NEWS

Myanmar Guotai Huasheng Glory Fashion အထည်ချုပ်စက်ရုံမှာ လုပ်ငန်းခွင်ဆိုင်ရာ ပြဿနာတွေကို ဖြေရှင်းမပေး

CoverLogo
719 Views

ရန်ကုန်တိုင်း လှိုင်သာယာစက်မှုဇုန် ၂ ဦးထွန်းညိုလမ်းမှာ ဖွင့်လှစ်ထားတဲ့ Myanmar Guotai Huasheng Glory Fashion အထည်ချုပ်စက်ရုံမှာ လုပ်ငန်းခွင်ဆိုင်ရာ ပြဿနာရပ်တွေကို ဖြေရှင်းပေးတာမရှိဘဲ အလုပ်သမားအခွင့်အရေးချိုးဖောက်တာတွေ ကျူးလွန်နေတယ်လို့ အလုပ်သမားတွေကပြောပါတယ်။

လုပ်ငန်းခွင်အတွင်းမှာ အလုပ်ထုတ်ခံရတဲ့ အလုပ်သမားတွေကို မိမိသဘောဖြင့် နှုတ်ထွက်ကြောင်း ခြိမ်းခြောက် စာရေးခိုင်းပြီး ငြင်းဆန်ပါက ပေးရန်ကျန်သည့် လစာများမပေးဟုဆိုကာ ခြိမ်းခြောက်ခြင်း လုပ်ငန်းခွင်အတွင်းမှာ ကျွမ်းကျင်အဆင့်လိုက်  A B C D ဂရိတ်ခွဲခြားသတ်မှတ်ပေမဲ့ C D သမားတွေကို A B ပွိုင့်များ မရမကချုပ်ခိုင်းခြင်း စံချိန်တောင်းခံရာမှာ ကြီးကြပ်သူစူပါ ဝန်ထမ်းမှ လိုင်းရှိ အလုပ်သမားများကို တစ်ဆင့်ချင်း အော်ဟစ်ကာ စံချိန်တောင်းစေခြင်း လုပ်ငန်းခွင်ဆိုင်ရာ ပြဿနာများကို ဖြေရှင်းပေးရန် သွားရောက်ပြောဆိုသော်လည်း ဖြေရှင်းပေးမှုမရှိခြင်း စတာတွေဖြစ်ပွားလျှက်ရှိတယ်လို့ အလုပ်သမားတွေကပြောဆိုပါတယ်။

အလုပ်သမား ၇၀၀ ကျော်လုပ်ကိုင်နေတာဖြစ်ပြီး တရုတ်နိုင်ငံသားပိုင်ဖြစ်တဲ့ အဆိုပါ လုပ်ငန်းမှာ    PRIMARK၊ esmara၊ Inextenso စတဲ့အမှတ်တံဆိပ်တွေချုပ်လုပ်နေတာဖြစ်တယ်လို့ သိရပါတယ်။

"အရင်က ၃၃ ယောက်ချုပ်ရတဲ့ လိုင်းကို အခု ၂၆ ယောက်နဲ့ အရင်က စံချိန်အရည်အတွက်အတိုင်း ပေးရတာပါ လုပ်အားတွေကို ရသလောက်ညှစ်ထုတ်တာပေါ့ A B C D ဆိုပြီး ကျွမ်းကျင်အဆင့်လိုက် ကျွမ်းကျင်ကြေးနှုန်းထားနဲ့ ဂရိတ်တွေခွဲထားပေမဲ့ ကျွမ်းကျင်ကြေးနည်းပါးတဲ့သူတွေကို ပွိုင့်ကြီးတွေ မရမက ချုပ်ခိုင်းတာ "လို့ ကျေနပ်မှုမရှိတဲ့အလုပ်သမားကပြောပါတယ်။

လုပ်ငန်းခွင်အတွင်းမှာ လုပ်ငန်းခွင်ဆိုင်ရာ ပြဿနာတစ်စုံတစ်ရာပေါ်ပေါက်ပါက  ဖြေရှင်းဖို့ အလုပ်သမားသမဂ္ဂဖွဲ့စည်းထားတာမရှိဘဲ လက်ရှိ ဖွဲ့စည်းထားတဲ့ လုပ်ငန်းခွင် ညှိနှိုင်းရေးကော်မီတီ WCC ကို သွားရောက် အသိပေးရာမှာလည်း ဖြေရှင်းပေးခြင်းမရှိဘူးလို့ သိရပါတယ်။

အလုပ်သမားတစ်ဦးချင်းစီချုပ်လုပ်တဲ့ စံချိန်တောင်းခံရာမှာလည်း စံချိန်မပြည့်တဲ့အလုပ်သမားကို အမည်တပ်ကာ အော်ဟစ်ဆဲဆိုတာ အထူးသဖြင့် လိုင်း ၁၂ စူပါ နှင့် လိုင်း ၅ စူပါ တို့မှ ဆဲဆိုအော်ဟစ်ကာတောင်းဆိုနေပြီး လိုင်း ၅ မှာတော့ အလုပ်သမားတစ်ယောက်ချင်းကို တစ်ဆင့်စီ စံချိန်ကို အော်တောင်းခိုင်းပြီး ဖိအားပေးကာ ရန်တိုက်ပေးတဲ့ လုပ်ရပ်တွေလည်း လုပ်ဆောင်နေတယ်လို့ အလုပ်သမားကပြောဆိုပါတယ်။

"အလုပ်သမားအချင်းချင်းလည်း ရန်တိုက်ပေးတဲ့ပုံစံမျိုး တစ်ယောက်ချင်းစီ အော်တောင်းခိုင်းတယ် စံချိန်တောင်းတာက စူပါ ရဲ့အလုပ်လေ အလုပ်သမားတွေကို အခုလို မလုပ်သင့်ဘူး"လို့ အလုပ်သမားတစ်ဦးကပြောဆိုပါတယ်။

အကြောင်းအမျိုးမျိုးရှိပါကလည်း အလုပ်ချိန်တွင်း ဖုန်းကိုင်ခွင့်မပြုဘဲ နေမကောင်းဖြစ်ပါကလည်း ပြန်ခွင့်မပေးတာ အလုပ်ထွက်တဲ့အလုပ်သမားတွေကို ပင်ပန်းလို့ အလုပ်ထွက်ကြောင်း မပြောရန် ပိတ်ပင်တာ ဖယ်ရီကား အချိန်မမှန်တာ  နားနေချိန် မုန့်စားပါက cctv ဖြင့်စောင့်ကြည့်ကာ ဝန်တိမ်ထိုးခိုင်းတာတွေပြုလုပ်ပြီး လုပ်ငန်းခွင်အတွင်း ဖုန်းနဲ့ ပိုက်ဆံတွေပျောက်ဆုံးပါက cctv မှတ်တမ်း ရှာဖွေရန် ငြင်းဆန်ပြီး တာဝန်ယူမှု မရှိဘူးလို့ အလုပ်သမားတွေကပြောဆိုပါတယ်။

ယင်းကဲ့သို့ လုပ်ငန်းခွင်အတွင်း တာဝန်ယူမှုတာဝန်ခံမှုမရှိဘဲ ဖြေရှင်းပေးခြင်းမရှိတာ အလုပ်သမားတွေရဲ့ တောင်းဆိုလာမှုများကို လက်မခံဘဲ ဆောင်ရွက်ပေးခြင်းမရှိတာတွေ ဖြစ်ပွားလျက်ရှိပြီး အဆိုပါ အလုပ်သမားရေးရာ ကိစ္စရပ်တွေကို ဖြေရှင်းပေးဖို့ လိုလားနေတယ်လို့ အလုပ်သမားတွေက တောင်းဆိုတယ်လို့ ဆိုပါတယ်။


Related posts

Cover
စိုက်ပျိုးရေးလုပ်သားရှားပါးတာကြောင့် ယခင်နှစ်ထက်လုပ်ခသုံးဆခန့်တိုးပေးခေါ်ယူနေရ
Jun 14, 2024
Cover
ပြည်တွင်းမှာ ကလေးလုပ်သားများပြားလာကြောင်း ILO ထုတ်ပြန်
Jun 14, 2024
Cover
ကုန်ဈေးနှုန်းမြင့်တက်မှုတွေကြောင့် လုပ်ခလစာတိုးပေးတဲ့ ကုမ္ပဏီလုပ်ငန်းရှင်အချို့ကို စစ်ကောင်စီက ပုဒ်မ ၅၀၅ ဖြင့်ဖမ်းဆီးစစ်ဆေး
Jun 12, 2024
Cover
ဥပဒေမဲ့အလုပ်ထုတ်တာတွေမလုပ်ဖို့နဲ့ တနင်္ဂနွေနေ့နားရက်ပေးဖို့ အလုပ်သမားတွေပြော
Jun 12, 2024
Cover
ILO ညီလာခံတွင် ဆွေးနွေးနေသည့် အမျိူးသမီးခေါင်းဆောင်(၂)ဦးအား ထောက်ခံသည့် ကမ်းပိန်းပြုလုပ်
Jun 12, 2024
Cover
Made စီမံချက်အား MICS အလုပ်သမားအဖွဲ့ချုပ် ပူးပေါင်းဆောင်ရွက်မှုမရှိကြောင်း ထပ်မံထုတ်ပြန်
Jun 12, 2024
Cover
အတင်းအကျပ် အချိန်ပိုခေါ်ယူမှုများ ဖြစ်ပေါ်နေပြီး၊ လုပ်သားတဦး နာရီ ၁၂၀ အထိ အချိန်ပို လုပ်ကိုင်နေရ
Jun 12, 2024
Cover
အထည်စံချိန်ကို ချုပ်လုပ်နိုင်တာထက်ပိုမိုသတ်မှတ်တောင်းခံပြီး မပြည့်ပါက အချိန်ပိုကြေးမပေးဘဲ ခိုင်းစေ
Jun 11, 2024