လှိုင်သာယာ(အရှေ့ပိုင်း)မြို့နယ်၊ စက်မှုဇုန်(၂)၊ တွင်းသင်းတိုက်ဝန် ဦးထွန်းညိုလမ်း၊ ရှိ ဂျပန်နိုင်ငံသား ပိုင်ဆိုင်တဲ့ Myanmar Sunny ဖိနပ်စက်ရုံက အလုပ်သမားတွေဟာ တစ်နေ့လုပ်ခ ဒေးကြေး တိုးမြှင့်ပေးဖို့ ဇွန်လ၂၀ရက်နေ့က စတင်တောင်းဆိုနေတယ်လို့ သိရပါတယ်။
အဆိုပါစက်ရုံဟာ ၂၀၀၀ ခုနှစ် ဇွန် ၁၄ ရက်နေ့မှ စတင်လုပ်ငန်း လည်ပတ်ခဲ့တာဖြစ်ပြီး လတ်တလောမှာတော့ အလုပ်သမား ၁၂၀၀ နဲ့ လည်ပတ်လုပ်ကိုင်နေတယ်လို့ သိရပါတယ်။
လက်ရှိပေးချေနေတဲ့ နှုန်းထားအရ ဒေးကြေး ၅၂၀၀ ကျပ် ဖြစ်ပြီး တစ်နာရီလုပ်ခလစာ ၆၅၀ ကျပ်ဖြစ်တာကြောင့် ပျမ်းမျှအားဖြင့် တစ်လလျင် ကျပ် ၂၁၀၀၀၀ ဝန်းကျင်သာရရှိနေပြီး စားဝတ်နေရေးအတွက် ဖူလုံမှုမရှိဘဲ အခက်အခဲဖြစ်နေတယ်လို့ အလုပ်သမား က ဆိုပါတယ်။
တောင်းဆိုမှုပြုလုပ်ရာမှာ အလုပ်သမား လုပ်ခလစာတိုးမြှင့်ပေးရန် အတွက် "ဒေးကြေး ၆၀၀၀)ကျပ်ပေးရန်နဲ့စက်ရုံပိုင်ရှင်မှ စက်ရုံပိတ်သိမ်းမည်ကို တိကျသော အဖြေပေးရန်” ဆိုတဲ့ တောင်းဆိုချက် အချက် (၂)ချက်ကို ရရှိဖို့ အလုပ်လုပ်ကိုင်ခြင်းမရှိဘဲ စက်ရုံရှိ စက်လိုင်းနေရာများ၌ ထိုင်ကာ တောင်းဆိုခဲ့ကြတာဖြစ်တယ်လို့ သိရပါတယ်။
ကုန်ဈေးနှုန်းမြင့်တက်မှုကြောင့် သင့်တင့်တဲ့ လုပ်ခလစာတိုးပေးဖို့ အလုပ်သမား ၁၂၀၀ ကျော်လုပ်ငန်းခွင်မဝင်ဘဲ အခုလို လုပ်ငန်းခွင်ထဲမှာ အလုပ်ရပ်နားပြီး တောင်းဆိုမှုပြုလုပ်နေတာဖြစ်တယ်လို့သိရပါတယ်။
အလုပ်သမားတွေ တောင်းဆိုထားတဲ့အချက်အလက်တွေအရ တစ်နာရီလျင် လုပ်ခလစာ ၇၅၀ ကျပ်နှုန်းတိုးပေးဖို့ အလုပ်ထွက်သွားသော အလုပ်သမားတွေနေရာမှာ အစားထိုးပေးဖို့ နှစ်အလိုက် လုပ်သက်ကြေးခွဲခြားပေးဖို့ နဲ့ စက်ရုံ ပိတ်မယ်ဆိုပါက ပိတ်မည့်ရက်အား တိကျစွာပြောဖို့ စတဲ့အချက်တွေပါဝင်တယ်လို့ သိရပါတယ်။
နောက်ဆုံးသိရတဲ့ အချက်အလက်တွေအရ စက်ရုံပိတ်သိမ်းဖို့မရှိဘူးလို့ စက်ရုံဘက်ကအသိပေးပြောဆိုတာရှိပြီး ဒေးကြေး တိုးမြှင့်ပေးမဲ့ကိစ္စကိုတော့ ပြောဆိုခြင်းမရှိသေးဘူးလို့ သိရပါတယ်။
Myanmar Sunny ဖိနပ်စက်ရုံမှာ Hawkins Premium အမှတ်တံဆိပ်ချုပ်လုပ်တာဖြစ်ပြီး နိုင်ငံတကာကိုတင်ပို့နေတာဖြစ်တယ်လို့ သိရပါတယ်။
အလုပ်သမားများအား တောင်းဆိုမှုများနှင့် ပတ်သက်လို့ စက်ရုံအနေဖြင့် ယခုလ ဇွန် ၂၃ နေ့မှာ ညှိနှိုင်းဖြေရှင်းဆောင်ရွက်ပေးမှာဖြစ်တယ်လို့လည်း သက်ဆိုင်ရာ သတင်းရင်းမြစ်တခုကသိရပါတယ်။
#MyanmarLabourNews
