NEWS

Myanmar Qi Yuan အထည်ချုပ်စက်ရုံ အောစူပါ အလုပ်သမားများ၏ ဆုကြေးနှင့် လစာများအား ဖြတ်ယူနေ

CoverLogo
516 Views

ရန်ကုန်မြို့၊ လှိုင်သာယာစက်မှုဇုန်  ၁၊ သံချက်ဝန် ဦးညွှန့်လမ်းက Myanmar Qi Yuan အထည်ချုပ်စက် အမှတ် ၂ က Finishing အော်စူပါ (All Super) ဆိုသူက အလုပ်သမားတွေရဲ့ လစာ အစွန်းထွက် ငွေတွေနဲ့ ဆုကြေးငွေ တွေကို ဖြတ်ယူ နေတယ်လို့ အလုပ်သမားတွေက ပြောပါတယ်။ 

“သူ ဖြတ်ယူနေတာ ၄ ခါရှိပြီ ၊ မန်နေဂျာတွေ ၊စက်ရုံပိုင်ရှင်တွေကိုလည်း တရုတ်ဆိုတော့ စကားပြန်နဲ့ ပြောရရင် တိုင်တဲ့သူကို သိမှာ။ ဒါကြောင့် အကြောင်းမကြားရဲဘူး။ ၁၀ လပိုင်းထံမှာ ဆုကြေး တယောက်ကို ၅၀၀၀ နီးပါး ရတယ်။ အဲဒါကို အလုပ်သမားတွေကို အသိမပေးဘဲ ၄၀၀၀ ပဲ ပေးပြီး တယောက်ကို  ၉၀၀ ကျော် ဖြတ်ယူထား တယ်။” လို့ အလုပ်သမားတဦးက ပြောပါတယ်။ 

တရုတ်နိုင်ငံသားပိုင် Myanmar Qi Yuan အထည်ချုပ်ရုံ ၂ ရဲ့ Finishing ဌာနမှာ အလုပ်သမား ၈၀ ကျော်ရှိပြီး ဌာန  ၃ ခုနဲ့ ဖွဲ့စည်းထားတယ်လို့ အလုပ်သမားတွေက ပြောပါ တယ်။ အလုပ်သမားတွေရဲ့ ငွေကြေးကို ဖြတ်ယူ နေတဲ့ Finishing ဌာနရဲ့အောစူပါကတော့ သက်လတ်ပိုင်း အမျိုးသမီးတဦးဖြစ်ပြီး စက်ရုံလုပ်သက်  ၃ လ လောက်ပဲ ရှိသေးတယ်လို့ သိရပါတယ်။ 

“ ၉ လပိုင်း လအလယ်လောက်မှာ အလုပ်သမားတွေ ဆုကြေး ရတယ်။  ဌာနမှာ  ၈၀ ကျော် ဆိုတော့ ခုနှစ်သောင်း ကျော် လောက်ရှိပါတယ်။ ဒီပိုက်ဆံ အောစူပါက မပေးဘဲ ဖြတ်ထား လိုက်တယ်။ ၉ လပိုင်းလကုန်တော့ လစာ တွေထဲက အစွန်းထွက်ကို  အကုန်ဖြတ်ယူပြန်တယ်။ နောက်မှ  မီတင် (meeting) ခေါ်တယ်။  ကထိန်အတွက် ဖြတ်ထားတာဆိုပြီး ပြောပြန်တယ်။ ၁၀ လပိုင်း လစာထပ်ယူပြန်တယ်။ အလုပ်သမားတွေက ပြောမှ မီတင်ခေါ်ပြီး ၁၀ လပိုင်းကနေ သုံးလပိုင်းအထိ လစာအစွန်းထွက်ကို ဖြတ်ယူမယ် ။ အဲဒီငွေတွေက သင်္ကြန် အတွက်ဆိုပြီး ပြောလာတယ်။” လို့ အလုပ်သမားတွေက ရှင်းပြပါတယ်။ 

အထည်ချုပ်စက်ရုံတွေ လစာရှင်းရာမှာ ပထမအကြိမ် အစွန်းထွက်တွေကို ချန်ထားလေ့ရှိပြီး နောက် ၂ ရက် လောက်မှသာ အဲဒီ အစွန်းထွက်တွေကို ရှင်းလင်းပေးတာ ဖြစ်လို့ အလုပ်သမားတွေရရှိတဲ့ အစွန်းထွက်တွေကို ဖြတ်ယူနိုင်တာ ဖြစ်တယ် လို့ အလုပ်သမားတွေက ပြောပါတယ်။

အလုပ်သမားတွေရဲ့ ငွေကြေးတွေကို ရယူ တာနဲ့ပတ်သက်ပြီး မကျေနပ်သူရှိပါက အဲဒီ အောစူပါဆိုသူက တွေ့ဆုံပြောဆိုမယ်ဆိုပြီးလည်း ခြိမ်းခြောက် ခဲ့တယ်လို့လည်း အလုပ်သမားတွေက ပြောပါတယ်။

“သူ့ ဒီဌာနမရောက်ခင်က အလုပ်သမား တရာကျော်ရှိတယ်။ အဲလိုတွေသူက အလုပ်သမားတွေရဲ့တွေကို ဖြတ်ယူ လို့ ၊ ခြိမ်းခြောက်လို့၊ အိုတီတွေ အများကြီးခေါ်လို့ ထွက်သွားကြတာပဲ အလုပ်သမား  ၂၀ ကျော် ရှိတယ်။ ဖြတ်ယူ တာ ဌာနထဲက အလုပ်သမားတွေ အားလုံး သဘောတူမှ ယူထားလို့ရမှာ ။ အများပိုက်ဆံဆိုတာ ပွင့်ပွင့်လင်းလင်း စာရင်းဇယားနဲ့ ချပြဖို့လည်း လိုတယ်။  “ လို့ ပြောပါတယ်။ 

Myanmar Qi Yuan အထည်ချုပ်ရုံ ၂ Finishing ဌာနရဲ့အောစူပါဟာ အလုပ်သမားတွေရဲ့ ဆန္ဒကို မေးမြန်း တာတွေ မရှိဘဲ အချိန်ပို ညနက် ၁၂ အထိ ခေါ်ယူတဲ့အပြင် အနားမပေးဘဲ နောက်တနေ့ ဆက်တိုက် ဆင်းခိုင်း တာတွေ ပြုလုပ်ခဲ့တဲ့အပြင် “ဒီည နိုက်မဆင်းရင် နောက်နေ့ တယောက်မှ မလာနဲ့” ဆိုပြီး ခြိမ်းခြောက် ပြောဆိုတယ်လို့ အလုပ်သမားတွေက ပြောပါတယ်။

“ဌာနက အမတယောက်က နေလည်းမကောင်းဘူး ။ ဆေးခန်းသွားချင်လို့ ။ ညနေ ၆ ခွဲ ပြန်ပါစေလို့ ပြောတဲ့ အလုပ်သမားကို အောစူပါက “နင်တိုးဆင်းနိုင်ရင် ဆက်လုပ် ၊ မဆင်းနိုင်ရင် အလုပ်ထွက်” လို့ ပြောခဲ့တယ်။ အဲ့အမက နေမကောင်းနေတဲ့ အချိန်မှာပဲ အလုပ်ထွက်သွားရတယ်။” လို့  ပြောတယ်။ 

အချိန်ပိုလုပ်ကိုင်ဖို့ အလုပ်သမားတွေရဲ့ ဆန္ဒက အရေးပါပေမဲ့ အောစူပါရဲ့ ခြိမ်းခြောက်မှုတွေကြောင့် မဖြစ်မနေ ဆင်းခဲ့ရတာလို့ အလုပ်သမားတွေက ပြောပါတယ်။ ဒီလို ကြီးကြပ်ရေးမှူး(အောစူပါ)တွေကြောင့် လုပ်ငန်းခွင် သာယာမှုမရှိဘဲ စက်ရုံနဲ့ အလုပ်သမား နှစ်ဖက်စလုံး ကောင်းမွန်းတဲ့ အလားလာမရှိဘူးလို့ အလုပ်သမားတွေ ဆက်ပြောပါတယ်။

“အချိန်ပိုမဆင်းတော့ ခြိမ်းခြောက်တယ်။ အလုပ်သမားတွေရဲ့ ငွေကြေးကိုဖြတ်တယ်ဆိုတာနဲ့ အလုပ်သမား တွေ က ဒီလို စက်ရုံကို မလုပ်ချင်တော့ဘူး။ ထွက်ကြတာပဲ။ အလုပ်သမားက အလုပ်အကိုင် ဆုံးရှုံးတယ်။ စက်ရုံက ကျွမ်းကျင်သူတွေဆုံးရှုံးတယ်။  ဒီလို ကြီးကြပ်ရေးမှူးကို ခိုင်းနေတယ်ဆိုတာနဲ့ စက်ရုံကို ဘယ်သူ့မှ မယုံ တော့ဘူး  ။ နာမည်လည်း ပျက်သွားပြီ။ စက်ရုံနာမည် ပျက်တာနဲ့ ပိုင်ရှင်လည်း နစ်နာတာပဲ။ လက်ရှိ အလုပ်သမားတွေရဲ့ နစ်နာမှုတွေကို ဖြေရှင်းပေးဖို့နဲ့  အောစူပါကိုလည်း သေချာ ထိန်းကျောင်းစေချင်တာပါပဲ ” လို့ စက်ရုံ အလုပ်သမား တဦးက ပြောပါတယ်။ 

Myanmar Qi Yuan အထည်ချုပ်ရုံမှာ ရုံခွဲ နှစ်ရုံရှိပြီး သံချက်ဝန် ဦးညွှန့်လမ်းက စက်ရုံ ကတော့ ရုံအမှတ် ၂ ဖြစ်ကာ အလုပ်သမား ၅၀၀ နီးပါးလုပ်ကိုင်နေတယ်လို့ Myanmar Labour News ကို အလုပ်သမားတွေက ပြောကြားထားပါတယ်။ 

#MyanmarLabourNews


Related posts

Cover
ဒေးကြေးနဲ့အချိန်ပိုကြေးတွေတိုးပေးဖို့ အလုပ်သမားတွေ ဆန္ဒဖော်ထုတ်
Jul 12, 2024
Cover
Heng Li Garment စက်ရုံအလုပ်သမားတွေ နားရက်မရှိလုပ်ကိုင်နေရပြီး အခွင့်အရေးချိုးဖောက်ခံရမှုများရှိနေ
Jul 11, 2024
Cover
JOC Myanmar Knitwear အထည်ချုပ်စက်ရုံအလုပ်သမားတွေ ဒေးကြေးတိုးပေးဖို့တောင်းဆို၊ အလုပ်သမား ၂ ဦးအလုပ်ထုတ်ခံရ
Jul 11, 2024
Cover
လူမှုဖူလုံရေးအကျုံးဝင်အလုပ်သမားများ မိမိတို့ရဲ့ဖူလုံရေးအထောက်အပံ့ရပိုင်ခွင့်တွေအပေါ် ပိုမိုသိရှိရန်လိုအပ်နေသေး
Jul 11, 2024
Cover
အခြေခံအလုပ်သမားတွေ ဆိုင်ဖျော်လဘက်ရည်တခွက် သောက်နိုင်ဖို့ အလှမ်းဝေးလာ
Jul 10, 2024
Cover
pepsi အချိုရည် ကုမ္ပဏီကိုထပ်တိုးတရားစွဲဆိုမှု ၁၈ ရက်နေ့သို့ပြန်လည်ချိန်းဆို
Jul 10, 2024
Cover
Wonderful Apparel အထည်ချုပ် အလုပ်သမားတွေ အခွင့်အရေးချိုးဖောက်ခံနေရ
Jul 09, 2024
Cover
၃ ရက်အတွင်း ဝမ်းပျက်ဝမ်းလျှောရောဂါ ဖြစ်ပွားသူ (၁၆၀) ကျော်ထိမြင့်တက်လာလို့ စက်ရုံအလုပ်သမားတွေ စိုးရိမ်နေရ
Jul 09, 2024