Myanmar Postarion အထည်ချုပ်စက်ရုံနဲ့ တောင်းဆိုမှုပြုလုပ်နေတဲ့ အလုပ်သမားတွေကြား ဒီကနေ့ ဇွန်လ ၅ ရက်မှာ သဘောတူညီမှု ရရှိခဲ့တယ်လို့ သွေးစည်းညီညွတ်သော သမဂ္ဂများအဖွဲ့ချုပ် STUM က ထုတ်ပြန်ထားပါတယ်။
စက်ရုံဘက်က ဒေးကြေး ကျပ် ၁၁,၀၀၀ တိုးမြှင့်ပေးပြီး နှစ်ဖက် သဘောတူညီမှု ရရှိခဲ့တာလို့ သိရပါတယ်။ အလုပ်သမားတွေက နေ့တွက် ဒေးကြေး ကျပ် ၁၃,၀၀၀ ၊ ရက်မှန်ကြေး ၆၀,၀၀၀နဲ့ အချိန်ပိုကြေး တစ်နာရီ ကျပ် ၂,၅၀၀ တိုးမြှင့်ပေးဖို့ ၃ ရက်ကြာတောင်းဆိုခဲ့တာ ဖြစ်ပါတယ်။
Myanmar Postarion စက်ရုံက အရင် Red Stone အမည်နဲ့ အထည်ချုပ် စက်ရုံ ဖွင့်ခဲ့ပြီး လက်ရှိ ရန်ကုန်မြို့၊ ရွှေပြည်သာမြို့နယ်၊ စက်မှုဇုန် (၁) ၊ စက်မှု (၃) လမ်းမှာ ဖွင့်လှစ်ထားပါတယ်။ လုပ်ခတိုးမြှင့်ပေးဖို့ တောင်းဆိုမှုပြုလုပ်ခဲ့ရာမှာ စက်ရုံလုပ်သား အားလုံးပါဝင်ခဲ့တယ်လို့လည်း သိရပါတယ်။
