ရန်ကုန် လှိုင်သာယာမြို့နယ် စက်မှုဇုန် ၁ ဖန်ချက်ဝန်ဦးညွန့် လမ်းမှာဖွင့်လှစ်ထားတဲ့ Nexstar အထည်ချုပ်စက်ရုံမှာ အလုပ်သမား ၈၀၀ ကျော်အလုပ်လုပ်ကိုင်နေတာဖြစ်ပြီး အလုပ်သမားတွေဟာ ခွင့်ခံစားခွင့်တွေမရရှိဘဲ အလုပ်လုပ်ကိုင်နေရတယ်လို့ ပြောပါတယ်။
တရုတ်နိုင်ငံသားပိုင်ဖြစ်တဲ့ အဲ့ဒီစက်ရုံမှာ JohnBaner၊ Women Secret ဂျာကင်ထည် ဘောင်းဘီ၊ အင်္ကျီတွေချုပ်လုပ်တာဖြစ်ပြီး ဥပဒေပါခွင့်တွေမရရှိတာ အထည်စံချိန်တွေကို ချုပ်လုပ်နိုင်တာထက်ပိုပြီးတောင်းဆိုတာ တွေနဲ့ အလုပ်သမားတွေကို ဖိအားပေးပြီးအလုပ်ကထွက်ခိုင်းတာတွေ ကျူးလွန်နေတယ်လို့ အလုပ်သမားကပြောပါတယ်။
"ရှောင်တခင်ခွင့်တွေ လုပ်သက်ခွင့်တွေခံစားခွင့်မရပါဘူး ခွင့်တိုင်လည်း မပေးဘူး နေမကောင်းလို့ဖြစ်စေ အကြောင်းရှိလို့ဖြစ်စေ အလုပ်တစ်ရပ်ပျက်ရင် ဒေးကြေး ၅၈၀၀ ကျပ် ရက်မှန်ကြေး ၁၀၀၀၀ ကျပ် စုစုပေါင်း ၁၅၈၀၀ ကျပ်ဖြတ်တောက်ခံရတာပါ"လို့ အလုပ်သမားကပြောပါတယ်။
လုပ်ငန်းခွင်အတွင်းမှာ စံချိန်မတန်တဆတောင်းခံတာတွေလည်း ကြုံတွေ့နေရပြီး စက်လိုင်းတစ်လိုင်းလျင် တစ်နာရီကို လိုင်းပေါက် အထည် ၃၀ သတ်မှတ်တောင်းခံပြီးအထည်အရေအတွက် ပြည့်မီစေရန် အလုပ်ချိန်အတွင်း ရေမသောက် အပေါ့အပါးမသွားဘဲ ချုပ်လုပ်နေရတာဖြစ်တယ်လို့ အလုပ်သမားကပြောပါတယ်။
"စက်ရုံက လှိုင်သာယာကနေ ရွှေပြည်သာမြို့နယ်က စက်ရုံခွဲကို ပြောင်းဖို့ ရှိပါတယ် မလိုက်နိုင်တဲ့အလုပ်သမားတွေအလုပ်ထွက်ရမယ်ပြောတယ် အခုက ဘယ်လိုဖြစ်နေလဲဆိုတော့ စက်ရုံမှာ အော်ဒါ ရှိရက်နဲ့ အချိန်ပိုမခေါ်တော့ဘဲ အလုပ်ချိန် ၈ နာရီပဲခိုင်းတော့ လစာကဒေးကြေးပဲရတော့ အလုပ်သမားတွေအတွက်ရပ်တည်လို့မရတော့ဘူး အလုပ်သမားတွေက အခြေခံလုပ်ခတစ်ခုတည်းနဲ့ ရပ်တည်မရဘူးဆိုတာသိတော့ အလုပ်ထွက်သွားအောင် တမင်ရည်ရွယ်ချက်ရှိရှိ လုပ်နေတာ"လို့ အလုပ်သမားကပြောပါတယ်။
ပြီးခဲ့တဲ့ သီတင်းကျွတ်ပိတ်ရက်မှာ နယ်ပြန်တဲ့အလုပ်သမားအချို့ရှိပြီး အလုပ်ဖွင့်ရက်မှာ လမ်းခရီးအခက်အခဲကြောင့် အလုပ်ဆင်းရန် နောက်ကျတဲ့ အလုပ်သမား ၄ ဦးကို လူသစ်အနေဖြင့်သာပြန်ဝင်ရန် နဲ့ လူသစ်အနေဖြင့် လက်မခံနိုင်ပါက အလုပ်ထွက်ရမယ်လို့ ဖိအားပေးတာကြောင့် အလုပ်သမားတွေအတွက် နစ်နာမှုတွေ ကြုံနေရတယ်လို့ လည်း အလုပ်သမားကပြောပါတယ်။
လုပ်ငန်းခွင်ထဲမှာ အလုပ်သမားအရေးကိစ္စတွေ ဖြေရှင်းပေးဖို့ အလုပ်သမားသမဂ္ဂဖွဲ့စည်းထားတာလည်းမရှိဘူးလို့ ပြောပါတယ်။
အလုပ်သမားတွေအနေနဲ့ ဥပဒေပါခံစားခွင့်ဖြစ်တဲ့ ရှောင်တခင်ခွင့် လုပ်သက်ခွင့်တွေခံစားခွင့်ပေးဖို့ အထည်စံချိန်တောင်းဆိုရာမှာ အလုပ်သမားတွေချုပ်လုပ်နိုင်တဲ့ စံချိန်ကိုသာသတ်မှတ်တောင်းခံဖို့ အလုပ်သမားတွေအပေါ် ဥပဒေမဲ့ကျူးလွန်တာတွေမလုပ်ဖို့ စက်ရုံပြောင်းရွှေ့ပါက အလုပ်သမားတွေအပေါ် ဥပဒေနှင့်အညီဆောင်ရွက်ပေးဖို့ လိုလားနေတယ်လို့ အလုပ်သမားတွေကပြောပါတယ်။
