ၁၄ ရက်က စတင်ပြီး ခွင့်ပြန်လုပ်သားတွေအပါအဝင် OWICကတ် ကိုင်ဆောင်ထားတဲ့ လုပ်သားတွေအနေနဲ့ သတ်မှတ်စည်းကမ်းများနှင့် အညီ အလုပ်သမား ညွှန်ကြားရေးဦးစီးဌာန၏ ခွင့်ပြုချက်ရယူပြီးမှသာ ပြည်ပကို ပြန်လည်ထွက်ခွာရန် လိုအပ်ကြောင်း အသိပေးထားပြီးနောက် မတ်လ၁၈ရက်မှာ စစ်ကော်မရှင်လက်အောက်ခံ ပြည်ပရှိ မြန်မာသံရုံးတွေကနေ ထပ်မံအသိပေးလာပါတယ်။

 

အပြည်ပြည်ဆိုင်လေဆိပ်များကပေးပို့တဲ့ စာရင်းများအရ မိမိအစီအစဉ်ဖြင့် ခွင့်ပြန် OWIC လက်ဝယ်ရှိပြီးသူတွေဟာ အလုပ်သမားညွှန်ကြားရေးဦးစီးဌာနသို့ တင်ပြခြင်းမရှိဘဲ ပြည်ပသို့ ထွက်ခွာနေသည့်ကို တွေ့ရှိရခြင်းကြောင့် ခွင့်ပြုချက်ရယူပြီးမှသာ ပြန်လည်ထွက်ခွာရန် ထပ်မံအသိပေးရတာဖြစ်တယ်လို့ ဆိုပါတယ်။

 

လက်ရှိမှာ ခွင့်ပြန်လုပ်သားတွေ အနေနဲ့ ပြည်ပ ပြန်လည် ထွက်ခွာဖို့ ခွင့်ပြုချက် တောင်းခံရာမှာ မျိုးစုံသော အခက်ခဲ တွေနဲ့ ကြုံတွေ့နေရပြီးငွေကြေးနစ်နာဆုံးရှုံးတာတွေဖြစ်သလို အလုပ်လက်မဲ့ ဖြစ်တာ တွေ ဖြစ်ပေါ်နေတယ်လို့ ခွင့်ပြန်လုပ်သားတွေထံမှသိရပါတယ်။

 

""ခွင့်နဲ့ ပြန်လာတဲ့ လုပ်သားတွေကို သူတို့ခွင့်ပြုမှ ပြည်ပ ပြန်ထွက်လို့ရမယ်ဆိုတာ ဘယ်နိုင်ငံမှ မရှိဘူး အခုက ပြည်ပမထွက်ရအောင် နည်းအမျိုးမျိုးနဲ့ ပိတ်ပင်ကန့်သတ်နေတာလို့ မြင်တယ် ထွက်ခွာ ခွင့်တွေကို လည်း ဒီနေ့မနက် လေယာဉ်နဲ့ ထွက်မယ်လို့ လေယာဉ်လက်မှတ်နဲ့တကွ တင်ပြထားလဲ ညနေ ဘက်မှ ခွင့်ပြုချက်ချပေးတယ် လေယာဉ်လက်မှတ်တွေ ဆုံးတာပေါ့ ပြီးတော့ သတ်မှတ်ရက် မှာ မထွက်ရင် လည်း အစကနေပြန်တင်ခိုင်းတယ် အခုလိုတွေ လုပ်လို့ ခွင့်ပြန်လုပ်သားတွေ တစ်ဘက်က အလုပ်ရှင်နဲ့ အဆင်မပြေ ဖြစ်ပြီး အလုပ်ပြုတ်သွားတဲ့ သူတွေမနည်းဘူး ""လို့ ခွင့်ပြန်လုပ်သားတစ်ဦး ကပြောပါတယ်။

 

ဒါ့အပြင် ခွင့်ပြန် လုပ်သားတွေရဲ့ အခက်ခဲ ပေါ် အခွင့်ကောင်းယူကာ ထွက်ခွာခွင့် အမြန်ဆုံး ရရှိအောင် ဆောင်ရွက်ပေးမယ်ဆိုပြီး ပွဲစားတွေက ငွေကြေး လိမ်လည် တာတွေ ခံရတဲ့ လုပ်သားတွေလည်း ရှိတယ်လို့ ၎င်းကပြောပါတယ်။

 

စစ်ကောင်စီရဲ့ အလုပ်သမားဝန်ကြီးဌာနက PJ နိုင်ငံကူးလက်မှတ်၊OWICကတ်တို့ဖြင့် ပြည်ပသို့ ထွက်ခွာ မယ့် လုပ်သားတွေအနေနဲ့ သတ်မှတ်ထားတဲ့စာရွက်စာတမ်းတွေနဲ့ ထွက်ခွာမယ့်ရက်စွဲ ပါတဲ့ လေယာဉ်လက်မှတ် တို့နဲ့အတူ နေပြည်တော်ရှိ အလုပ်သမားဝန်ကြီးဌာန ရုံးချုပ်ကို ရုံးပိတ်ရက်မပါ၅ရက် ကြိုတင်ပြီး ခွင့်ပြုချက်တောင်းရမယ်လို့

ကြေညာထားပါတယ်။